এন ডি এৰ বিধায়িনী দলৰ নেতা নিৰ্বাচিত হ’ব নীতিশ কুমাৰ
দশম বাৰৰ বাবে নীতিশ কুমাৰে বিহাৰৰ মুখ্যমন্ত্ৰী হিচাপে শপত লোৱাৰ পথ মুকলি হৈছে । বুধবাৰে তেওঁ প্ৰথমে জেডিইউৰ বিধায়িনী দলৰ নেতা নিৰ্বাচিত হ’ব । তাৰ পিছত বিজেপি বিধায়িনী দলৰ বৈঠকৰ অন্তত একেদিনাই এন ডি এৰ বিধায়িনী দলৰ নেতা নিৰ্বাচিত হ’ব । ইফালে, মঙলবাৰে গৃহমন্ত্ৰী অমিত শ্বাহৰ সৈতে জেডিইউৰ কাৰ্যকৰী সভাপতি সঞ্জয় ঝা আৰু কেন্দ্ৰীয় মন্ত্ৰী ৰাজীৱ ৰঞ্জন, (যি লল্লন সিঙ নামেৰেও পৰিচিত)ৰ মাজত তিনি ঘণ্টীয়া মাৰাথন বৈঠকত মন্ত্ৰালয় বিভাজন সন্দৰ্ভতো একমত হয় ।
বিধানসভাৰ অধ্যক্ষৰ পদ পূৰ্বৰ দৰেই বিজেপিৰ হাতত থাকিব । এই পদৰ বাবে বিজেপিৰ জ্যেষ্ঠ বিধায়ক প্ৰেম কুমাৰৰ নাম চৰ্চা হৈছে । নীতিশক নেতা হিচাপে নিৰ্বাচিত কৰিবলৈ আহ্বান কৰা এন ডি এৰ বিধায়িনী দলৰ বৈঠকতো উপস্থিত থাকিব গৃহমন্ত্ৰী অমিত শ্বাহ । বৃহস্পতিবাৰে বিয়লি গান্ধী ময়দানত অনুষ্ঠিত হ’ব শপতগ্ৰহণ অনুষ্ঠান । প্ৰধানমন্ত্ৰী মোদী, এন ডি এৰ সকলো মিত্ৰ দলৰ নেতা, এন ডি এ শাসিত ৰাজ্যৰ মুখ্যমন্ত্ৰীকে ধৰি সকলো দলৰ জ্যেষ্ঠ নেতা উপস্থিত থাকিব ।
প্ৰস্তুতিৰ পৰ্যালোচনা নীতিশ কুমাৰৰ-
ইফালে গান্ধী ময়দানত উপস্থিত হৈ শপতগ্ৰহণৰ প্ৰস্তুতি পুনৰীক্ষণ কৰে মুখ্যমন্ত্ৰী নীতিশ কুমাৰ । ২০ নৱেম্বৰত অনুষ্ঠিত হ’বলগীয়া এই অনুষ্ঠানটো ৰাজনৈতিকভাৱে তাৎপৰ্যপূৰ্ণ বুলি বিবেচিত হৈছে, কিয়নো দশমবাৰৰ বাবে ক্ষমতা দখল কৰিবলৈ সাজু হৈছে নীতিশ কুমাৰ । নতুন চৰকাৰ গঠন আৰু এন ডি এৰ শক্তিশালী কৌশলগত স্থিতিৰ লগে লগে এই অনুষ্ঠানক এক ভব্য অনুষ্ঠান কৰাৰ প্ৰস্তুতি অব্যাহত আছে । মুখ্যমন্ত্ৰীয়ে মঞ্চ নিৰ্মাণ, ভিভিআইপি আসনৰ ব্যৱস্থা, নিৰাপত্তা ঘেৰা, অতিথি পথ নিৰ্ধাৰণ, আৰু ভিৰ ব্যৱস্থাপনাৰ পৰ্যালোচনা কৰি বিষয়াসকলক প্ৰয়োজনীয় নিৰ্দেশনা জাৰি কৰে ।
লগতে পঢ়ক : দশমবাৰলৈ মুখ্যমন্ত্ৰীৰ আসনত! শপত গ্ৰহণৰ প্ৰস্তুতিৰ বুজ ল’লে নীতিশ কুমাৰে
