ইয়াৰ সৈতে আন্তঃৰাষ্ট্ৰীয় চোৰাং সৰবৰাহকাৰী চক্ৰৰ সম্পৰ্ক থকাৰ সন্দেহ প্ৰকাশ কৰিছে আৰক্ষীয়ে
অসম আৰক্ষীৰ অভূতপূৰ্ব সফলতা । গুৱাহাটী মহানগৰীৰ খাৰঘূলি অঞ্চলত মহানগৰ আৰক্ষীয়ে এক বৃহৎ অভিযান চলাই জব্দ কৰিছে প্ৰায় ৫৪ কোটি টকাতকৈও অধিক মূল্যৰ সন্দেহযুক্ত সোণ । উদ্ধাৰ হোৱা এই হালধীয়া ধাতুৰ ওজন প্ৰায় ৩৭.০৬৪ কিলোগ্ৰাম । ইয়াৰ সৈতে আন্তঃৰাষ্ট্ৰীয় চোৰাং সৰবৰাহকাৰী চক্ৰৰ সম্পৰ্ক থকাৰ সন্দেহ প্ৰকাশ কৰিছে আৰক্ষীয়ে ।
লতাশিল আৰক্ষী আৰু SOG-ৰ যুটীয়া অভিযান
২৯ আৰু ৩০ জুনৰ নিশাটোৰ ভিতৰত গুৱাহাটী আৰক্ষী আয়ুক্তালয়ৰ বিশেষ অভিযান গোট (SOG)-ৰ পৰা লাভ কৰা এক গোপন আৰু নিৰ্ভৰযোগ্য চোৰাংচোৱা তথ্যৰ ভিত্তিত লতাশিল আৰক্ষী থানাই খাৰঘূলি অঞ্চলত এই অতৰ্কিত অভিযান চলাইছিল । অভিযানকালত আৰক্ষীয়ে ৩৭.০৬৪ কেজি সন্দেহযুক্ত সোণৰ উপৰিও ১৩ গ্ৰাম ৰূপৰ টুকুৰা/দানাও জব্দ কৰিবলৈ সক্ষম হয় ।
মহাৰাষ্ট্ৰৰ সৰবৰাহকাৰী গ্ৰেপ্তাৰ
এই ঘটনাৰ সৈতে জড়িত থকাৰ অভিযোগত আৰক্ষীয়ে অক্ষয় বানচোডে (৩২) নামৰ এজন ব্যক্তিক গ্ৰেপ্তাৰ কৰিছে । ধৃত যুৱকজন মহাৰাষ্ট্ৰৰ চাংলী জিলাৰ বাসিন্দা যদিও বৰ্তমান তেওঁ গুৱাহাটীৰ গান্ধীবস্তিত আত্মগোপন কৰি আছিল । এই সন্দৰ্ভত লতাশিল আৰক্ষী থানাত ৪২/২০২৬ নম্বৰত এক গোচৰ ৰুজু কৰা হৈছে ।
অভিযুক্তই নিজৰ শাৰীৰিক প্ৰত্যাহ্বানৰ সুযোগ লৈ এখন কম্বলৰ তলত সোণখিনি লুকুৱাই সৰবৰাহ কৰাৰ চেষ্টা চলাইছিল, যাতে কাৰো সন্দেহ নহয় বুলি আৰক্ষীৰ সূত্ৰত প্ৰকাশ ।
নগদ ধন আৰু ম’বাইল জব্দ
অভিযানকাৰী দলে অভিযুক্তৰ জিম্মাৰ পৰা সোণ-ৰূপৰ উপৰিও ৪ টা ম’বাইল ফোন, নগদ ৩,৭৫৫ টকা আৰু সোণৰ বিস্কুটসমূহ লুকুৱাই ৰাখিবলৈ ব্যৱহাৰ কৰা বেগসমূহো জব্দ কৰে । ধৃত অক্ষয় বানচোডে জব্দ কৰা এই বিশাল পৰিমাণৰ সামগ্ৰীখিনিৰ কোনো বৈধ আইনী নথি-পত্ৰ আৰক্ষীৰ সন্মুখত দাখিল কৰিব নোৱাৰিলে ।
আন্তঃৰাষ্ট্ৰীয় চোৰাং চক্ৰৰ সংযোগ
গুৱাহাটী আৰক্ষীৰ প্ৰাথমিক তদন্তৰ পৰা জানিব পৰা মতে, এই বৃহৎ সোণ সৰবৰাহৰ সৈতে এটা আন্তঃৰাষ্ট্ৰীয় নেটৱৰ্ক জড়িত হৈ আছে । এই চক্ৰটোৰ শিপা মধ্যপ্ৰাচ্য আৰু ম্যানমাৰলৈকে বিস্তৃত থকাৰ লগতে ভাৰতৰ ভিতৰত মুম্বাই, দিল্লী, কলকাতা আৰু বেংগালুৰুৰ দৰে মহানগৰীত ইয়াৰ সক্ৰিয় লিংক আছে । জানিব পৰা মতে, অভিযুক্তজনে ইয়াৰ পূৰ্বেও প্ৰায় ২০ কেজি সোণ সৰবৰাহ কৰিছিল । বৰ্তমান আৰক্ষীয়ে অভিযুক্তক জিম্মাত লৈ এই চক্ৰটোৰ মূল মাষ্টাৰমাইণ্ড আৰু বিত্তীয় লেনদেনৰ সন্দৰ্ভত গভীৰ তদন্ত অব্যাহত ৰাখিছে ।
লগতে পঢ়ক : গুৱাহাটী বিমানবন্দৰত অসমীয়া ভাষা বৰ্জনৰ অভিযোগ: ৩ প্ৰাক্তন আমোলাৰ পত্ৰ
