গোৱাৰ পৰা ইউৰোপীয় সংঘলৈ : এণ্টনিঅ’ কোষ্টাৰ বিশেষ যাত্ৰা আৰু ভাৰতীয় সংযোগ । ইউৰোপীয় পৰিষদৰ অধ্যক্ষৰ সৈতে গোৱাৰ সম্পৰ্কৰ আঁৰৰ কাহিনী…
ভাৰত-ইউৰোপীয় সংঘৰ বাণিজ্যিক চুক্তি ঘোষণাৰ সময়তে আন এক বিষয়েও তীব্ৰ চৰ্চা লাভ কৰে । ইউৰোপীয় পৰিষদৰ অধ্যক্ষ এণ্টনিঅ’ লুইছ ছান্টোছ দা কোষ্টাই হঠাতে নিজৰ অ’চিআই কাৰ্ড উলিয়াই ভাৰতৰ সৈতে তেওঁৰ ব্যক্তিগত সম্পৰ্কৰ বিষয়ে কোৱাৰ পিছতে এই চৰ্চাই গতি লাভ কৰে । সেই সময়ত মঞ্চত উপস্থিত আছিল প্ৰধানমন্ত্ৰী নৰেন্দ্ৰ মোদী আৰু ইউৰোপীয় আয়োগৰ অধ্যক্ষ উৰ্চুলা ভন ডাৰ লেয়েন । কোষ্টাই গোৱাৰ সৈতে তেওঁৰ পাৰিবাৰিক সম্পৰ্কৰ কথা উল্লেখ কৰি ভাৰত-ইউৰোপৰ ক্ৰমবৰ্ধমান অংশীদাৰিত্বৰ সৈতে ইয়াক সম্পৰ্কিত কৰে ।
এসময়ত পৰ্তুগীজ উপনিবেশিক শাসনত থকা গোৱাত জন্মগ্ৰহণ কৰি ডাঙৰ-দীঘল হৈছিল এণ্টনিঅ’ কোষ্টাৰ পিতৃ । গোৱাই স্বাধীনতা লাভ কৰাৰ পিছত কোষ্টাৰ পিতৃ ১৮ বছৰ বয়সত পৰ্তুগাললৈ গুচি যায় । কোষ্টাই কয় যে সৰুতে তেওঁক “বাবুছ” বুলি মতা হৈছিল, যিটো কংকনী ভাষাৰ জনপ্ৰিয় উপনাম ।
যৌথ সংবাদমেলত কোষ্টাই কয়- “মই ইউৰোপীয় পৰিষদৰ অধ্যক্ষ, কিন্তু মই এজন অভাৰচীজ ইণ্ডিয়ান চিটিজেনো ৷” এই কথা কৈ থাকোঁতেই তেওঁ পকেটৰ পৰা অ’চিআই কাৰ্ডখন উলিয়াই সকলোকে দেখাই । তাৰ পিছত তেওঁ গোৱাৰ সৈতে তেওঁৰ সম্পৰ্কৰ কথা উল্লেখ কৰে, যাৰ বিষয়ে উপস্থিত থকা অধিকাংশ লোকেই অজ্ঞাত আছিল ।
ইয়াৰ পূৰ্বে ২০১৫ চনৰ পৰা ২০২৪ চনলৈ পৰ্তুগালৰ প্ৰধানমন্ত্ৰী হিচাপে কাৰ্যনিৰ্বাহ কৰা “লিছবনৰ গান্ধী” খ্যাত কোষ্টাই কয় যে, “মোৰ বাবে ইয়াৰ বিশেষ অৰ্থ আছে । মোৰ গোৱা শিপাক লৈ মই অতি গৌৰৱান্বিত, য’ৰ পৰা মোৰ পিতৃৰ পৰিয়াল আহিছে । ইউৰোপ আৰু ভাৰতৰ মাজৰ সম্পৰ্কও মোৰ বাবে ব্যক্তিগত ।”
গোৱাৰ সৈতে কি সম্পৰ্ক এণ্টনিঅ’ কোষ্টাৰ ?
এই ভাৰত ভ্ৰমণে কোষ্টাৰ বাবে শৈশৱৰ বহু স্মৃতি কঢ়িয়াই আনে । ইয়াৰ পূৰ্বে ২০১৭ চনত তেওঁ পৰ্তুগালৰ প্ৰধানমন্ত্ৰী হৈ থকা অৱস্থাত ভাৰত ভ্ৰমণ কৰিছিল । সেই সময়ছোৱাত তেওঁ পিতৃ অৰলেণ্ডো কষ্টা নামৰ প্ৰখ্যাত কবি আৰু ঔপন্যাসিকৰ এখন নাটকৰ ইংৰাজী অনুবাদ মুকলিৰ বাবে গোৱালৈ আহে ।
১৯৬১ চনত লিছবনত জন্মগ্ৰহণ কৰা এণ্টনিঅ’ কোষ্টা কৈশোৰ অৱস্থাত পিতৃ-মাতৃৰ সৈতে প্ৰথম গোৱা ভ্ৰমণলৈ গৈছিল । মাৰগাঁওত জন্মগ্ৰহণ কৰা কোষ্টাই জীৱনৰ এছোৱা সময় তাতেই কটায় । কোষ্টাৰ পিতৃ অৰলেণ্ডো কোষ্টা আছিল এজন সুপৰিচিত লেখক, যাৰ ৰচনাত গোৱাক স্পষ্টকৈ প্ৰতিফলিত কৰা হৈছে । ৰবীন্দ্ৰনাথ ঠাকুৰৰ ওপৰতো লিখিছিল তেওঁ ।
২০১৭ চনত গোৱা ভ্ৰমণৰ সময়ত কোষ্টাই কয় যে, “মোৰ পিতৃ লিছবনলৈ গুচি যায়, কিন্তু তেওঁ মনৰ পৰা কেতিয়াও গোৱা এৰি যোৱা নাছিল । তেওঁৰ ৰচনাত গোৱা সদায় আছিল ।”
২০০ বছৰতকৈও অধিক পুৰণি কোষ্টাৰ পূৰ্বপুৰুষৰ ঘৰটো এতিয়াও মাৰগাঁওৰ আবাদে ফাৰিয়া ৰোডত আছে, য’ত তেওঁৰ পৰিয়ালৰ আন সদস্যসকল এতিয়াও বাস কৰে । ২০১৭ চনৰ ভ্ৰমণৰ সময়ত কোষ্টাই ঘৰটো পৰিদৰ্শন কৰি আত্মীয়ক সাক্ষাৎ কৰিছিল । ৬৪ বছৰীয়া এণ্টনিঅ’ কোষ্টাক তেওঁৰ শান্ত আচৰণ আৰু কথোপকথন শৈলীৰ বাবে প্ৰায়ে “লিছবনৰ গান্ধী” বুলি কোৱা হয় ।
লগতে পঢ়ক : শান্তি আৰু নিৰাপত্তা দিয়াত ব্যৰ্থ ৰাষ্ট্ৰসংঘ; বিশ্ব সংস্থাক লৈ ভাৰতৰ বিস্ফোৰক মন্তব্য
