এগজিট পোল আৰু অপিনিয়ন পোল
বিহাৰ বিধানসভা নিৰ্বাচনৰ দ্বিতীয় পৰ্যায়ৰ ভোটদানৰ সামৰণি পৰিল । ইয়াৰ পিছতে এতিয়া প্ৰকাশ পাইছে এগজিট প’ল । যেতিয়াই কোনো ৰাজ্য বা দেশত নিৰ্বাচন অনুষ্ঠিত হয়, ভোটদান শেষ হোৱাৰ পিছতে টিভি চেনেল আৰু ছ’চিয়েল মিডিয়াত আলোচনাৰ একমাত্ৰ বিষয় হ’ল এগজিট পোল । মানুহে নিজৰ টেলিভিছনৰ সন্মুখত বহি বা মোবাইলত নিৰ্বাচনত ফলাফল কাৰ পক্ষে যাব সেই কথা জানিবলৈ আগ্ৰহী হৈ পৰে ।
যদিও প্ৰকৃত ফলাফল ভোট গণনাৰ দিনটোতহে জনা যায়, তথাপিও এগজিট পোলক লৈ উত্তেজনা সদায় ৰৈ যায় । কিন্তু আপুনি কেতিয়াবা ভাবিছেনে যে এগজিট প’ল আচলতে কি ? ই অ’পিনিয়ন প’লৰ পৰা কেনেকৈ পৃথক ? দুয়োৰে বাবে নিৰ্বাচন আয়োগৰ কি নিয়ম আছে ?
এগজিট পোল কি ?
এগজিট প’ল হৈছে এনে এক প্ৰক্ৰিয়া য’ত ভোটদান কেন্দ্ৰৰ পৰা ওলাই অহা লোকসকলক কোনটো দল বা প্ৰাৰ্থীক ভোট দিছিল বুলি সোধা হয় । এই উত্তৰবোৰৰ ভিত্তিত কোন জয়ী হ’ব পাৰে আৰু কোন পৰাস্ত হ’ব পাৰে সেই বিষয়ে এটা অনুমান কৰা হয় । এয়া কেৱল এটা অনুমানহে, চূড়ান্ত ফলাফল নহয় । এই অনুমান কেতিয়াবা শুদ্ধ হ’ব পাৰে আৰু কেতিয়াবা সম্পূৰ্ণ ভুল হ’ব পাৰে । টিভি চেনেল, ব্যক্তিগত জৰীপ সংস্থা বা গৱেষণা গোটে এই সমীক্ষা চলায় । অৰ্থাৎ এয়া প্ৰকৃত ফলাফল ঘোষণা কৰাৰ আগতে অনুমানৰ ওপৰত ভিত্তি কৰি কৰা এটা প্ৰিভিউ ।
অ’পিনিয়ন পোল কি ?
নিৰ্বাচনৰ পূৰ্বে এটা অ’পিনিয়ন প’ল কৰা হয় । নিৰ্বাচন হোৱাৰ ঠিক পূৰ্বে ভোটাৰক সোধা হয় যে আগন্তুক নিৰ্বাচনত কোনটো দল বা প্ৰাৰ্থীক সমৰ্থন কৰিব । ভোটদানৰ আগৰ মনোভাৱ, পৰিৱেশ, আলোচনাৰ ওপৰত ভিত্তি কৰি এই সমীক্ষা কৰা হয় । অৰ্থাৎ ই মানুহৰ চিন্তাধাৰাক প্ৰতিফলিত কৰে, আনহাতে এগজিট প’লে ভোটাৰৰ পছন্দক প্ৰতিফলিত কৰে ।
লগতে পঢ়ক : বিহাৰত এন ডি এৰ ক্লীন ছুইপৰ ভৱিষ্যদ্বাণী; মহাজোঁটৰ বাবে হতাশা কঢিয়ালে এক্সিট প’লে
