আন্তঃৰাষ্ট্ৰীয় খ্যাতিসম্পন্ন আমেৰিকা যুক্তৰাষ্ট্ৰৰ ‘জাৰ্নেল অৱ ভইচ’-ত প্ৰকাশ পাইছে জুবিন গাৰ্গৰ এই বিশেষ কণ্ঠশৈলীক লৈ কৰা এক গুৰুত্বপূৰ্ণ গৱেষণা পত্ৰিকা
হাৰ্টথ্ৰব জুবিন গাৰ্গৰ কণ্ঠৰ যাদুৰ কথা নতুনকৈ কোৱাৰ প্ৰয়োজন নাই । তেওঁৰ গীতৰ দৰেই অনুৰাগীৰ মাজত অত্যন্ত জনপ্ৰিয় তেওঁৰ স্বকীয় ‘হামিং’ (Humming) । কিন্তু এই ‘হামিঙ’ৰ আঁৰত থকা আচল ৰহস্য কি ? ই কিয় ইমান মৰ্মস্পৰ্শী আৰু শ্ৰোতাৰ বাবে ইমান প্ৰিয় ? এই সকলোবোৰ কথাৰ এতিয়া ওলাইছে এক বৈজ্ঞানিক ব্যাখ্যা । আন্তঃৰাষ্ট্ৰীয় খ্যাতিসম্পন্ন আমেৰিকা যুক্তৰাষ্ট্ৰৰ ‘জাৰ্নেল অৱ ভইচ’-ত প্ৰকাশ পাইছে জুবিন গাৰ্গৰ এই বিশেষ কণ্ঠশৈলীক লৈ কৰা এক গুৰুত্বপূৰ্ণ গৱেষণা পত্ৰিকা ।
শনিবাৰে শিল্পীগৰাকীৰ পত্নী গৰিমা গাৰ্গে ফেচবুকৰ এটা পোষ্টৰ জৰিয়তে এই গৱেষণা সবিশেষ শ্বেয়াৰ কৰে ।
কেনেকৈ হৈছিল এই বৈজ্ঞানিক পৰীক্ষা ?
প্ৰাপ্ত তথ্য অনুসৰি, এই বিশেষ অধ্যয়নটো সম্পূৰ্ণ স্বতন্ত্ৰভাৱে চলোৱা হৈছিল অসমৰ সন্দিকৈ ছোৱালী মহাবিদ্যালয়ৰ পদাৰ্থ বিজ্ঞান বিভাগত । গৱেষকসকলে লেৰিংগ’লজী (laryngology) আৰু কণ্ঠবিজ্ঞানৰ গৱেষণাত ব্যৱহৃত আধুনিক ধ্বনি বিশ্লেষণ পদ্ধতি আৰু উন্নত সঁজুলিৰ সহায়ত জুবিন গাৰ্গৰ গুণগুণণিৰ এক পৰিমাণগত ধ্বনিগত বিশ্লেষণ (Quantitative Acoustic Analysis) চলাইছিল ।
এই গৱেষণাত কণ্ঠস্বৰৰ বিভিন্ন গুৰুত্বপূৰ্ণ মাপকাঠী যেনে- জিতাৰ (Jitter), শ্বিমাৰ (Shimmer), হাৰমনিক-টু-নয়েজ ৰেডিঅ’ (HNR), টিম্ব্ৰেল (Timbral) বৈশিষ্ট্যসমূহ সূক্ষ্মভাৱে পৰীক্ষা কৰা হৈছিল ।
গৱেষণাত পোহৰলৈ অহা মূল তথ্যসমূহ :
সুস্থিৰ কণ্ঠস্বৰৰ আৰ্হি : জুবিন গাৰ্গৰ ‘হামিং’ এক অত্যন্ত সুস্থিৰ কণ্ঠস্বৰৰ আৰ্হি (Stable vocal pattern) আৰু নিম্ন ফাণ্ডামেণ্টেল ফ্ৰিকুৱেন্সী (Lower fundamental frequency) দ্বাৰা সমৃদ্ধ ।
আবেগিক প্ৰভাৱ : ইয়াৰ স্বকীয় টিম্ব্ৰেল গুণাগুণৰ বাবেই তেওঁৰ হামিঙে শ্ৰোতাৰ হৃদয় স্পৰ্শ কৰিব পাৰে আৰু এক মৰ্মস্পৰ্শী তথা আবেগিকভাৱে প্ৰভাৱশালী পৰিৱেশৰ সৃষ্টি কৰে ।
সাধাৰণ গায়নশৈীতকৈ পৃথক : গৱেষকসকলে লাভ কৰা পৰিসংখ্যাগত পাৰ্থক্যই প্ৰমাণ কৰিছে যে তেওঁৰ হামিঙৰ কৌশল Conventional Singing বা পৰম্পৰাগত গায়নশৈীতকৈ বহু পৃথক ।
এক ঐতিহাসিক খোজ : আমেৰিকাৰ ‘দা ভইচ ফাউণ্ডেশ্যন’ আৰু ‘ইণ্টাৰনেশ্যনেল এছ’চিয়েশ্যন অৱ ফোন’ছাৰ্জাৰী’ৰ আধিকাৰিক পত্ৰিকাত প্ৰকাশ পোৱা এই অধ্যয়নটোক জুবিন গাৰ্গৰ হামিং কৌশলৰ প্ৰথমটো প্ৰণালীবদ্ধ বৈজ্ঞানিক পৰীক্ষা (Systematic Scientific Examination) বুলি অভিহিত কৰা হৈছে ।
গৱেষকসকলৰ মতে, এই কাৰ্যই কলাত্মক প্ৰকাশভংগী আৰু কণ্ঠবিজ্ঞানৰ মাজৰ ব্যৱধান দূৰ কৰাত এক ডাঙৰ ভূমিকা ল’ব । এই ফলাফলে ভৱিষ্যতে কণ্ঠবিজ্ঞান, সংগীতবিজ্ঞান আৰু ধ্বনিবিজ্ঞানৰ গৱেষণাত এক নতুন মাত্ৰা প্ৰদান কৰাৰ লগতে এক আন্তঃৰাষ্ট্ৰীয় বৈজ্ঞানিক মঞ্চত অসমৰ সমসাময়িক সংগীত ঐতিহ্যক এক সুকীয়া মৰ্যাদা প্ৰদান কৰিব ।
লগতে পঢ়ক : দ্বিতীয় ৰাজধানীলৈ পৰিণত হ’ব ডিব্ৰুগড়;নতুন কেবিনটৰ ডাঙৰ সিদ্ধান্ত
