নিজকে বিজেপি নেতা বুলি দম্ভালি মৰা অভিলাষ দত্ত আৰক্ষীৰ জালত
গুৱাহাটী মহানগৰীৰ বুকুত শেহতীয়াকৈ সংঘটিত এক পথ সংঘাতজনিত প্ৰহাৰৰ ঘটনাই সমগ্ৰ ৰাজ্যতে তীব্ৰ চাঞ্চল্যৰ সৃষ্টি কৰিছে । এই ঘটনাৰ সন্দৰ্ভত মুখ্যমন্ত্ৰী ড° হিমন্ত বিশ্ব শৰ্মাই মঙলবাৰে এক গুৰুত্বপূৰ্ণ স্পষ্টীকৰণ দিছে । মুখ্যমন্ত্ৰীগৰাকীয়ে জনোৱা মতে, ঘটনাৰ মূল অভিযুক্তক ইতিমধ্যে আৰক্ষীয়ে গ্ৰেপ্তাৰ কৰিছে আৰু তেওঁৰ ভাৰতীয় জনতা পাৰ্টি (BJP)ৰ সৈতে কোনো ধৰণৰ সম্পৰ্ক নাই ।
সোমবাৰে নিশা লতাশিল আৰক্ষীয়ে এই ঘটনাৰ সৈতে জড়িত থকাৰ অভিযোগত অভিলাষ দত্ত আৰু মিৰিন তালুকদাৰ নামৰ দুই যুৱকক গ্ৰেপ্তাৰ কৰিছিল ।
মুখ্যমন্ত্ৰীৰ কঠোৰ সকীয়নি-
ঘটনাটো ছ’চিয়েল মিডিয়াত ভাইৰেল হোৱাৰ পিছতে মুখ্যমন্ত্ৰী ড০ হিমন্ত বিশ্ব শৰ্মাই এক্স হেণ্ডেলত পোষ্ট কৰি কঠোৰ সকিয়নী প্ৰদান কৰে । তেওঁ লিখে:
“অভিযুক্তক গ্ৰেপ্তাৰ কৰা হৈছে আৰু তেওঁ বিজেপিৰ সৈতে জড়িত নহয় । অসমত পথ সংঘাতৰ কোনো স্থান নাই । যিয়েই এনে কাৰ্যত লিপ্ত হ’ব, তেওঁ আইনৰ সম্পূৰ্ণ পৰিণতি ভোগ কৰিব লাগিব ।”
কি আছিল সমগ্ৰ ঘটনা ?
ঘটনাৰ বিৱৰণি অনুসৰি, গুৱাহাটীৰ মহাৰাজ পৃথু উৰণ সেতুৰ ওপৰত এখন বাহন অভাৰটেক কৰাক লৈ এই সংঘাতৰ সূত্ৰপাত হৈছিল । শিলচৰৰ এজন ১৯ বছৰীয়া যুৱকে অভিলাষ দত্তৰ বাহনখন অভাৰটেক কৰাৰ পিছতে তেওঁলোকৰ মাজত তীব্ৰ বাকবিতণ্ডা হয় ।
অভিযোগ অনুসৰি, ইয়াৰ পিছতে অভিলাষ দত্ত আৰু তেওঁৰ সতীৰ্থসকলে গাড়ীৰ পৰা নামি যুৱকজনক শাৰীৰিকভাৱে প্ৰহাৰ কৰে । এই সমগ্ৰ ঘটনাৰ এটা ভিডিঅ’ ছ’চিয়েল মিডিয়াত ব্যাপকভাৱে ভাইৰেল হৈ পৰিছিল, যাৰ পিছতে জনসাধাৰণৰ মাজত ক্ষোভৰ সৃষ্টি হয় ।
ভুক্তভোগীক প্ৰাণৰ ভাবুকিৰ অভিযোগ
ভুক্তভোগী যুৱকজনে লতাশিল আৰক্ষী থানাত এক এজাহাৰ ৰুজু কৰে । ভুক্তভোগী যুৱকজনে অভিযোগ কৰা মতে, এজাহাৰ দাখিল কৰাৰ পিছত তেওঁক আইনী পদক্ষেপৰ পৰা বিৰত ৰাখিবলৈ অভিযুক্তৰ ফালৰ পৰা প্ৰাণৰ ভাবুকিও প্ৰদান কৰা হৈছিল ।
বিজেপিৰ নাম লৈ প্ৰভাৱ খটুৱাৰ চেষ্টা!
প্ৰথম অৱস্থাত মূল অভিযুক্ত অভিলাষ দত্তক একাংশই বিজেপিৰ যুৱ মৰ্চাৰ নেতা বুলি সামাজিক মাধ্যমত প্ৰচাৰ কৰিছিল । অভিযোগ উঠিছিল যে অভিলাষ দত্তই নিজকে এজন বিজেপি বিধায়কৰ ঘনিষ্ঠ বুলি পৰিচয় দি সমাজত নিজৰ প্ৰভাৱ বিস্তাৰ কৰিবলৈ চেষ্টা কৰিছিল । কিন্তু মুখ্যমন্ত্ৰী শৰ্মাৰ স্পষ্টীকৰণে এতিয়া এই বিতৰ্কৰ অৱসান ঘটাইছে ।
আৰক্ষীয়ে ইতিমধ্যে ঘটনাৰ সৈতে জড়িত তিনিজন ব্যক্তিক চিনাক্ত কৰিছে অভিলাষ দত্ত (চানমাৰি, ৰেড ক্ৰছ অঞ্চল), মিৰিন তালুকদাৰ (চানমাৰি), অপূৰ্ব সিনহা (নুনমাটি) ।
লগতে পঢ়ক : ‘সংবিধান সংশোধন কৰি হলেও অসমীয়া ভাষাক ৰক্ষা কৰা হ’ব’; মুখ্যমন্ত্ৰীৰ স্পষ্ট হুংকাৰ
