ভেনিজুৱেলাৰ ভয়াৱহ ভূমিকম্পত প্ৰধানমন্ত্ৰী মোদীৰ গভীৰ শোক প্ৰকাশ । ভাৰতৰ সহায়ৰ হাত আগবঢ়োৱাৰ প্ৰতিশ্ৰুতি ।
ভেনিজুৱেলাৰ ৰাজধানী কাৰাকাছত সংঘটিত হোৱা এক ভয়াৱহ ভূমিকম্পৰ ফলত হোৱা ক্ষয়-ক্ষতিৰ বাবে গভীৰ শোক প্ৰকাশ কৰিছে ভাৰতৰ প্ৰধানমন্ত্ৰী নৰেন্দ্ৰ মোদীয়ে । ছচিয়েল মিডিয়া প্লেটফৰ্ম এক্স-ত কৰা এটা পোষ্টৰ জৰিয়তে প্ৰধানমন্ত্ৰীগৰাকীয়ে দেশখনৰ জনসাধাৰণক এই শোকৰ মূহুৰ্তত সমবেদনা জ্ঞাপন কৰাৰ লগতে এই সংকটৰ সময়ত ভাৰতে সম্ভৱপৰ সকলো ধৰণৰ সহায় আগবঢ়াবলৈ সাজু থকা বুলি ঘোষণা কৰে ।
এক্স-ত কৰা পোষ্টটোত প্ৰধানমন্ত্ৰী মোদীয়ে কয় :
“ভেনিজুৱেলাত হোৱা ভয়াৱহ ভূমিকম্পৰ ফলত হোৱা ধ্বংসলীলাত মই গভীৰভাৱে মৰ্মাহত হৈছোঁ । ভাৰতৰ জনসাধাৰণৰ হৈ মই ভেনিজুৱেলা চৰকাৰ আৰু তাত থকা লোকসকলৰ প্ৰতি, বিশেষকৈ আপোনজনক হেৰুওৱা পৰিয়ালসমূহলৈ আন্তৰিক সমবেদনা জ্ঞাপন কৰিছোঁ ।”
প্ৰধানমন্ত্ৰীগৰাকীয়ে লগতে ভূমিকম্পত আহত হোৱা সকলোৰে আশু আৰোগ্যৰ বাবে প্ৰাৰ্থনা জনায় আৰু এই কঠিন সময়ত ভাৰত সদায় ভেনিজুৱেলাৰ কাষত থিয় দিয়াৰ বাৰ্তা প্ৰেৰণ কৰে ।
এক মিনিটৰ ভিতৰত দুটাকৈ শক্তিশালী জোকাৰণি
ইউনাইটেড ষ্টেটছ জিঅ’লজিকেল ছাৰ্ভে-ৰ তথ্য অনুসৰি, বুধবাৰে সন্ধিয়া ভেনিজুৱেলাৰ ৰাজধানী কাৰাকাছৰ ওচৰৰ অঞ্চলত দুটাকৈ শক্তিশালী ভূমিকম্পই জোকাৰি যায় । প্ৰথমটো ভূমিকম্পৰ প্ৰাবল্য ৰিখটাৰ স্কেলত ৭.২ আছিল, যাৰ অভিকেন্দ্ৰ আছিল কাৰাকাছৰ পৰা প্ৰায় ২৮৪ কিলোমিটাৰ পশ্চিমে অৱস্থিত ছান ফেলিপেৰ ওচৰত । ইয়াৰ ঠিক পিছতে ১ মিনিটৰ ভিতৰতে ৭.৫ প্ৰাবল্যৰ দ্বিতীয়টো ভূমিকম্পই সমগ্ৰ অঞ্চলটো কপাই তোলে । এই প্ৰবল জোকাৰণিৰ ফলত ৰাজধানী চহৰখনৰ বহু অট্টালিকা ধ্বংস্তূপত পৰিণত হয় ।
এই প্ৰলয়ংকৰী ভূমিকম্পত মৃতকৰ সংখ্যা ১০ হাজাৰৰ পৰা ১ লাখলৈ বৃদ্ধি পাব পাৰে বুলি অনুমান কৰা হৈছে ।
লগতে পঢ়ক : দুটাকৈ প্ৰলয়ংকৰী ভূমিকম্পৰ জোকাৰণি : ধ্বংসস্তূপৰ তলত হাজাৰ হাজাৰ জীৱন
