কাৰ্গিল যুদ্ধৰ মহান শ্বহীদ কেপ্টেন জিন্তু গগৈৰ মৃত্যু বাৰ্ষিকীত মুখ্যমন্ত্ৰীৰ স্মৰণ । দেশপ্ৰেম আৰু সাহসৰ অনন্য প্ৰতীক বুলি বৰ্ণনা ।
মুখ্যমন্ত্ৰী ড° হিমন্ত বিশ্ব শৰ্মাই আজি কাৰ্গিল যুদ্ধৰ মহান বীৰ তথা অসম সন্তান কেপ্টেন জিন্তু গগৈৰ মৃত্যু বাৰ্ষিকীত তেওঁৰ সৰ্বোচ্চ ত্যাগ আৰু অতুলনীয় বিক্ৰমক গভীৰভাৱে স্মৰণ কৰে । ১৯৯৯ চনৰ কাৰ্গিল যুদ্ধৰ সময়ত দেশৰ বাবে প্ৰাণ আহুতি দিয়া এইগৰাকী অসমীয়া জোৱানক সমগ্ৰ ৰাজ্যবাসীৰ হৈ মুখ্যমন্ত্ৰীয়ে শ্ৰদ্ধাঞ্জলি জ্ঞাপন কৰে ।
ছচিয়েল মিডিয়া প্লেটফৰ্ম ‘এক্স’ (X)-ত কৰা এটা আৱেগিক পোষ্টত মুখ্যমন্ত্ৰী ড০ শৰ্মাই এইগৰাকী সুসজ্জিত সেনা বিষয়াক সাহস, কৰ্তব্য আৰু দেশপ্ৰেমৰ এক চিৰস্থায়ী প্ৰতীক হিচাপে বৰ্ণনা কৰে । মুখ্যমন্ত্ৰীগৰাকীয়ে লিখে-
“শ্বহীদ কেপ্টেন জিন্তু গগৈ (বীৰ চক্ৰ) দেৱৰ শ্বহীদ দিৱসত মোৰ গভীৰ শ্ৰদ্ধাঞ্জলি । মা ভাৰতীৰ প্ৰতি তেওঁৰ অটল ভক্তি আৰু কাৰ্গিল যুদ্ধৰ সময়ত তেওঁৰ সৰ্বোচ্চ ত্যাগে সাহস, কৰ্তব্য আৰু দেশপ্ৰেমৰ সৰ্বোচ্চ আদৰ্শক প্ৰতিফলিত কৰে । তেওঁৰ এই উত্তৰাধিকাৰে প্ৰজন্মৰ পিছত প্ৰজন্মক অনুপ্ৰাণিত কৰি যাব ।”
কোন আছিল কেপ্টেন জিন্তু গগৈ?
গোলাঘাট জিলাৰ নিবাসী কেপ্টেন জিন্তু গগৈ আছিল ভাৰতীয় সেনাৰ এজন অত্যন্ত সাহসী বিষয়া । ১৯৯৯ চনৰ কাৰ্গিল যুদ্ধৰ বিখ্যাত ‘অপাৰেচন বিজয়’-ৰ সময়ত তেওঁ দেখুওৱা অভূতপূৰ্ব বীৰত্বৰ বাবে তেওঁক মৰণোত্তৰভাৱে দেশৰ অন্যতম সৰ্বোচ্চ সামৰিক সন্মান ‘বীৰ চক্ৰ’-ৰে সন্মানিত কৰা হৈছিল ।
লগতে পঢ়ক : প্ৰকৃতিৰ চমৎকাৰ!পশ্চিম কাৰ্বি আংলঙত প্ৰত্যক্ষ হ’ল বিপন্ন প্ৰজাতিৰ ঘৰিয়াল
