বাংলাদেশত ক্ৰমে তব্ৰতৰ হৈ পৰিছে ভাৰত বিৰোধী প্ৰতিবাদ । কেৱল ইউনুছ চৰকাৰেই নহয় দেশখনত ভাৰত বিৰোধী ঢৌ সৃষ্টিৰ আঁৰৰ আন কেতবোৰ কাৰণো আছে…
বাংলাদেশত মহম্মদ ইউনুছৰ অন্তৱৰ্তীকালীন চৰকাৰ ক্ষমতালৈ অহাৰ প্ৰায় ডেৰ বছৰ পাৰ হৈ গ’ল যদিও দেশখনত ৰাজনৈতিক অস্থিৰতা, হিংসা, উগ্ৰবাদ এতিয়াও শাম কটা নাই । মহম্মদ ইউনুছক সমৰ্থন কৰা চৰমপন্থী গোটসমূহে চৰকাৰক সংস্কাৰত বিলম্ব কৰা, ন্যায় অস্বীকাৰ কৰা আৰু ধৰ্মনিৰপেক্ষ নীতি অনুসৰণ কৰাৰ অভিযোগ উত্থাপন কৰিছে । ইনকিলাব মঞ্চৰ মুখপাত্ৰ শ্বৰীফ ওছমান হাদীৰ হত্যাকাণ্ডই হিংসাত্মক পৰিস্থিতি আৰু অধিক তীব্ৰতৰ কৰি তুলিছে ।
বিশেষজ্ঞসকলৰ মতে, ২০২৬ চনৰ ফেব্ৰুৱাৰী মাহৰ নিৰ্বাচনৰ পূৰ্বে এই শক্তিসমূহে এতিয়া অস্থিৰতা সৃষ্টিৰ চেষ্টা চলাইছে, যাৰ ফলত বাংলাদেশী সংখ্যালঘু অৰ্থাৎ হিন্দুসকলৰ ওপৰত আক্ৰমণ বৃদ্ধি পাইছে । ৰাষ্ট্ৰসংঘৰ মানৱ অধিকাৰৰ প্ৰতিবেদন অনুসৰি ২০২৪ চনৰ আগষ্টৰ পৰা ২০২৫ চনৰ মাৰ্চলৈকে ২৩২৬টাতকৈও অধিক গোচৰ পঞ্জীয়ন হৈছিল, য’ত মন্দিৰত আক্ৰমণ, সম্পত্তি লুণ্ঠন, হত্যা আদি আন্তৰ্ভূক্ত আছে ।
বাংলাদেশত ক্ৰমবৰ্ধমান উগ্ৰবাদ কেৱল ইউনুছ চৰকাৰৰ বাবেই নহয়, ইয়াৰ আঁৰত প্ৰধান পাঁচ খলনায়ক আছে-
-উগ্ৰবাদৰ প্ৰচাৰ কৰা জামাত-ই-ইছলামী
এই গোটটোৰ ওপৰত শ্বেখ হাছিনাৰ কাৰ্যকালত নিষেধাজ্ঞা আৰোপ কৰা হৈছিল যদিও ক্ষমতালৈ অহাৰ লগে লগে ইউনুছে এই নিষেধাজ্ঞা উঠাই লয় । এতিয়া এই গোটটোৱে নিৰ্বাচনী সংস্কাৰৰ দাবী উত্থাপন কৰিছে যদিও সংখ্যালঘুৰ ওপৰত আক্ৰমণ আৰু ভাৰত বিৰোধী প্ৰতিবাদতো সক্ৰিয় হৈ পৰিছে । জামাত-ই-ইছলামীৰ বিৰুদ্ধে পাকিস্তানৰ চোৰাংচোৱা সংস্থা আই এছ আইৰ সৈতে সম্পৰ্ক থকাৰো অভিযোগ উত্থাপন হৈছে । বিশেষজ্ঞসকলৰ মতে হাদীৰ হত্যাৰ ফলত জামাত-ই-ইছলামীৰ লাভ হ’ব ।
-শ্বৰীয়ত আইন প্ৰৱৰ্তন কৰিব বিচাৰিছে হেফাজাত ই ইছলামে
ইষ্ট এছিয়া ফ’ৰামৰ এক প্ৰতিবেদন অনুসৰি এই গোটটো চুন্নী ইছলামিক আৰু তেওঁলোকৰ বিশাল মাদ্ৰাছা নেটৱৰ্ক আৰু সমৰ্থকৰে গঠিত, যিয়ে মহিলাৰ অধিকাৰ আৰু ধৰ্মনিৰপেক্ষ সংস্কাৰৰ বিৰুদ্ধে কাম কৰে । মহিলাৰ সম সম্পত্তিৰ অধিকাৰৰ প্ৰস্তাৱক লৈ হেফাজাত-ই-ইছলামে বৃহৎ প্ৰতিবাদ সাব্যস্ত কৰিছে । বাংলাদেশত শ্বৰীয়ত আইন প্ৰণয়নৰ বাবে হেঁচা প্ৰয়োগ কৰাৰ সময়তে গোটটোৰ নেতা মামুনুল হকে ইউনুছকো সাক্ষাৎ কৰে । শ্বেখ হাছিনাই এই গোটটো নিষিদ্ধ কৰিছিল যদিও ইউনুছৰ চৰকাৰৰ অধীনত এই গোটটো মুকলি কৰি দিয়া হৈছিল ।
-বাংলাদেশত আইছিছৰ পতাকা উত্তোলন কৰা হিজবুৎ তাহৰিৰ
