আমেৰিকাৰ ৰাষ্ট্ৰপতি ড’নাল্ড ট্ৰাম্পে ৰেহাইমূলক পাৰস্পৰিক শুল্ক ঘোষণা কৰিছে । ভাৰত আৰু চীনকে ধৰি অন্যান্য দেশৰ পৰা আমেৰিকালৈ যোৱা সামগ্ৰীৰ ওপৰত কিমান শুল্ক আৰোপ কৰা হ’ব সেয়া ঘোষণা কৰা হৈছে । এই নতুন শুল্ক তৎক্ষণাত কাৰ্যকৰী হৈছে । এছিয়াৰ কেইবাখনো দেশৰ ওপৰতো ৩০%ৰ পৰা ৪৫%লৈকে শুল্ক আৰোপ কৰা হৈছে ।
ট্ৰাম্পৰ ঘোষণা অনুসৰি আমেৰিকাই ভাৰতৰ পৰা ২৬ শতাংশ শুল্ক আদায় কৰিব । আনহাতে চীনৰ ওপৰত ৩৪ শতাংশ শুল্ক আৰোপ কৰা হৈছে ।
ট্ৰাম্পৰ এই ঘোষণা অনুসৰি ভাৰতৰ পৰা আমেৰিকালৈ যোৱা সামগ্ৰীৰ ওপৰত ২৬% শুল্ক আৰোপ কৰা হ’ব । একে সময়তে চীনৰ পৰা কৰা আমদানিৰ ওপৰত ৩৪% শুল্ক আৰোপ কৰা হৈছে । ইয়াৰ পৰা স্পষ্টকৈ দেখা যায় যে চীনৰ সৈতে ক্ৰমবৰ্ধমান বাণিজ্যিক ঘাটি হ্ৰাস কৰাৰ বাবে এই পদক্ষেপ গ্ৰহণ কৰা হৈছে ।
ইয়াৰ উপৰিও ট্ৰাম্প প্ৰশাসনে ভিয়েটনামৰ পৰা আমদানি কৰা সামগ্ৰীৰ ওপৰত ৪৬% শুল্ক আৰোপ কৰাৰ সিদ্ধান্ত লৈছে, যিটো সৰ্বোচ্চ হাৰত অন্যতম । ইউৰোপীয় সংঘৰ ওপৰত ২০%, চুইজাৰলেণ্ডৰ ওপৰত ৩১% আৰু টাইৱানৰ ওপৰত ৩২% শুল্ক আৰোপ কৰা হ’ব ।
কিছু আশ্বস্ত কৰা খবৰটো হ’ল যুক্তৰাজ্যৰ পৰা আমদানিৰ ওপৰত মাত্ৰ ১০% শুল্ক আৰোপ কৰা হৈছে, যিটো ৰাজনৈতিক আৰু অৰ্থনৈতিক সম্পৰ্কৰ স্থিতিশীলতাৰ বাবে হ’ব পাৰে ।
আমেৰিকা বনাম বিশ্ব : তীব্ৰতৰ শুল্ক যুদ্ধ
চীনে আমেৰিকাৰ ওপৰত ৬৭% শুল্ক আৰোপ কৰে, কিন্তু এতিয়া আমেৰিকাই ৩৪% শুল্ক আৰোপ কৰাৰ কথা ঘোষণা কৰিছে ।
টাইৱান – আমেৰিকাৰ পৰা ৬৪% শুল্ক লয়, এতিয়া আমেৰিকাই ৩২% শুল্ক আৰোপ কৰিব ।
জাপানে আমেৰিকাৰ পৰা ৪৬% শুল্ক লয়, আৰু এতিয়া আমেৰিকাই ২৪% শুল্ক আৰোপ কৰিবলৈ সাজু হৈছে ।
চুইজাৰলেণ্ড – আমেৰিকাৰ পৰা ৬১% শুল্ক লয়, এতিয়া আমেৰিকাই ৩১% শুল্ক ল’ব ।
ইজৰাইল – আমেৰিকাৰ পৰা ৩৩% শুল্ক লয়, এতিয়া আমেৰিকাই ১৭% শুল্ক আৰোপ কৰিব ।
পাকিস্তানে আমেৰিকাৰ পৰা ৫৮% শুল্ক লয়, আৰু এতিয়া আমেৰিকাই ২৯% শুল্ক আৰোপ কৰাৰ কথা ঘোষণা কৰিছে ।
বাংলাদেশে আমেৰিকাৰ পৰা ৭৪% শুল্ক লয়, এতিয়া আমেৰিকাই ৩৭% শুল্ক আৰোপ কৰিবলৈ ওলাইছে ।
থাইলেণ্ড – আমেৰিকাৰ পৰা ৭২% শুল্ক লয়, এতিয়া আমেৰিকাই ৩৬% শুল্ক আৰোপ কৰিব ।
