প্ৰধানমন্ত্ৰী নৰেন্দ্ৰ মোদীয়ে দেওবাৰে (৬ এপ্ৰিল ২০২৫) তামিলনাডু ভ্ৰমণ কৰি ৰাম নৱমী উপলক্ষে দিনৰ প্ৰায় ১২ বজাত ভাৰতৰ প্ৰথমখন উলম্ব লিফ্ট সাগৰীয় দলং – নতুন পাম্বন ৰেল দলং উদ্বোধন কৰিব । প্ৰধানমন্ত্ৰীৰ কাৰ্যালয়ে এক বিবৃতিত এই তথ্য প্ৰদান কৰে ।
প্ৰধানমন্ত্ৰী কাৰ্যালয়ে জাৰি কৰা এক বিবৃতি অনুসৰি প্ৰধানমন্ত্ৰী মোদীয়ে পথ দলঙৰ পৰা এখন ৰে’ল আৰু এখন জাহাজৰ ফ্লেগ অফ কৰিব আৰু দলংখনৰ পৰিচালনাৰ তদাৰক কৰিব । দলংখন উদ্বোধন কৰাৰ পাছত তেওঁ ৰামেশ্বৰমৰ ৰামনাথস্বামী মন্দিৰ পৰিদৰ্শন আৰু পূজা কৰিব । প্ৰধানমন্ত্ৰী কাৰ্যালয়ে এক বিবৃতিত কয় যে এই দলংখনৰ সাংস্কৃতিক তাৎপৰ্য গভীৰ । ৰামায়ণৰ তথ্য অনুসৰি ৰামেশ্বৰমৰ সমীপৰ ধনুষকোড়ীৰ পৰা ৰাম সেতু নিৰ্মাণৰ কাম আৰম্ভ হৈছিল ।
ৰামেশ্বৰমক মূল ভূখণ্ডৰ সৈতে সংযোগ কৰা এই দলংখন বিশ্বৰ মঞ্চত ভাৰতীয় অভিযান্ত্ৰিকতাৰ এক উল্লেখযোগ্য কৃতিত্ব হিচাপে থিয় দিছে । ৫৫০ কোটিতকৈ অধিক ব্যয় সাপেক্ষে নিৰ্মাণ কৰা হৈছে এই দলঙখন । ইয়াৰ দৈৰ্ঘ্য ২.০৮ কিলোমিটাৰ, ইয়াৰ স্পেন ৯৯ আৰু ৭২.৫ মিটাৰ উলম্ব লিফ্ট স্পেন আছে যিটো ১৭ মিটাৰ উচ্চতালৈ উঠি যায় । ইয়াৰ ফলত জাহাজৰ মসৃণ গতিবিধিৰ সুবিধা হয় আৰু লগতে নিৰৱচ্ছিন্নভাৱে ৰে’লৰ চলাচল নিশ্চিত হয় ।
ষ্টেইনলেছ ষ্টীলৰ শক্তিবৰ্ধক, উচ্চ গ্ৰেডৰ সুৰক্ষামূলক ৰং আৰু সম্পূৰ্ণৰূপে ৱেল্ডিং কৰা সংযোগেৰে নিৰ্মিত এই দলংখনৰ স্থায়িত্ব অধিক আৰু ইয়াৰ ৰক্ষণাবেক্ষণৰ প্ৰয়োজন কম । ভৱিষ্যতৰ চাহিদা পূৰণৰ বাবে ইয়াক দ্বৈত ৰেলপথৰ বাবে ডিজাইন কৰা হৈছে । বিশেষ পলিচিল’ক্সেন আৱৰণে ইয়াক জাৰণৰ পৰা ৰক্ষা কৰে, যাৰ ফলত কঠোৰ সাগৰীয় পৰিৱেশত দলংখনৰ দীৰ্ঘায়ু নিশ্চিত হয় ।
প্ৰধানমন্ত্ৰী কাৰ্যালয়ৰ মতে, দিনৰ প্ৰায় ১.৩০ বজাত মোদীয়ে তামিলনাডুত ৮৩০০ কোটিৰো অধিক টকাৰ বিভিন্ন ৰে’ল আৰু পথ প্ৰকল্পৰ আধাৰশিলা স্থাপন কৰি দেশৰ বাবে উৎসৰ্গা কৰিব । এই উপলক্ষে তেওঁ ৰাজহুৱা সভাতো ভাষণ দিব ।
