কেন্দ্ৰীয় মাধ্যমিক শিক্ষা ব’ৰ্ডে আজি ২০২৬ বৰ্ষৰ দ্বাদশ শ্ৰেণীৰ পৰীক্ষাৰ ফলাফল ঘোষণা কৰিছে
কেন্দ্ৰীয় মাধ্যমিক শিক্ষা ব’ৰ্ডে (CBSE) আজি ২০২৬ বৰ্ষৰ দ্বাদশ শ্ৰেণীৰ পৰীক্ষাৰ ফলাফল ঘোষণা কৰিছে । এইবাৰ ব’ৰ্ডৰ পৰীক্ষাত সৰ্বমুঠ ৮৫.২০ শতাংশ শিক্ষাৰ্থী উত্তীৰ্ণ হৈছে । উল্লেখযোগ্য যে যোৱা বছৰৰ তুলনাত এইবাৰ উত্তীৰ্ণৰ হাৰ ৩.৯ শতাংশ হ্ৰাস পাইছে ।
শিক্ষাৰ্থীৰ অংশগ্ৰহণ : এই বৰ্ষত সৰ্বমুঠ ১৮,৫৭,৫১৭ গৰাকী শিক্ষাৰ্থীয়ে পৰীক্ষাৰ বাবে পঞ্জীয়ন কৰিছিল ।
ছাত্ৰীৰ আধিপত্য : উত্তীৰ্ণৰ হাৰৰ ক্ষেত্ৰত ছাত্ৰতকৈ ছাত্ৰীয়ে অধিক সফলতা প্ৰদৰ্শন কৰিছে । ছাত্ৰীৰ উত্তীৰ্ণৰ হাৰ ৮৮.৮৬ শতাংশ হোৱাৰ বিপৰীতে ছাত্ৰৰ হাৰ হ’ল ৮২.১৩ শতাংশ ।
লিংগ পৰিৱৰ্তিত শিক্ষাৰ্থীৰ চমক : ব’ৰ্ডৰ তথ্য অনুসৰি, এইবাৰ লিংগ পৰিৱৰ্তিত (Transgender) শিক্ষাৰ্থীসকলে ১০০ শতাংশ উত্তীৰ্ণৰ হাৰেৰে এক অভিলেখ গঢ়িছে ।
উচ্চ নম্বৰ লাভ : সুস্থ প্ৰতিযোগিতাৰ স্বাৰ্থত ব’ৰ্ডে মেধা তালিকা প্ৰকাশ কৰা নাই যদিও ৯৪,০২৮ গৰাকী শিক্ষাৰ্থীয়ে ৯০ শতাংশৰ ওপৰত আৰু ১৭,১১৩ গৰাকী শিক্ষাৰ্থীয়ে ৯৫ শতাংশৰ ওপৰত নম্বৰ লাভ কৰিছে ।
অঞ্চল আৰু প্ৰতিষ্ঠান অনুসৰি প্ৰদৰ্শন : অঞ্চলসমূহৰ ভিতৰত তিৰুৱনন্তপুৰম (৯৫.৬২%) শীৰ্ষত আছে । ইয়াৰ পিছতে চেন্নাই আৰু বেংগালুৰুৱে ক্ৰমে ৯৩.৮৪% আৰু ৯৩.১৯% উত্তীৰ্ণৰ হাৰেৰে স্থান দখল কৰিছে । ৰাষ্ট্ৰীয় ৰাজধানী দিল্লীৰ পশ্চিম আৰু পূব অঞ্চলত উত্তীৰ্ণৰ হাৰ ক্ৰমে ৯২.৩৪% আৰু ৯১.৭৩% । প্ৰতিষ্ঠানগত দিশত কেন্দ্ৰীয় বিদ্যালয় (৯৮.৫৫%) আৰু জৱাহৰ নবোদয় বিদ্যালয়সমূহে (৯৮.৪৭%) শ্ৰেষ্ঠত্ব বজাই ৰাখিছে ।
ডিজিটেল মূল্যায়ন আৰু প্ৰমাণপত্ৰ : এইবাৰ চিবিএছইয়ে এক বিশাল আধুনিক পদক্ষেপ গ্ৰহণ কৰি প্ৰায় ৯৮.৬৬ লাখ উত্তৰ বহীৰ বাবে ‘অন-স্ক্ৰীন মাৰ্কিং’ (OSM) পদ্ধতি ব্যৱহাৰ কৰিছে । ইয়াৰ ফলত মূল্যায়ন প্ৰক্ৰিয়া অধিক সঠিক আৰু স্বচ্ছ হৈ পৰিছে। পৰীক্ষাৰ্থীসকলে ব’ৰ্ডৰ অফিচিয়েল ৱেবছাইটৰ উপৰিও DigiLocker আৰু উমাং এপৰ জৰিয়তে নিজৰ ফলাফল চাব পাৰিব । ডিগিলকাৰৰ পৰা লাভ কৰা নথিপত্ৰসমূহ উচ্চ শিক্ষাৰ নামভৰ্তিৰ বাবে আইনীভাৱে বৈধ বুলি গণ্য কৰা হ’ব ।
যিসকল শিক্ষাৰ্থীয়ে ফলাফল উন্নত কৰিব বিচাৰে বা যিসকল ‘কম্পাৰ্টমেণ্ট’ শ্ৰেণীত আছে, তেওঁলোকৰ বাবে অহা ১৫ জুলাই, ২০২৬ তাৰিখে পৰিপূৰক পৰীক্ষা অনুষ্ঠিত হ’ব। ইয়াৰ বাবে আবেদন প্ৰক্ৰিয়া অহা ২ জুনৰ পৰা আৰম্ভ হ’ব ।
লগতে পঢ়ক : NEET-UG ২০২৬ বাতিল : অহা ১০ দিনৰ ভিতৰত ঘোষণা হ’ব নতুন সময়সূচী
