ছুপাৰ মাৰ্কেটত ভয়ংকৰ বিস্ফোৰণ
মেক্সিকোৰ উত্তৰ-পশ্চিম ৰাজ্য ছ’নোৰাৰ ৰাজধানী হাৰ্মোচিলোৰ এখন ষ্ট’ৰত সংঘটিত হৈছে এক বৃহৎ ঘটনা । এই ঘটনাত ভয়ংকৰ বিস্ফোৰণত সংঘটিত হোৱা অগ্নিকাণ্ডৰ ফলত কেইবাটাও শিশুকে ধৰি কমেও ২৩ জন লোকৰ মৃত্যু হোৱাৰ লগতে ১২ জন লোক গুৰুতৰভাৱে আহত হোৱা বুলি জানিব পৰা গৈছে ।
এই দুৰ্ঘটনা সংঘটিত হয় মহানগৰীৰ ভালডোছ ষ্ট’ৰত । ছ’চিয়েল মিডিয়াত প্ৰকাশ পোৱা এটা ভিডিঅ’যোগে ছ’নোৰাৰ গৱৰ্ণৰ আলফনছ’ ডুৰাজোৱে এই কথা নিশ্চিত কৰি নিহতসকলৰ পৰিয়াললৈ সমবেদনা জ্ঞাপন কৰে ।
ৰাজ্যখনৰ এটৰ্নী জেনেৰেল গুস্তাভো চালাছ চাভেজে কয় যে প্ৰাৰম্ভিক তদন্তত দেখা গৈছে যে বিষাক্ত গেছ উশাহত যোৱাৰ ফলতে এই লোকসকলৰ মৃত্যু হৈছে । তেওঁ কয় যে বৰ্তমান কোনো দুৰ্বৃত্তই এই ঘটনা সংঘটিত কৰাৰ কোনো ইংগিত পোৱা নাই যদিও এই সম্ভাৱনা নুই কৰিব নোৱাৰি । এই কাণ্ডৰ পিছতে ১২ জন আহত লোকক হাৰ্মোচিলোৰ ছখন চিকিৎসালয়ত ভৰ্তি কৰোৱা হৈছে আৰু বৰ্তমান তেওঁলোকৰ চিকিৎসা চলি আছে । দেশখনৰ ৰাষ্ট্ৰপতিয়ে এই ঘটনাক লৈ শোক প্ৰকাশ কৰাৰ লগতে আহত সকলৰ আশু আৰোগ্য কামনা কৰিছে ।
লগতে পঢ়ক : বিফল শান্তি চুক্তি ! গাজাত পুনৰ ইজৰাইলৰ এয়াৰ ষ্ট্ৰাইক
