ভূমিকম্পৰ কেন্দ্ৰবিন্দু ভূ-পৃষ্ঠৰ পৰা প্ৰায় ২১৫ কিলোমিটাৰ গভীৰতাত আছিল
শনিবাৰে সন্ধিয়া ৬ বাজি ৪ মিনিটত আফগানিস্তানৰ হিন্দুকুশ অঞ্চলত ৬.২ প্ৰাবল্যৰ এক শক্তিশালী ভূমিকম্পই কঁপাই যায় । নেচনেল চেণ্টাৰ ফৰ চেইজমোলজীৰ মতে, ভূমিকম্পটোৰ কেন্দ্ৰবিন্দু আছিল উত্তৰ-পূব আফগানিস্তানৰ কালাফগানৰ পৰা প্ৰায় ৮১ কিলোমিটাৰ দূৰত । ভূমিকম্পৰ কেন্দ্ৰবিন্দু ভূ-পৃষ্ঠৰ পৰা প্ৰায় ২১৫ কিলোমিটাৰ গভীৰতাত আছিল । ভূ-পৃষ্ঠৰ পৰা অতি গভীৰতাত হোৱাৰ বাবে ইয়াৰ জোঁকাৰণি পাকিস্তান, উত্তৰ ভাৰত, চীন, তাজিকিস্তান, উজবেকিস্তান, কিৰ্গিস্তান আৰু তুৰ্কমেনিস্তানকে ধৰি কেইবাখনো দেশত অনুভূত হয় ।
দিল্লী-এনচিআৰতো প্ৰভাৱ
দিল্লী-এনচিআৰতো কেইছেকেণ্ডমানৰ বাবে এই ভূমিকম্পৰ জোঁকাৰণি অনুবূত হয় । এই ভূমিকম্পত বৰ্তমানলৈকে কোনো ধৰণৰ প্ৰাণহানি বা সা-সম্পত্তিৰ ক্ষয়-ক্ষতিৰ খবৰ পোৱা হোৱা নাই । বিশেষজ্ঞসকলৰ মতে, ভূ-পৃষ্ঠৰ পৰা অধিক গভীৰতাত হোৱা ভূমিকম্পৰ জোঁকাৰণি বহল অঞ্চলত অনুভূত হয়, কিন্তু পৃষ্ঠত ক্ষতি হোৱাৰ সম্ভাৱনা তুলনামূলকভাৱে কম থাকে । আফগানিস্তানৰ হিন্দুকুশ অঞ্চল ভূমিকম্পৰ দিশৰ পৰা অতি সংবেদনশীল । ভাৰতীয় আৰু ইউৰেশীয় টেকটোনিক প্লেটৰ সংঘৰ্ষৰ বাবে ইয়াত প্ৰায়ে তীব্ৰ ভূমিকম্প সংঘটিত হয় ।
জম্মু-কাশ্মীৰতো অনুভূত-
জম্মু-কাশ্মীৰতো ভূমিকম্পৰ তীব্ৰ জোঁকাৰণি অনুভূত হয় । এই কম্পনৰ ফলত জনসাধাৰণ আতংকিত হৈ ঘৰ আৰু কাৰ্যালয়ৰ পৰা ওলাই আহি ৰাজপথ আৰু মুকলি ঠাইত আশ্ৰয় লয় । জম্মু-কাশ্মীৰো ভূমিকম্পৰ দিশৰ পৰা অতি সংবেদনশীল আৰু ইয়াত সময়ে সময়ে পাতলৰ পৰা মজলীয়া প্ৰাবল্যৰ ভূমিকম্প অনুভূত হয় ।
লগতে পঢ়ক : অৰুণাচলত প্ৰলয়ংকাৰী বান; অসম চৰকাৰৰ হাই এলাৰ্ট জাৰি
