বলিউডৰ অভিনেত্ৰী ভূমি পেডনেকাৰে অসমৰ বান পৰিস্থিতিক লৈ সমগ্ৰ দেশবাসীক সহায়ৰ বাবে আহ্বান জনাইছে।
বলিউডৰ অভিনেত্ৰী ভূমি পেডনেকাৰে সমগ্ৰ দেশবাসীক আগবাঢ়ি আহি অসমৰ ভয়াবহ বানপানীত প্ৰভাৱিত লোকসকলক সহায় কৰিবলৈ আহ্বান জনাইছে।
অসমৰ পৰিস্থিতি সংকটজনক হৈয়েই আছিল, য’ত ১১ খন জিলাৰ ৭.২১ লাখতকৈও অধিক লোক প্ৰভাৱিত হৈছে। জানিব পৰা মতে, এতিয়াও ৫ খন মুখ্য নদী বিপদ সীমাৰ ওপৰেৰে বৈ আছে।
দুৰ্যোগৰ ভয়াৱহতা স্পষ্ট কৰি ভূমি পেডনেকাৰে ইনষ্টাগ্ৰামৰ এটা ভিডিঅ’ত কয় যে লাখ লাখ লোক গৃহহীন হৈ পৰিছে, কেইবাজনো লোকে প্ৰাণ হেৰুৱাইছে আৰু সমগ্ৰ গাঁও উটি গৈছে। ভিডিঅ’টোত তেওঁ কয়: “নমস্কাৰ, দেশত যি ঘটি আছে, সেই বিষয়ে আমি সকলোৱে জানো। আৰু মই সেই উৎসাহক ছেলুট জনাওঁ। কিন্তু দেশৰ এনে এটা অংশ আছে য’ত আমাৰ বহুত প্ৰয়োজন, সেয়া হৈছে অসম। অসমত বহুত ভয়ংকৰ বানপানী হৈছে। পৰিস্থিতি ইমানেই বেয়া যে ৭.৫ লাখ লোকক সুৰক্ষিত স্থানলৈ স্থানান্তৰ কৰা হৈছে। ৪০ জনতকৈও অধিক লোকৰ মৃত্যু হৈছে আৰু মৃত্যুৰ সংখ্যা বৃদ্ধি পাই আছে।”
তেওঁ লগতে কয় “গোটেই গাঁওবোৰ উটি গৈছে, জীৱ-জন্তুবোৰ উটি গৈছে। তেওঁলোকৰ হাতত যি আছিল, সকলো শেষ হৈ গৈছে। এই বিষয়ে বেছি মানুহে কথা পতা নাই, কিন্তু মোৰ সম্পূৰ্ণ বিশ্বাস আছে। যোৱা বছৰৰ দৰে পঞ্জাৱ, জম্মু, বিহাৰ, মহাৰাষ্ট্ৰ সমগ্ৰ দেশ থিয় হৈছিল আৰু আমি সম্প্ৰীতি আৰু জনসেৱাৰ নিদৰ্শন দেখুৱাইছিলো। আপোনালোকে বহু সামগ্ৰী পঠিয়াইছিল, দান কৰিছিল, সেই সময় আকৌ আহি পৰিছে। আৰু এইবাৰ অসমক আমাৰ প্ৰয়োজন।”
ভূমিয়ে সকলোকে খাদ্য, কাপোৰ, অনাময় পৰিষ্কাৰ-পৰিচ্ছন্নতা (sanitation) আৰু উদ্ধাৰ কাৰ্যৰ দৰে যোগানৰ বাবে অনুদান দি সহায় কৰিবলৈ অনুৰোধ জনায়।
“যদি আপুনি দৃশ্যবোৰ চায়, আপোনাৰ হৃদয় ভাঙি যাব। ই সঁচাকৈয়ে অতি হৃদয়বিদাৰক আৰু অসমক সঁচাকৈয়ে আমাৰ সমৰ্থনৰ প্ৰয়োজন। মই সকলোকে যিমান পাৰি দান কৰিবলৈ অনুৰোধ জনাইছো। আৰু এই বাৰ্তা অলপ বিয়পাই দিয়ক, যাতে আমাৰ সহায় অসমৰ মানুহৰ ওচৰ পায়গৈ। জয় হিন্দ”।
অভিনেত্ৰীগৰাকীয়ে ভিডিঅ’টোৰ কেপচনত লিখিছে: “অসম বুৰ গৈছে, আপোনালোকে প্ৰতিবাৰেই থিয় দিছে, এইবাৰো তেওঁলোকৰ বাবে থিয় হওক #assam #floods।”
লগতে পঢ়ক :ছাত্ৰ-ছাত্ৰীৰ প্ৰতিবাদৰ বাবে চনু নিগমে পিছুৱালে সংগীতানুষ্ঠান
