মুখ্যমন্ত্ৰী ড০ হিমন্ত বিশ্ব শৰ্মাই বেংকিং সেৱাত অসমৰ মহিলাৰ প্ৰৱেশাধিকাৰক লৈ এক তথ্য প্ৰকাশ কৰিছে।
অসমৰ মুখ্যমন্ত্ৰী ড০ হিমন্ত বিশ্ব শৰ্মাই ৰাজ্যখনৰ বিত্তীয় অন্তৰ্ভুক্তিকৰণৰ প্ৰগতিক লৈ এক্স প্লেটফৰ্মত এক তথ্য শ্বেয়াৰ কৰিছে।মুখ্যমন্ত্ৰীগৰাকীয়ে এই সাফল্যক বিত্তীয় অন্তৰ্ভুক্তিকৰণৰ দিশত অসমৰ যাত্ৰাত এক গুৰুত্বপূৰ্ণ মাইলৰ খুঁটি হিচাপে অভিহিত কৰে। মুখ্যমন্ত্ৰী গৰাকীয়ে কয় যে অসমৰ ৯১.৭ শতাংশ মহিলাই এতিয়া আনুষ্ঠানিক বেংকিং ব্যৱস্থাৰ সৈতে জড়িত হৈ পৰিছে।
তেওঁ লগতে কয়, বেংকিং সেৱাত মহিলাৰ প্ৰৱেশাধিকাৰ সম্প্ৰসাৰিত হোৱাৰ ফলত পৰিয়ালসমূহ শক্তিশালী কৰা আৰু সমগ্ৰ ৰাজ্যতে সামগ্ৰিক উন্নয়নক প্ৰসাৰিত কৰাত এক গুৰুত্বপূৰ্ণ ভূমিকা পালন কৰিছে।
মুখ্যমন্ত্ৰী গৰাকীয়ে লিখিছে, “যেতিয়া এগৰাকী মহিলাই বেংকিং সেৱাৰ সুবিধা লাভ কৰে, তেতিয়া এটা সমগ্ৰ পৰিয়াল আগবাঢ়ি যায়। আজি অসমৰ ৯১.৭% মহিলা আনুষ্ঠানিক বেংকিং ব্যৱস্থাৰ অংশীদাৰ, যিটো আমাৰ ‘নাৰী শক্তি’ সৱলীকৰণ আৰু প্ৰতিটো পৰিয়ালত উন্নয়ন নিশ্চিত কৰাৰ প্ৰতিশ্ৰুতিৰ এক প্ৰমাণ।”
তেওঁ উল্লেখ কৰে যে ৰাজ্যখনৰ গৰিষ্ঠসংখ্যক মহিলাৰ হাতত এতিয়া সঞ্চয়ী বেংক একাউণ্ট আৰু পাছবুক আছে, যাৰ ফলত চৰকাৰী সা-সুবিধা, সঞ্চয়ৰ ব্যৱস্থা আৰু বিত্তীয় সেৱাসমূহ লাভ কৰাটো অধিক সহজ হৈ পৰিছে।
এই অগ্ৰগতিয়ে বেংকিং সেৱাৰ সম্প্ৰসাৰণ, বিত্তীয় সাক্ষৰতাৰ প্ৰসাৰ আৰু আনুষ্ঠানিক অৰ্থনীতিত পোনপটীয়া অংশগ্ৰহণৰ জৰিয়তে মহিলাসকলক সৱলীকৰণ কৰাৰ বাবে ৰাজ্য তথা কেন্দ্ৰীয় চৰকাৰে চলাই থকা প্ৰচেষ্টাক প্ৰতিফলিত কৰিছে।অসমত মহিলাৰ সৱলীকৰণ আৰু সামগ্ৰিক বিকাশৰ ওপৰত চৰকাৰে দিয়া ব্যাপক গুৰুত্বৰ অংশ হিচাপে মুখ্যমন্ত্ৰী শৰ্মাই এই পৰিসংখ্যা শ্বেয়াৰ কৰে।
লগতে পঢ়ক: দিল্লীত কেন্দ্ৰীয় মন্ত্ৰী জে পি নাড্ডা আৰু পিয়ুষ গোৱেলক সাক্ষাৎ মুখ্যমন্ত্ৰী হিমন্ত বিশ্ব শৰ্মাৰ
