কংগ্ৰেছৰ সৈতে ৰাইজৰ দলৰ মিত্ৰতাক লৈ বিধায়ক অখিল গগৈয়ে এক বিস্ফোৰক মন্তব্য কৰিছে।কংগ্ৰেছক ধমক দি অখিল গগৈয়ে কয় যে, ৰাইজৰ দলক উজনি অসমৰ আসন লাগিবই।
আগন্তুক বিধানসভা নিৰ্বাচনৰ বাবে ৰাজ্যৰ প্ৰতিটো ৰাজনৈতিক দলে কুচ-কাৱাজ চলাইছে।মিত্ৰতাক লৈ শনিবাৰে ৰাইজৰ দলৰ এখন গুৰুত্বপূৰ্ণ বৈঠক অনুষ্ঠিত হয়।
এই বৈঠকৰ পিছতেই অখিল গগৈয়ে কংগ্ৰেছক পুনৰ কঠোৰ সকিয়নী দিছে। কংগ্ৰেছক ধমক দি অখিল গগৈয়ে কয় যে, ৰাইজৰ দলক উজনি অসমৰ আসন লাগিবই।উজনি অসমত আসন এৰি নিদিলে মিত্ৰতা নহ’ব ।আৰু কংগ্ৰেছে যদি কেনেবাকৈ উজনি অসমত বাধা আৰোপ কৰে তেন্তে দিগদাৰ হ’ব।
অখিল গগৈয়ে কয় যে, নাওবৈচা, চিচিবৰগাওঁ, ধেমাজি, ডিমৌ, মৰিয়নি এইসমূহ ছিট আমাক লাগিব। কংগ্ৰেছৰ ওচৰত সময় আছে কিন্তু আমাৰ ওচৰত নাই।বিৰোধী দল হিচাপে তেওঁলোকে ১০০ খন আসনেই ব্লক কৰিলে। কিন্তু তাৰ পিছতো ২৬টা ছিটত তেওঁলোকে খোৱা-কামোৰা কৰি আছে।
তেওঁ লগতে কয় যে, বিৰোধীৰ মিত্ৰতা সন্দৰ্ভত এতিয়াও স্থিতি ঠিৰাং হোৱা নাই। কংগ্ৰেছৰ নেতাক কেৱল নিজৰ প্ৰাৰ্থী লাগে।কংগ্ৰেছৰ প্ৰক্ৰিয়াটো খুব জটিল।আমাক খেলিব নোৱাৰা ছীট দি লাভ নাই।অৱশ্যে কংগ্ৰেছৰ লগত আমাৰ মিত্ৰতা ছেদ হোৱা নাই। কিন্তু কংগ্ৰেছে আমাৰ কথা নামানিলে আমি নিজেই নিজৰ সিদ্ধান্ত ল’ম।
লগতে পঢ়ক: “কংগ্ৰেছত যি সন্মান ৩২ বছৰে নাপালো, বিজেপিত ৩২ ঘন্টাতে পালো”: ভূপেন বৰা
