প্ৰধানমন্ত্ৰী নৰেন্দ্ৰ মোদীয়ে আমেৰিকা আৰু ইৰাণৰ মাজত হোৱা শান্তি চুক্তিক আদৰণি জনাইছে। ইয়াৰ দ্বাৰা অঞ্চলটোত শান্তি ঘূৰি আহিব বুলি আশা প্ৰকাশ কৰিছে প্ৰধানমন্ত্ৰী গৰাকীয়ে।
প্ৰধানমন্ত্ৰী নৰেন্দ্ৰ মোদীয়ে আমেৰিকা আৰু ইৰাণৰ মাজত হোৱা শান্তি চুক্তিক আদৰণি জনাইছে। তেওঁ কয় যে এই চুক্তিৰ ফলত অঞ্চলটোত শান্তি আৰু সুস্থিৰতা ঘূৰি আহিব বুলি আশা কৰা হৈছে। ইয়াৰ লগতে যাতায়াত আৰু বাণিজ্যৰ স্বাধীনতা পুনৰ বাহাল হ’ব। প্ৰধানমন্ত্ৰী মোদীয়ে কয় যে এই সংঘাতৰ বাবে সমগ্ৰ বিশ্বতে গুৰুতৰ অৰ্থনৈতিক প্ৰতিবন্ধকতাৰ সৃষ্টি হৈছিল আৰু বহু দেশে লোকচান সন্মুখিন হ’বলগীয়া হৈছিল। তেওঁ আলোচনাৰ জৰিয়তে এটা স্থায়ী সমাধান ওলাব বুলি আশা প্ৰকাশ কৰে।
প্ৰধানমন্ত্ৰী মোদীয়ে ছচিয়েল মিডিয়া প্লেটফৰ্ম এক্সত এটা পোষ্ট শ্বেয়াৰ কৰি লিখিছে, ‘মই পশ্চিম এছিয়াত চলি থকা সংঘাতৰ অন্ত পেলাবলৈ আমেৰিকা আৰু ইৰাণৰ মাজত হোৱা চুক্তিক আদৰণি জনাইছো। এই উত্তেজনাই সমগ্ৰ বিশ্বতে গুৰুতৰ অৰ্থনৈতিক ব্যাঘাতৰ সৃষ্টি কৰিছে আৰু বহু দেশত ধন-জনৰ হানি কৰিছে।’
তেওঁ লগতে কয় যে, ‘ভাৰতে আশা কৰে যে এই চুক্তিৰ ৰূপায়ণে অঞ্চলটোত শান্তি আৰু সুস্থিৰতা ঘূৰাই অনাত তথা নৌ পৰিবহণ আৰু বাণিজ্যৰ স্বাধীনতা নিশ্চিত কৰাত সহায় কৰিব। আমি বাকী থকা বিষয়সমূহৰ ওপৰত আলোচনাৰ জৰিয়তে এটা স্থায়ী আৰু চূড়ান্ত চুক্তিত উপনীত হ’ব পাৰিম বুলি আশা কৰিছো।’
আমেৰিকাৰ ৰাষ্ট্ৰপতি ড’নাল্ড ট্ৰাম্পে দেওবাৰে (১৪ জুন) ট্ৰুথ ছচিয়েলত পোষ্ট কৰি ঘোষণা কৰে যে আমেৰিকা আৰু ইৰাণৰ মাজত শান্তি চুক্তিৰ সন্মতি প্ৰকাশ পাইছে। চুইজাৰলেণ্ডত দুয়োখন দেশৰ মাজত শান্তি চুক্তি স্বাক্ষৰিত হ’ব। ইয়াত আমেৰিকাৰ তৰফৰ পৰা জে ডি ভেঞ্চ আৰু ইৰাণৰ তৰফৰ পৰা আৰাঘচী আৰু গালিবাফ উপস্থিত থাকিব। ৬০ দিনীয়া যুদ্ধবিৰতিৰ সময়ছোৱাত দুয়োখন দেশৰ মাজত চুক্তিখনক লৈ আলোচনা হ’ব। ইয়াত ইৰাণৰ ওপৰত জাপি দিয়া নিষেধাজ্ঞা প্ৰত্যাহাৰ কৰা, ফ্ৰীজ হৈ থকা ধন মোকলাই দিয়াৰ পৰা আৰম্ভ কৰি পৰমাণু কাৰ্যসূচীৰ দৰে বিষয়সমূহৰ ওপৰত আলোচনা কৰা হ’ব। চূড়ান্ত চুক্তিখন কাৰ্যকৰী নোহোৱালৈকে অন্তৱৰ্তীকালীন ব্যৱস্থাসমূহ বাহাল থাকিব।
লগতে পঢ়ক: “ইৰাণ-আমেৰিকাৰ শান্তি চুক্তি সম্পন্ন, শুকুৰবাৰৰ পৰা মুকলি হ’ব হৰমুজ প্ৰণালী” ; ট্ৰাম্পৰ ডাঙৰ দাবী