এছ ৰাজাৰত্নম স্কুল অৱ ইণ্টাৰনেশ্যনেল ষ্টাডিজৰ এক প্ৰতিবেদন অনুসৰি ছ’চিয়েল মিডিয়া আৰু শিক্ষানুষ্ঠানৰ জৰিয়তে বাংলাদেশী যুৱক-যুৱতীক নিযুক্তি দি হিজবুৎ তাহৰিৰে দ্ৰুতগতিত সম্প্ৰসাৰণ কৰিছে । ২০০৯ চনত এই গোটটো নিষিদ্ধ কৰা হৈছিল যদিও ২০২৪ চনত ইউনুছ চৰকাৰে নিষেধাজ্ঞা প্ৰত্যাহাৰ কৰিছিল । এই গোটত খিলাফত আৰু শ্বৰীয়ত আইন পুনৰুদ্ধাৰৰ আহ্বান জনোৱা হৈছে । ইউনুছৰ কাৰ্যকালত ২০২৪ চনত হিজবুত তাহৰিৰে ঢাকাত বৃহৎ বিক্ষোভ প্ৰদৰ্শন কৰি আইছিছৰ দৰে পতাকা উত্তোলন কৰিছিল । ইয়াক ৰোধ কৰাত ব্যৰ্থ হোৱাৰ অভিযোগ উত্থাপন হৈছে ইউনুছ চৰকাৰৰ বিৰুদ্ধে ।
উগ্ৰ ইছলামিক সংস্কৃতিৰ পোষকতা কৰা ইনকিইলাব মঞ্চ-
আল জাজিৰাৰ এক প্ৰতিবেদন অনুসৰি ২০২৪ চনৰ জুলাই মাহত ছাত্ৰ-ছাত্ৰীৰ প্ৰতিবাদৰ পিছত এই গোটটো প্ৰতিষ্ঠা কৰা হৈছিল । ইনকিলাব মঞ্চৰ বিশিষ্ট নেতা শ্বৰীফ উছমান হাদী নিজেও ভাৰত বিৰোধী আৰু উগ্ৰ মতামত ৰাখিছিল । হাদীৰ হত্যাৰ পিছত ইনকিলাব মঞ্চই ইউনুছ চৰকাৰক উৎখাত কৰাৰ ভাবুকি দিছিল । পূৰ্বে এই গোটটোৱে ইউনুছক সমৰ্থন কৰিছিল যদিও এতিয়া চৰকাৰ আৰু ইনকিলাব মঞ্চৰ মাজত প্ৰত্যক্ষ সংঘাত । ফলত হাদীৰ মৃত্যুৰ পিছত হিংসাত্মক পৰিস্থিতিৰ সৃষ্টি হয়, যাৰ ফলত বাতৰি কাকতৰ কাৰ্যালয় জ্বলাই দিয়া হয় । ইনকিলাব মঞ্চেই দেশত এক উগ্ৰ ইছলামিক সংস্কৃতি জাপি দিব বিচাৰে ।
-মামুনুল হক আৰু মুফতি জাচিমুদ্দিন ৰহমানীৰ প্ৰভাৱ
ইউনুছ চৰকাৰৰ দিনত মুকলি কৰি দিয়া আল কায়দাৰ সৈতে জড়িত এটা গোটৰ নেতা আছিল মুফতি জাছিমুদ্দিন ৰহমানী । ৰহমানীয়ে আল কায়দাৰ সৈতে জড়িত সন্ত্ৰাসবাদী সংগঠন আনছাৰুল্লাহ বাংলা টিমৰ মুৰব্বী । এই সন্ত্ৰাসবাদীৰ মুক্তিয়ে ভাৰতৰ বাবে প্ৰত্যাহ্বানৰ সৃষ্টি কৰিছে, কিয়নো সন্ত্ৰাসবাদী সংগঠনটোৱে শ্লীপাৰ চেলৰ জৰিয়তে জেহাদী নেটৱৰ্ক গঢ়ি তোলাৰ চেষ্টা চলাইছে ।
হিংসাৰ উচটনি দিয়াৰ অপৰাধত কাৰাগাৰত বন্দী হৈছিল মামুনুল হক যদিও পিছত মুকলি কৰি দিয়া হৈছিল আৰু এতিয়া সক্ৰিয় হৈ আছে । মামুনুল হকক বাংলাদেশৰ এজন নেতা হিচাপে গণ্য কৰা হয় যিয়ে চৰকাৰী নীতিত ইছলামিক নীতি ৰূপায়ণ কৰে, শ্বৰীয়ত আইনৰ পোষকতা কৰে, আৰু পৰম্পৰাগত ইছলামিক প্ৰথাক প্ৰচাৰ কৰে ।
ভাৰতৰ বিৰুদ্ধে বিয়পাইছে বিষ-
এই গোটসমূহে সামূহিকভাৱে শ্বৰীয়ত আইনৰ অধীনত সংস্কাৰ, মহিলাৰ অধিকাৰৰ ওপৰত বাধা আৰোপ, ভাৰত বিৰোধী শ্লোগান আদিৰ বাবে ঠেলি দিছে । কেইবাটাও প্ৰতিবেদনত এই গোটসমূহৰ সম্পৰ্ক পাকিস্তান আৰু অন্যান্য বিদেশী শক্তিৰ সৈতে জড়িত বুলি কোৱা হৈছে । এই শক্তিসমূহক নিয়ন্ত্ৰণত ব্যৰ্থ হোৱাৰ বাবে ইউনুছ চৰকাৰৰ বিৰুদ্ধে অভিযোগ ক্ৰমাৎ বৃদ্ধি পাইছে, যাৰ ফলত সংখ্যালঘুৰ ওপৰত আক্ৰমণ বৃদ্ধি পাইছে আৰু দেশত অস্থিৰতা বৃদ্ধি পাইছে ।
