পাঁচখনীয়া খেলৰ টেষ্ট শৃংখলাৰ দ্বিতীয়খন মেচ অহা ৬ ডিচেম্বৰৰ পৰা এডিলেইডত ভাৰত আৰু অষ্ট্ৰেলিয়াৰ মাজত অনুষ্ঠিত হ’ব । এই টেষ্টখন দিবা-নৈশ, সেইবাবেই গুলপীয়া বলৰ সৈতে খেলিব লাগিব দল দুটাই । এই মেচৰ বাবে দুয়োটা দল এডিলেইডত উপস্থিত হৈছে আৰু অনুশীলনো আৰম্ভ কৰিছে । নিয়মীয়া অধিনায়ক ৰোহিত শৰ্মাও এই টেষ্টত দললৈ উভতি আহিছে । অৱশ্যে ৰোহিতে ইনিংছ মুকলি নকৰে বুলি অনুমান কৰা হৈছে ।

যদি আমি এডিলেইডত টিম ইণ্ডিয়াৰ অনুশীলন আৰু প্ৰধানমন্ত্ৰী একাদশৰ বিৰুদ্ধে খেলখন চাওঁ, তেন্তে প্ৰায় স্পষ্ট যে যশস্বী জয়ছোৱাল আৰু কে এল ৰাহুলে দ্বিতীয়খন টেষ্টতো অ’পেনিং কৰিব । এই দুগৰাকী বেটছমেনে পাৰ্থত খেলা প্ৰথমখন টেষ্টত ভাৰতৰ জয়ৰ ভেটি স্থাপন কৰিছিল । এনে পৰিস্থিতিত অধিনায়ক ৰোহিতক মিডল অৰ্ডাৰত খেলা দেখা যাব পাৰে ।

শুভমন গীল এতিয়া ফিট হৈ পৰিছে । প্ৰধানমন্ত্ৰী একাদশৰ বিৰুদ্ধে খেলখনত তিনি নম্বৰ স্থানত বেটিং কৰিবলৈ আহিছিল তেওঁ । এনে পৰিস্থিতিত তেওঁ যে এডিলেইডত খেলিব সেয়া নিশ্চিত । পাৰ্থৰ ‘শতকবীৰ’ বিৰাট কোহলীয়ে চাৰি নম্বৰ স্থানত খেলিব বুলি নিশ্চিত । ইয়াৰ পিছত দেখা যাব অধিনায়ক ৰোহিত শৰ্মাক । অৰ্থাৎ এডিলেইডত হিটমেনক পাঁচ নম্বৰত খেলা দেখা যাব পাৰে ।

ইয়াৰ পাছত উইকেটকীপাৰ ঋষভ পন্টৰ খেল নিশ্চিত । পাৰ্থত পণ্টে বিশেষ প্ৰদৰ্শন কৰিব পৰা নাছিল । কিন্তু তেওঁ নিশ্চিতভাৱে এডিলেইডত নিজৰ প্ৰতিভা দেখুৱাব বিচাৰিব । ৱাশ্বিংটন সুন্দৰেও খেলাৰ সম্ভাৱনা আছে । ইয়াৰ পিছত নীতিশ কুমাৰ ৰেড্ডীয়েও অষ্টম স্থানত খেলাটো নিশ্চিত । ইয়াৰ পিছত তিনিজন বেগী বলাৰ । ইয়াত যশপ্ৰীত বুমৰাহ, মহম্মদ চিৰাজ আৰু হৰ্ষিত ৰাণাক দেখা যাব ।

দ্বিতীয় টেষ্টত ভাৰতৰ সাম্ভাব্য মূল একাদশ-

কে এল ৰাহুল, যশস্বী জয়ছোৱাল, শুভমন গীল, বিৰাট কোহলী, ৰোহিত শৰ্মা (অধিনায়ক), ঋষভ পন্ট (উইকেটকীপাৰ), ৱাশ্বিংটন সুন্দৰ, নীতিশ কুমাৰ ৰেড্ডী, যশপ্ৰীত বুমৰাহ, মহম্মদ চিৰাজ আৰু হৰ্ষিত ৰাণা ।