ব্ৰাজিলৰ কিংবদন্তি ফুটবলাৰ নেইমাৰৰ পিছত ক্রিষ্টিয়ানো ৰোনাল্ডোও অৱসৰৰ বাবে সাজু হৈছে৷ স্পেইনৰ বিৰুদ্ধে প্ৰি-কোৱাৰ্টাৰ ফাইনেল খেলখনৰ পূৰ্বে অনুষ্ঠিত সংবাদমেলত পৰ্তুগালৰ ৰোনাল্ডোৱে পুনৰ কয় যে এয়া তেওঁৰ কেৰিয়াৰৰ অন্তিমখন বিশ্বকাপ।
কিংবদন্তি পৰ্তুগীজ ফুটবলাৰ ক্রিষ্টিয়ানো ৰোনাল্ডোৱে পুনৰবাৰ স্পষ্ট কৰি দিছে যে এইখনেই তেওঁৰ কেৰিয়াৰৰ ষষ্ঠ আৰু অন্তিমখন ফিফা বিশ্বকাপ হ’ব৷ সংবাদমেলৰ সময়ত ৰোনাল্ডোৱে এই মন্তব্য কৰে। তেওঁ সাংবাদিকসকলৰ সৈতে নিজৰ বৈশিষ্ট্যপূৰ্ণ হাস্যৰসময়ী শৈলীত মত বিনিময় কৰিছিল। স্পেইনৰ বিৰুদ্ধে প্ৰি-কোৱাৰ্টাৰ ফাইনেল খেলখনৰ প্ৰাকক্ষণত ৪১ বছৰীয়া খেলুৱৈগৰাকীয়ে পূৰ্বে ইংগিত দিয়া কথা পুনৰবাৰ উল্লেখ কৰে।
হাঁহি হাঁহি তেওঁ ক’য়, “মোৰ আটাইতকৈ ডাঙৰ সম্পদ হৈছে মানুহবোৰৰ মৰম আৰু তেওঁলোকৰ লগত জড়িত স্মৃতি। হোটেলৰ কৰ্মচাৰী আৰু লেটিন আমেৰিকাৰ মানুহৰ সৈতে কটোৱা মুহূৰ্তবোৰ মোৰ আটাইতকৈ ভাল লগা স্মৃতিৰ ভিতৰত। কালি বিমান যাত্ৰাৰ সময়ত আৰ্জেণ্টিনাৰ এগৰাকী এয়াৰ হোষ্টেছক লগ পাইছিলো। তেওঁ মোৰ ফালে চোৱাৰ ধৰণটোতেই মই জানিব পাৰিছিলো যে তেওঁ আৰ্জেণ্টিনাৰ আছিল। মই তেওঁক কৈছিলো, ‘আপুনি মোক যি ধৰণেৰে চাই আছে, সেইটোতে মই গম পাইছো যে আপুনি আৰ্জেণ্টিনাৰ। মোক দেখা পাই যদি কোনোবাই লগে লগে চকু আঁতৰাই চায়, তেন্তে মই বুজি পাওঁ যে তেওঁলোকে ক্রিষ্টিয়ানোক ভাল নাপায়।”
মানচেষ্টাৰ ইউনাইটেড আৰু ৰিয়েল মাদ্রিদৰ প্রাক্তন তাৰকাগৰাকীয়ে কয় যে, “মই মোৰ শেষৰ বিশ্বকাপৰ প্ৰতিটো মুহূৰ্ত সম্পূৰ্ণৰূপে উপভোগ কৰিব বিচাৰো। আশাকৰোঁ, কাইলৈ মোৰ চূড়ান্ত মেচ নহ’ব, যাতে আপোনালোক সকলোৱে মোক আৰু কেইদিনমান সমালোচনা কৰি থাকিব পাৰে।” ১৪৬টা গ’ল দি আন্তঃৰাষ্ট্ৰীয় ফুটবলৰ সৰ্বকালৰ আগশাৰীৰ গ’লদাতা ৰোনাল্ডোৱে ইয়াৰ পূৰ্বেও ইয়াৰ ইংগিত দিছিল।
তেওঁ আৰু কয়, “মোৰ জীৱনত একোৱেই অভাৱ নাই। ঈশ্বৰে মোৰ প্ৰতি অত্যন্ত উদাৰতা প্ৰদৰ্শন কৰিছে। মই কেতিয়াও কল্পনা কৰিব নোৱাৰা সকলোখিনি তেওঁ মোক দিলে,বিশেষকৈ জাতীয় দলৰ সৈতে। মোৰ ব্যক্তিগত জীৱনতো সকলোখিনি পাইছো। সেইবাবেই মই এতিয়া প্ৰতিটো মুহূৰ্ত উপভোগ কৰিব বিচাৰো। মই বিশ্বকাপ জয়ী হওঁ বা নকৰোঁ, মই না ‘ডাঙৰ’ ক্রিষ্টিয়ানো হ’ম না ‘সৰু’ ।”
লগতে পঢ়ক: ফিফা বিশ্বকাপৰ কোৱাৰ্টাৰ ফাইনেলত প্ৰৱেশ ইংলেণ্ডৰ;১০ গৰাকী খেলুৱৈৰ দুৰ্দান্ত প্ৰদৰ্শন
