বাংলাদেশত সংখ্যালঘুৰ ওপৰত নিৰন্তৰভাৱে চলি থকা অত্যাচাৰ, নিৰ্যাতনৰ বিৰুদ্ধে ৰাজপথত নামিল হিন্দু সংগঠন । দেশখনত সংখ্যালঘুৰ সুৰক্ষা নিশ্টিত কৰাৰ লগতে দোষীৰ কঠোৰ শাস্তিৰ দাবী কৰে প্ৰতিবাদকাৰীসকলে ।
বাংলাদেশৰ ৰাজধানী ঢাকাত সংখ্যালঘুৰ ওপৰত চলি থকা অত্যাচাৰ আৰু দীপু দাসৰ গণ হত্যাৰ বিৰুদ্ধে প্ৰতিবাদ সাব্যস্ত কৰে হিন্দু সংগঠনে । প্ৰতিবাদকাৰীসকলে দোষীৰ বিৰুদ্ধে কঠোৰ ব্যৱস্থা গ্ৰহণৰ দাবী জনাই সংখ্যালঘুৰ সুৰক্ষা সুনিশ্চিত কৰিবলৈ চৰকাৰক আহ্বান জনায় ।
ইফালে, ইনকিলাব মঞ্চৰ মুখপাত্ৰ শ্বৰীফ ওছমান হাদীৰ হত্যাকাণ্ড সন্দৰ্ভত আৰক্ষীয়ে মূল অভিযুক্ত ফৈছাল কৰিম মাছুদৰ বিৰুদ্ধে লুকাউট নোটিচ জাৰি কৰিছে । লগতে ঢাকাৰ আদালতে মাছুদৰ ওপৰত যাতায়ত নিষেধাজ্ঞা আৰোপ কৰিছে । তদন্তকাৰী সংস্থাৰ মতে, তেওঁ বাংলাদেশত আত্মগোপন কৰি আছে আৰু অহৰহ স্থান সলনি কৰি আছে ।
দেওবাৰে যমুনাস্থিত ৰাজ্যিক অতিথিশালাত মুখ্য উপদেষ্টা অধ্যাপক মহম্মদ ইউনুছৰ অধ্যক্ষতাত এখন আইন-শৃংখলা পৰ্যালোচনা বৈঠক অনুষ্ঠিত হয় । এই বৈঠকত গৃহ উপদেষ্টা, ৰাষ্ট্ৰীয় নিৰাপত্তা উপদেষ্টা আৰু শীৰ্ষ নিৰাপত্তাৰক্ষী বিষয়াসকল উপস্থিত থাকে । হাদী হত্যাকাণ্ড আৰু সংবাদ মাধ্যম আৰু সাংস্কৃতিক সংগঠনৰ ওপৰত আক্ৰমণৰ তদন্তৰ অগ্ৰগতিৰ পৰ্যালোচনা কৰা হয় ।
আৰক্ষীয়ে জনোৱা মতে, ভিডিঅ’ ফুটেজৰ ভিত্তিত ৩১ জন লোকক চিনাক্ত কৰা হৈছে আৰু এতিয়ালৈকে ৬ জন সন্দেহযুক্ত লোকক গ্ৰেপ্তাৰ কৰা হৈছে । ইয়াৰ উপৰিও চট্টগ্ৰামৰ ভাৰতীয় সহকাৰী উচ্চায়ুক্তৰ সমীপত অশান্তিৰ সৃষ্টি কৰিবলৈ চেষ্টা কৰা লোকসকলকো চিনাক্ত কৰা হৈছে ।
আগন্তুক ৰাষ্ট্ৰীয় নিৰ্বাচন, বৰদিন আৰু নৱবৰ্ষৰ উদযাপনৰ পূৰ্বে যিকোনো পৰ্য়ায়ত আইন-শৃংখলা বজাই ৰাখিবলৈ আৰু সকলো অভিযুক্তক ক্ষীপ্ৰ গতিৰে গ্ৰেপ্তাৰ নিশ্চিত কৰিবলৈ মুখ্য উপদেষ্টাগৰাকীয়ে স্পষ্ট নিৰ্দেশনা দিছে ।
লগতে পঢ়ক : বাংলাদেশত সংখ্যালঘুৰ ওপৰত সংঘটিত আক্রমণক লৈ উদ্বেগ প্রকাশ ভাৰতৰ
