কংগ্ৰেছ ত্যাগ কৰি হুকহুকাই কান্দি উঠিল জ্যেষ্ঠ মুখপাত্ৰ ৰাতুল কলিতাই

অসম প্ৰদেশ কংগ্ৰেছ কমিটিৰ জ্যেষ্ঠ মুখপাত্ৰ ৰাতুল কলিতাই শনিবাৰে দলৰ পৰা পদত্যাগ কৰাৰ কথা ঘোষণা কৰে । পদত্যাগৰ পিছতে গৌৰৱ গগৈৰ বিৰুদ্ধে উত্থাপন কৰে গুৰুতৰ অভিযোগ ।

সমাগত অসম বিধানসভা নিৰ্বাচনৰ পূৰ্বে প্ৰদেশ কংগ্ৰেছ উঠিছে পদত্যাগৰ জোৱাৰ । বিশেষকৈ বিধানসভা নিৰ্বাচনৰ বাবে প্ৰদেশ কংগ্ৰেছৰ প্ৰথমখন তালিকা প্ৰকাশ পোৱাৰ পিছতে দলটোৰ তৃণমূল পৰ্যায়ৰ পৰা আৰম্ভ কৰি ৰাজ্যিক সমিতিৰ নেতা পৰ্যায়লৈ দেখা দিছে প্ৰচণ্ড বিদ্ৰোহে । কংগ্ৰেছৰ প্ৰথমখন তালিকাত টিকট লাভ কৰা একাংশ প্ৰাৰ্থীক লৈ তীব্ৰ আপত্তি দৰ্শাইছে নেতা-কৰ্মীসকলে । এই তালিকা প্ৰকাশৰ পিছতে ইয়াক কংগ্ৰেছৰ বংশবাদ বুলিও অভিযোগ কৰিছে তেওঁলোকে ।

ইফালে দল ত্যাগ অব্যাহত থকাৰ মাজতে শনিবাৰে কংগ্ৰেছে লাভ কৰে আন এক মোক্ষম আঘাত । অসম প্ৰদেশ কংগ্ৰেছ কমিটিৰ জ্যেষ্ঠ মুখপাত্ৰ ৰাতুল কলিতাই শনিবাৰে দলৰ পৰা পদত্যাগ কৰাৰ কথা ঘোষণা কৰে । তেওঁ অভিযোগ কৰে যে সংগঠনটোৰ ভিতৰত সাধাৰণ ঘৰৰ পৰা অহা নেতাসকলক গুৰুত্ব দিয়া নহয় ।

নলবাৰীৰ নিজগৃহত এক সংবাদমেল সম্বোধন কৰি কলিতাই দাবী কৰে যে ভাৰতীয় জাতীয় কংগ্ৰেছৰ জ্যেষ্ঠ নেতাসকলে কেৱল প্ৰভাৱশালী বা ৰাজনৈতিক পৰিয়ালৰ লোককহে অগ্ৰাধিকাৰ দিয়ে । তেওঁ অভিযোগ কৰি কয়, “এজন সাধাৰণ পৰিয়ালৰ হোৱাৰ বাবে আমাক দলত মূল্যায়ন কৰা নহয় । কেৱল মন্ত্ৰীৰ পুত্ৰ বা প্ৰভাৱশালী পৰিয়ালৰ লোকসকলেহে গুৰুত্ব পায় ।”

ৰাতুল কলিতাই কয় যে তেওঁ দলটোৰ আটাইতকৈ দুৰ্বল তথা বেয়া সময়ছোৱাতো দলৰ হৈ কাম কৰিছিল । তেওঁ উল্লেখ কৰে যে ২০২১ চনৰ বিধানসভা নিৰ্বাচনত তেওঁ দলীয় টিকট বিচাৰিছিল যদিও জ্যেষ্ঠ নেতা প্ৰদ্যুৎ কুমাৰ ভূঞাই প্ৰতিদ্বন্দ্বিতা কৰাৰ ইচ্ছা প্ৰকাশ কৰাত তেওঁ আঁতৰি আহিছিল । পিছত, যেতিয়া তেওঁ পুনৰ আবেদন কৰিছিল, দলে তেওঁৰ পৰিৱৰ্তে দ্বীপ বায়নক প্ৰাৰ্থিত্ব প্ৰদান কৰিছিল ।

তেওঁ আৰু দাবী কৰে যে এইবাৰো আবেদন কৰা স্বত্বেও তেওঁক টিকটৰ পৰা বঞ্চিত কৰা হয় । তেওঁ অভিযোগ কৰে যে প্ৰায় ৯০ ঘণ্টা পাৰ হোৱাৰ পিছতো দলৰ কোনো জ্যেষ্ঠ নেতাই এই সন্দৰ্ভত তেওঁৰ সৈতে যোগাযোগ কৰা নাই । কলিতাই তাঞ্জিল হুছেইন আৰু প্ৰতীক বৰদলৈৰ দৰে নেতাৰ প্ৰসংগ টানি আনি দলৰ ভিতৰত চলা বংশবাদক লৈয়ো প্ৰশ্ন উত্থাপন কৰে ।

ৰাতুল কলিতাৰ পদত্যাগৰ পিছতে নলবাৰীৰ কেইবাজনো কংগ্ৰেছ নেতা আৰু কৰ্মীয়েও দল ত্যাগ কৰে । বাতৰি অনুসৰি, তেওঁৰ ২০ জনতকৈও অধিক সমৰ্থকে পদ আৰু প্ৰাথমিক সদস্যপদৰ পৰা পদত্যাগ কৰিছে ।

কলিতাই কয় যে সন্ধিয়া আলোচনাৰ অন্তত তেওঁ কোনটো ৰাজনৈতিক দলত যোগদান কৰিব সেই বিষয়ে সিদ্ধান্ত ল’ব । ইয়াৰ লগতে তেওঁ প্ৰশ্ন উত্থাপন কৰে যে ভূমি কেলেংকাৰী আৰু অন্যান্য বিতৰ্কত অভিযুক্ত হোৱা স্বত্বেও বিজেপিৰ প্ৰাক্তন নেতা অশোক শৰ্মাক কেনেকৈ কংগ্ৰেছৰ টিকট দিয়া হ’ল ।

ইফালে কংগ্ৰেছ দল ত্যাগ কৰিয়ে হুকহুকাই কান্দি উঠে দলটোৰ জ্যেষ্ঠ মুখপাত্ৰ ৰাতুল কলিতাই । নলবাৰীৰ নিজ বাসগৃহত সংবাদমেল সম্বোধন কৰাৰ পূৰ্বে দেখা যায় এই দৃশ্য । আনহাতে শনিবাৰে পুৱা গুৱাহাটীৰ ৰাজীৱ ভৱনত সেৱা জনাই কংগ্ৰেছ দলৰ প্ৰতি ক্ষোভ প্ৰকাশ কৰিছিল ৰাতুল কলিতাই । সামাজিক মাধ্যমযোগে তেওঁ “দলৰ বেয়া দিনত সৰ্বোচ্চ উজাৰি কাম কৰা নেতা কৰ্মীক সন্মান আৰু গুৰুত্ব দিয়ক । আৰু এটা কথা- Plz don’t underestimate the power of a true Congressman” বুলি দলৰ প্ৰতি তীব্ৰ ক্ষোভ প্ৰকাশ কৰিছিল তেওঁ ।

লগতে পঢ়ক : ৰাজ্যসভা নিৰ্বাচনৰ মনোনয়ন দাখিল যোগেন মহন, তেৰছ গোৱালা আৰু প্ৰমোদ বড়োৰ