আমেৰিকাৰ ৰাষ্ট্ৰপতি ডোনাল্ড ট্ৰাম্পৰ হৈ প্ৰধানমন্ত্ৰী মোদীক হোৱাইট হাউচ ভ্ৰমণ কৰাৰ বাবে এক আনুষ্ঠানিক আমন্ত্ৰণ পত্ৰ প্ৰদান কৰে
চাৰিদিনীয়া কাৰ্যসূচীৰে ভাৰত ভ্ৰমণলৈ অহা আমেৰিকা যুক্তৰাষ্ট্ৰৰ বৈদেশিক পৰিক্ৰমা মন্ত্ৰী মাৰ্কো ৰুবিঅ’ই শনিবাৰে প্ৰধানমন্ত্ৰী নৰেন্দ্ৰ মোদীক সাক্ষাৎ কৰে । এই গুৰুত্বপূৰ্ণ বৈঠকত মন্ত্ৰী ৰুবিঅ’ই আমেৰিকাৰ ৰাষ্ট্ৰপতি ডোনাল্ড ট্ৰাম্পৰ হৈ প্ৰধানমন্ত্ৰী মোদীক হোৱাইট হাউচ ভ্ৰমণ কৰাৰ বাবে এক আনুষ্ঠানিক আমন্ত্ৰণ পত্ৰ প্ৰদান কৰে । ভাৰতত নিযুক্ত আমেৰিকাৰ ৰাষ্ট্ৰদূত চাৰ্জিঅ’ গৰে ছ’চিয়েল মিডিয়া প্লেটফৰ্ম এক্স (X)-ত এই কথা নিশ্চিত কৰি বৈঠকখনক অত্যন্ত “ফলপ্ৰসূ” বুলি অভিহিত কৰে ।
প্ৰধানমন্ত্ৰীৰ কাৰ্যালয়ৰ পৰা প্ৰকাশিত এক বিবৃতিত জনোৱা হৈছে যে বৈঠককালত দুই নেতাৰ মাজত প্ৰতিৰক্ষা, কৌশলগত প্ৰযুক্তি, বাণিজ্য আৰু বিনিয়োগ, শক্তি সুৰক্ষা, সংযোগ, শিক্ষা আৰু জনসাধাৰণৰ মাজৰ পাৰস্পৰিক সম্পৰ্ককে ধৰি কেইবাটাও গুৰুত্বপূৰ্ণ ক্ষেত্ৰত দ্বিপাক্ষিক সহযোগিতাৰ ধাৰাবাহিক প্ৰগতিৰ বিষয়ে আলোচনা হয় । ইয়াৰ উপৰিও, আমেৰিকাৰ বৈদেশিক মন্ত্ৰীগৰাকীয়ে পশ্চিম এছিয়াৰ সাম্প্ৰতিক পৰিস্থিতি সহ বিভিন্ন আঞ্চলিক আৰু গোলকীয় বিষয়ত ৱাশ্বিংটনৰ দৃষ্টিভংগী প্ৰধানমন্ত্ৰী মোদীৰ সন্মুখত ডাঙি ধৰে ।
প্ৰত্যুত্তৰত প্ৰধানমন্ত্ৰী মোদীয়ে শান্তি প্ৰচেষ্টাৰ প্ৰতি ভাৰতৰ ধাৰাবাহিক সমৰ্থনৰ কথা পুনৰ দোহাৰে আৰু আলোচনা তথা কূটনীতিৰ জৰিয়তেহে সকলো ধৰণৰ সংঘাতৰ শান্তিপূৰ্ণ সমাধান সম্ভৱ বুলি আহ্বান জনায় । প্ৰধানমন্ত্ৰীয়ে মন্ত্ৰী ৰুবিঅ’ক ৰাষ্ট্ৰপতি ট্ৰাম্পলৈ তেওঁৰ আন্তৰিক শুভেচ্ছা জ্ঞাপন কৰিবলৈ অনুৰোধ জনায় । বৈঠকৰ অন্তত প্ৰধানমন্ত্ৰী মোদীয়ে এক্স (X)-ত উল্লেখ কৰে যে নতুন দিল্লী আৰু ৱাশ্বিংটনে বিশ্বৰ কল্যাণৰ বাবে ভৱিষ্যতেও এনেদৰে একত্ৰিত হৈ কাম কৰি যাব ।
হাই প্ৰফাইল বৈঠকখনত ভাৰতৰ বৈদেশিক পৰিক্ৰমা মন্ত্ৰী এছ জয়শংকৰ, ৰাষ্ট্ৰীয় নিৰাপত্তা উপদেষ্টা অজিত ডোভাল, আমেৰিকাৰ ৰাষ্ট্ৰদূত চাৰ্জিঅ’ গৰ আৰু আমেৰিকাৰ বৈদেশিক পৰিক্ৰমা বিভাগৰ অধীনস্থ সচিব এলিছন হুকাৰো উপস্থিত আছিল । ভাৰতৰ বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে কয় যে ৰুবিঅ’ৰ এই ভ্ৰমণে ভাৰত-আমেৰিকাৰ ব্যাপক গোলকীয় কৌশলগত অংশীদাৰিত্বক এক নতুন মাত্ৰা প্ৰদান কৰিব ।
উল্লেখ্য যে ২৩ মে’ৰ পৰা ২৬ মে’লৈ হ’বলগীয়া এই ৪ দিনীয়া ভ্ৰমণসূচীৰ আৰম্ভণিতে শনিবাৰে পুৱা মাৰ্কো ৰুবিঅ’ই পত্নী জেনেট ডি ৰুবিঅ’ আৰু এটা উচ্চস্তৰীয় প্ৰতিনিধি দলৰ সৈতে প্ৰথমে কলকাতাত অৱতৰণ কৰে । যোৱা ১৪ বছৰৰ ভিতৰত এয়া কোনো শীৰ্ষ আমেৰিকান কূটনীতিবিদৰ প্ৰথম কলকাতা ভ্ৰমণ । কলকাতাত উপস্থিত হৈ তেওঁ ‘মিছনেৰীজ অৱ চেৰিটি’লৈ গৈ মদাৰ টেৰেছাৰ প্ৰতি শ্ৰদ্ধাঞ্জলি জ্ঞাপন কৰে আৰু তেওঁৰ কৰুণা তথা সেৱাৰ মহান উত্তৰাধিকাৰক প্ৰশংসা কৰে । কলকাতাৰ ভ্ৰমণসূচী সামৰি শনিবাৰে বিয়লি তেওঁ নতুন দিল্লীত উপস্থিত হয় । দিল্লীত থকাৰ সময়ছোৱাত আমেৰিকাৰ বৈদেশিক মন্ত্ৰীগৰাকীয়ে আমেৰিকান দূতাবাসৰ ‘ছাপৰ্ট এনেক্স বিল্ডিং’ৰ উৎসৰ্গীকৃত অনুষ্ঠানতো অংশগ্ৰহণ কৰি ভাষণ প্ৰদান কৰিব ।
লগতে পঢ়ক : প্ৰধানমন্ত্ৰী মোদীৰ সৈতে মাৰ্কো ৰুবিঅ’ৰ গুৰুত্বপূৰ্ণ বৈঠক; ভাৰতক আমেৰিকাৰ “অপৰিহাৰ্য অংশীদাৰ” আখ্যা
