কংগ্ৰেছ দল ত্যাগ কৰিলে জ্যেষ্ঠ নেতা তথা লোকসভাৰ সাংসদ প্ৰদ্যুৎ বৰদলৈয়ে
আসন্ন অসম বিধানসভা নিৰ্বাচনৰ পূৰ্বে কংগ্ৰেছত উঠিছে পদত্যাগৰ জোৱাৰ । নিৰ্বাচনৰ পূৰ্বে নৈৰ গৰাৰ দৰে খহিছে কংগ্ৰেছ দলৰ ভেটি । এইবাৰ কংগ্ৰেছৰ ভেটি কঁপাই দল ত্যাগ কৰিলে জ্যেষ্ঠ নেতা তথা লোকসভাৰ সাংসদ প্ৰদ্যুৎ বৰদলৈয়ে । দলৰ প্ৰাথমিক সদস্য পদ ত্যাগ কৰি AICCৰ সভাপতি মল্লিকাৰ্জু খৰ্গেলৈ পদত্যাগ পত্ৰ প্ৰেৰণ কৰিছে তেওঁ । ইয়াৰ লগে লগে তেওঁ ভাৰতীয় জনতা পাৰ্টিত যোগদান কৰি হাই-প্ৰফাইল দিছপুৰ সমষ্টিৰ পৰা বিধানসভা নিৰ্বাচনত প্ৰতিদ্বন্দ্বিতা কৰাৰ প্ৰবল সম্ভাৱনা প্ৰকট হৈ পৰিছে । ইফালে বৰ্তমান দিল্লীত থকা সাসংদ বৰদলৈয়ে বুধবাৰে ভাৰতীয় জনতা পাৰ্টীত যোগদান কৰিব বুলি জানিব পৰা গৈছে । উল্লেখ্য যে, নগাঁৱৰ কংগ্ৰেছ সাসংদ আছিল বৰদলৈ ।
মুখ্যমন্ত্ৰী হিমন্ত বিশ্ব শৰ্মাই ৰাজহুৱাকৈ সাসংদ বৰদলৈক বিজেপিত যোগদান কৰিবলৈ আমন্ত্ৰণ জনোৱাৰ পিছতে এই ৰাজনৈতিক ঘটনা ঘটাৰ উপক্ৰম ঘটিছে । ইয়াৰ পূৰ্বে মঙলবাৰে বিয়লি সাংবাদিকৰ সৈতে হোৱা কথা-বতৰাত মুখ্যমন্ত্ৰী ড০ শৰ্মাই কৈছিল যে তেওঁ ব্যক্তিগতভাৱে কংগ্ৰেছ নেতাগৰাকীৰ সৈতে যোগাযোগ কৰা নাই যদিও তেওঁ বিশ্বাস কৰে যে বৰদলৈয়ে হয়তো কংগ্ৰেছত থকাটো প্ৰয়োজনীয় বুলি নাভাবিব পাৰে ।
মুখ্যমন্ত্ৰী ড০ শৰ্মাই কৈছিল- “মই প্ৰদ্যুৎ বৰদলৈৰ সৈতে যোগাযোগ কৰা নাই, কিন্তু মোৰ বিশ্বাস যে তেওঁৰ কংগ্ৰেছত থকাৰ কোনো প্ৰয়োজন নাই । মই তেওঁক বিজেপিত যোগদান কৰিবলৈ পৰামৰ্শ দিছো আৰু মই তেওঁক দললৈ আদৰণি জনাইছো । এতিয়ালৈকে তেওঁৰ সৈতে কোনো যোগাযোগ হোৱা নাই ।”
মুখ্যমন্ত্ৰীগৰাকীয়ে লগতে ইংগিত দিছিল যে বিজেপিয়ে জ্যেষ্ঠ নেতা ভূপেন কুমাৰ বৰাক যিধৰণে সন্মান দিছিল, প্ৰদ্যুৎ বৰদলৈকো অনুৰূপ সন্মান প্ৰদান কৰিব । লগতে মুখ্যমন্ত্ৰীগৰাকীয়ে “যদি প্ৰদ্যুৎ বৰদলৈয়ে বিজেপিত যোগদান কৰে, তেন্তে আমি নিশ্চিত কৰিম যে তেওঁ বিধানসভা নিৰ্বাচনত প্ৰতিদ্বন্দ্বিতা কৰিব আৰু আমি তেওঁৰ বাবে এখন আসন এৰি দিম,” বুলি মন্তব্য কৰিছিল ।
আনহাতে বুধবাৰে সন্ধিয়ালৈ ঘোষণা হ’ব পাৰে বিজেপিৰ প্ৰাৰ্থী তালিকা ।
লগতে পঢ়ক : প্ৰদ্যুৎ বৰদলৈক বিজেপিলৈ আমন্ত্ৰণ, আনুষ্ঠানিক প্ৰস্তাৱ মুখ্যমন্ত্ৰীৰ
