চলিত ফুটবল বিশ্বকাপত নেইমাৰক সোনকালেই খেলপথাৰত দেখিবলৈ পোৱাৰ ব্ৰাজিলিয়ান অনুৰাগীৰ আশাত চেঁচা পানী পৰিছে
ফিফা বিশ্বকাপত নেইমাৰক সোনকালেই খেলপথাৰত দেখিবলৈ পোৱাৰ ব্ৰাজিলিয়ান অনুৰাগীৰ আশাত চেঁচা পানী পৰিছে । সোমবাৰে ৩৪ বছৰীয়া অভিজ্ঞ ফৰৱাৰ্ডগৰাকীৰ সোঁ ভৰিৰ আঘাতৰ বাবে নতুনকৈ কেইটামান পৰীক্ষা সম্পন্ন কৰা হয় । ইয়াৰ পিছৰে পৰা তেওঁৰ দীৰ্ঘ প্ৰত্যাশিত বিশ্বকাপ অভিষেকক লৈ সন্দেহ আৰু অধিক ঘনীভূত হৈ পৰিছে ।
আমেৰিকাৰ নিউ জাৰ্চীৰ মৰিচটাউনত ব্ৰাজিলৰ প্ৰস্তুতি শিবিৰ আৰম্ভ হোৱাৰে পৰা দলৰ বাহিৰত থকা চেণ্টোচৰ তাৰকাগৰাকীয়ে পুনৰ খেলপথাৰৰ প্ৰশিক্ষণত যোগ দিব বুলি এক আশাৰ সঞ্চাৰ হৈছিল । কিন্তু তাৰ পৰিৱৰ্তে তেওঁ অতিৰিক্ত পৰীক্ষাৰ বাবে এটা ক্লিনিকলৈ যাবলগীয়া হয় । ব্ৰাজিলিয়ান ফুটবল কনফেডাৰেচনে এতিয়ালৈকে এই পৰীক্ষাৰ ফলাফল ৰাজহুৱা কৰা নাই । এই ঘটনাই নেইমাৰে সমগ্ৰ গ্ৰুপ পৰ্যায়ৰ মেচসমূহ হেৰুৱাব পাৰে বুলি আশংকা তীব্ৰতৰ কৰি তুলিছে ।
নকআউট পৰ্যায়ক লক্ষ্য হিচাপে লৈছে ব্ৰাজিলে
ব্ৰাজিলৰ সংবাদ মাধ্যমৰ প্ৰতিবেদন অনুসৰি, যোৱা ১৭ মে’ত চেণ্টোচৰ হৈ খেলোঁতে নেইমাৰে লাভ কৰা ‘গ্ৰেড-টু’ তলুৱাৰ আঘাতৰ বাবে ব্ৰাজিলৰ চিকিৎসা দলে কোনো ধৰণৰ লৰালৰি কৰিব বিচৰা নাই । ক্ষিপ্ৰ প্ৰত্যাৱৰ্তনতকৈ তেওঁৰ দীৰ্ঘম্যাদী সুস্থতাকহে অগ্ৰাধিকাৰ দিয়া হৈছে ।
জানিব পৰা মতে অভিজ্ঞ খেলুৱৈগৰাকীয়ে এতিয়ালৈকে কোনো পূৰ্ণাংগ দলীয় প্ৰশিক্ষণত অংশগ্ৰহণ কৰা নাই । তেওঁ বৰ্তমান কেৱল জিমৰ পাতল কচৰৎ আৰু পুনৰ্সংস্থাপনৰ মাজতে সীমাবদ্ধ আছে । তেওঁ সম্পূৰ্ণৰূপে বিষমুক্ত হ’লেহে খেলপথাৰত বলৰ সৈতে পূৰ্ণাংগ অনুশীলনৰ অনুমতি পাব ।
ইএছপিএন আৰু গোল ডট কম-ৰ প্ৰতিবেদন অনুসৰি, ব্ৰাজিলে নেইমাৰক আগতীয়াকৈ খেলপথাৰলৈ নমাই আনি তেওঁৰ সমগ্ৰ প্ৰতিযোগিতাখন বিপদাপন্ন কৰাতকৈ কেৱল নকআউট পৰ্যায়ৰ বাবে সম্পূৰ্ণ সুস্থ কৰি প্ৰস্তুত কৰাতহে মনোনিৱেশ কৰিছে । এই সাৱধানী পদক্ষেপৰ বাবে অহা শুকুৰবাৰে ফিলাডেলফিয়াত হাইটিৰ বিৰুদ্ধে আৰু ২৪ জুনত স্কটলেণ্ডৰ বিৰুদ্ধে হ’বলগীয়া ব্ৰাজিলৰ অন্তিমখন গ্ৰুপ পৰ্যায়ৰ খেলতো নেইমাৰে খেলাৰ সম্ভাৱনা তেনেই ক্ষীণ ।
প্ৰথম মেচৰ ড্ৰ’ৰ পিছত তীব্ৰ হৈছে নেইমাৰৰ অভাৱ
বিশ্বকাপৰ নিজৰ প্ৰথমখন খেলত মৰক্কোৰ বিৰুদ্ধে ব্ৰাজিলে ১-১ গ’লত ড্ৰ’ খেলাৰ পিছৰে পৰা নেইমাৰৰ অনুপস্থিতিৰ বিষয়টোৱে ডাঙৰ ৰূপ ধাৰণ কৰিছে । আফ্ৰিকান দলটোৰ বিৰুদ্ধে ব্ৰাজিলৰ ফৰৱাৰ্ড লাইনে সৃষ্টিশীলতাৰ অভাৱত বাৰুকৈয়ে সংগ্ৰাম কৰিবলগীয়া হৈছিল ।
এই প্ৰদৰ্শনৰ পিছত একাংশ সমালোচকে ৩৪ বছৰীয়া খেলুৱৈগৰাকীক দলত লোৱাক লৈ কৰা প্ৰশ্ন (যুৱ খেলুৱৈক সুযোগ নিদিয়াৰ যুক্তি) যেন স্তিমিত হৈ পৰিছে । বৰঞ্চ ফুটবল বিশেষজ্ঞসকলৰ মতে, বিশ্বকাপৰ দৰে এক তীব্ৰ চাপ সৃষ্টিকাৰী প্ৰতিযোগিতাত ব্ৰাজিলক ত্ৰাণকৰ্তা হিচাপে উদ্ধাৰ কৰিবলৈ নেইমাৰৰ অভিজ্ঞতা আৰু সৃষ্টিশীলতা অত্যন্ত গুৰুত্বপূৰ্ণ । এতিয়া কোটি কোটি অনুৰাগীয়ে অপেক্ষা কৰিছে— কেতিয়া খেলপথাৰলৈ উভতিব ‘মেচ উইনাৰ’ নেইমাৰ !
লগতে পঢ়ক : ফিফা বিশ্বকাপৰ মঞ্চত বিশ্ববাসীৰ হৃদয় জিনিলে জাপানৰ অনুৰাগীয়ে
