হৰদীপ সিং পুৰীয়ে শক্তিৰ প্ৰয়োজনীয়তা পূৰণৰ বাবে চৰকাৰে গ্ৰহণ কৰা পদক্ষেপ আৰু লকডাউনৰ উৰাবাতৰি সন্দৰ্ভত ছ’চিয়েল মিডিয়াত এটা পোষ্ট শ্বেয়াৰ কৰে
কেন্দ্ৰীয় পেট্ৰলিয়াম আৰু প্ৰাকৃতিক গেছ মন্ত্ৰী হৰদীপ সিং পুৰীয়ে শক্তিৰ প্ৰয়োজনীয়তা পূৰণৰ বাবে চৰকাৰে গ্ৰহণ কৰা পদক্ষেপ আৰু লকডাউনৰ উৰাবাতৰি সন্দৰ্ভত ছ’চিয়েল মিডিয়াত এটা পোষ্ট শ্বেয়াৰ কৰে । তেওঁ কয় যে বিশ্বৰ পৰিস্থিতি অনিশ্চিত হৈ আছে আৰু আমি শক্তি, যোগান শৃংখল আৰু অত্যাৱশ্যকীয় সামগ্ৰীৰ সৈতে জড়িত পৰিস্থিতি গভীৰ ভাৱে নিৰীক্ষণ কৰি আছো ।
কেন্দ্ৰীয় মন্ত্ৰী হৰদীপ সিং পুৰীয়ে আৰু কয় যে প্ৰধানমন্ত্ৰী মোদীৰ নেতৃত্বত চৰকাৰে দেশলৈ ইন্ধন, শক্তি আৰু অন্যান্য অত্যাৱশ্যকীয় সামগ্ৰীৰ নিৰৱচ্ছিন্ন যোগান নিশ্চিত কৰি আছে । তেওঁ লগতে কয় যে যিকোনো সম্ভাৱ্য প্ৰত্যাহ্বানৰ সন্মুখীন হ’বলৈ তেওঁলোক সম্পূৰ্ণৰূপে সাজু ।
পুনৰ হ’ব নেকি লকডাউন ?
হৰদীপ পুৰীয়ে কয় যে ভাৰতে বিশ্বৰ অনিশ্চয়তাৰ সন্মুখত স্থিতিস্থাপকতা প্ৰদৰ্শন কৰিছে আৰু সময়োপযোগী, সক্ৰিয় আৰু সমন্বিত পদক্ষেপ গ্ৰহণ কৰি যাব । তেওঁ উল্লেখ কৰে যে লকডাউন সন্দৰ্ভত প্ৰচাৰিত উৰাবাতৰি সম্পূৰ্ণ মিছা । চৰকাৰী পর্যায়ত এনে কোনো প্রস্তাৱ বিবেচনাধীন হোৱা নাই বুলি স্পষ্ট কৰি দিব বিচাৰিছোঁ বুলি উল্লেখ কৰে তেওঁ ৷ কেন্দ্ৰীয় মন্ত্ৰীগৰাকীয়ে জোৰ দি কয় যে এই সময়ত আমাৰ সকলোৰে বাবে শান্ত, দায়িত্বশীল আৰু ঐক্যবদ্ধ হৈ থকাটো অতি গুৰুত্বপূৰ্ণ । এনে পৰিস্থিতিত উৰাবাতৰি প্ৰচাৰ কৰা আৰু অপ্ৰয়োজনীয় ভয়ৰ সৃষ্টি কৰাটো দায়িত্বহীন আৰু ক্ষতিকাৰক ।
ইফালে যোৱা এমাহত আন্তঃৰাষ্ট্ৰীয় খাৰুৱা তেলৰ মূল্য আকাশলংঘী হৈছে, প্ৰতি বেৰেলত প্ৰায় ৭০ ডলাৰৰ পৰা প্ৰায় ১২২ ডলাৰলৈ বৃদ্ধি পাইছে । ফলস্বৰূপে বিশ্বজুৰি গ্ৰাহকৰ বাবে পেট্ৰ’ল আৰু ডিজেলৰ মূল্য বৃদ্ধি পাইছে । তেওঁ ছ’চিয়েল মিডিয়াত উল্লেখ কৰিছে যে দক্ষিণ-পূব এছিয়াত প্ৰায় ৩০%ৰ পৰা ৫০%, উত্তৰ আমেৰিকাত ৩০%, ইউৰোপত ২০%, আৰু আফ্ৰিকাত ৫০% মূল্য বৃদ্ধি পাইছে ।
হৰদীপ পুৰীয়ে কয় যে মোদী চৰকাৰৰ হাতত দুটা বিকল্প আছিল- হয় আন সকলো দেশৰ দৰে নাগৰিকৰ বাবে মূল্য বহু পৰিমাণে বৃদ্ধি কৰা, নহয় নিজৰ বিত্তৰ ওপৰত বোজা বহন কৰা, যাতে সাধাৰণ মানুহ আন্তঃৰাষ্ট্ৰীয় বজাৰৰ অস্থিৰতাৰ পৰা সুৰক্ষিত হয় ।
লগতে পঢ়ক : ইন্ধনক লৈ মোদী চৰকাৰৰ ঐতিহাসিক সিদ্ধান্ত, পেট্ৰ’ল-ডিজেলৰ শুল্কত বৃহৎ কৰ্তন
