অসমৰ ১২৬ জনীয়া বিধানসভাৰ বাবে মুঠ ২.৫ কোটিৰো অধিক ভোটাৰে নিজৰ ভোটাধিকাৰ সাব্যস্ত কৰিব
অসমৰ লগতে আজি কেৰাল আৰু পুডুচেৰীটো অনুষ্ঠিত হৈছে বিধাৱসভা নিৰ্বাচনৰ ভোটগ্ৰহণ । পুৱা ৭ বজাৰ লগে লগে আৰম্ভ হয় ভোটগ্ৰহণ প্ৰক্ৰিয়া । অসমত প্ৰতিকৃল বতৰকো নেওচি ভোটদানৰ বাবে ভোটাৰৰ দীঘলীয়া শাৰী দেখা গৈছে । নিৰ্বাচন আয়োগে প্ৰকাশ কৰা তথ্য অনুসৰি বৃহস্পতিবাৰে পুৱা ১১ বজালৈকে অসমত ৩৮.৯২ শতাংশ আৰু কেৰালাত ৩৩.২৮ শতাংশ ভোটদান সম্পন্ন হৈছে । আনহাতে কেন্দ্ৰীয় শাসিত অঞ্চল পুডুচেৰীত ভোটদানৰ হাৰ আছিল ৩৭.০৬ শতাংশ ।
ইয়াৰ পূৰ্বে পুৱা ৯ বজাত অসমত ১৭.৮৭ শতাংশ, কেৰালাত ১৬.২৩ শতাংশ আৰু পুডুচেৰীত ১৭.৪১ শতাংশ ভোটদান ৰেকৰ্ড কৰা হৈছিল । বৃহস্পতিবাৰে পুৱা ৭ বজাৰ পৰা দুখন ৰাজ্য আৰু এটা কেন্দ্ৰীয় শাসিত অঞ্চলৰ এই গুৰুত্বপূৰ্ণ নিৰ্বাচনী যুঁজৰ ভোটগ্ৰহণ প্ৰক্ৰিয়া আৰম্ভ হয় ।
উল্লেখ্য য়ে, অসমৰ ১২৬ খন আসন, কেৰালাৰ ১৪০ খন আৰু পুডুচেৰীৰ ৩০ খন আসনৰ বাবে বৰ্তমান ভোটগ্ৰহণ চলি আছে । অহা ৪ মে’ত ভোটগণনা সম্পন্ন হ’ব ।
অসমৰ ১২৬ জনীয়া বিধানসভাৰ বাবে মুঠ ২.৫ কোটিৰো অধিক ভোটাৰে নিজৰ ভোটাধিকাৰ সাব্যস্ত কৰিব । এইবাৰ মুঠ ৭২২ গৰাকী প্ৰাৰ্থী নিৰ্বাচনী যুঁজত অৱতীৰ্ণ হৈছে । মুঠ ২,৫০,৫৪,৪৬৩ গৰাকী ভোটাৰৰ ভিতৰত ১,২৫,৩১,৫৫২ গৰাকী পুৰুষ, ১,২৫,২২,৫৯৩ গৰাকী মহিলা, ৩১৮ গৰাকী তৃতীয় লিংগৰ ভোটাৰ আৰু ৬৩,৪২৩ গৰাকী সেৱা ভোটাৰ আছে ।
ভোটাৰসকলৰ ভিতৰত ১৮-১৯ বছৰ বয়সৰ ৬,৪২,৩১৪ গৰাকী, ৮০ বছৰৰ উৰ্ধৰ ২,৫০,০০৬ গৰাকী আৰু ২,০৫,০৮৫ গৰাকী দিব্যাংগ ভোটাৰ আছে । নিৰ্বাচন আয়োগৰ নিৰ্দেশ অনুসৰি নিৰীক্ষণ ব্যৱস্থা সুদৃঢ় কৰিবলৈ ৱেবকাষ্টিঙৰ ব্যৱস্থা কৰা হৈছে । ৩১,৪৮৬ খন মূল ভোটকেন্দ্ৰ আৰু ৪ খন সহায়ক ভোটকেন্দ্ৰকে ধৰি মুঠ ৩১,৪৯০ খন ভোটকেন্দ্ৰতে ৱেবকাষ্টিং সক্ৰিয় কৰা হৈছে । নিৰ্বাচন পৰিচালনাৰ বাবে মুঠ ১,৫১,১৩২ গৰাকী নিৰ্বাচনী কৰ্মীক নিয়োজিত কৰা হৈছে ।
লগতে পঢ়ক : ৭ বজাৰ লগে লগে আৰম্ভ হ’ল ভোটদান প্ৰক্ৰিয়া, ভোটকেন্দ্ৰত ভোটাৰৰ দীঘলীয়া শাৰী
