শুকুৰবাৰে নেপালৰ ৰাজধানী কাঠমাণ্ডুৰ ৰাজপথত ৰাজতন্ত্ৰ সমৰ্থকসকলে তীব্ৰ প্ৰতিবাদ সাব্যস্ত কৰে । এই বিক্ষোভৰ সময়ত হিংসা, লুণ্ঠন আৰু অগ্নিসংযোগৰ ঘটনা সংঘটিত হয় য’ত দুজন লোকৰ মৃত্যু হয় । ইয়াৰ উপৰিও এই হিংসাত্মক ঘটনাত এশৰো অধিক লোক আহত হয় । ইয়াৰ পিছতে এতিয়া নেপাল চৰকাৰ আৰু ৰাজতন্ত্ৰ সমৰ্থকৰ মাজত মুখামুখি যুঁজ আৰম্ভ হৈছে । এফালে চৰকাৰে প্ৰতিবাদকাৰীসকলক সংবিধান মানি চলিবলৈ আহ্বান জনাইছে, আনফালে প্ৰাক্তন ৰজা জ্ঞানেন্দ্ৰ শ্বাহৰ সমৰ্থকসকলে নেপালত ৰাজতন্ত্ৰ পুনৰুদ্ধাৰৰ দাবীত অটল হৈ আছে ।

পুনৰ ৰাজপথত ৰাজতন্ত্ৰ সমৰ্থক-

দেওবাৰে পুনৰ কাঠমাণ্ডুৰ ৰাজপথত বিক্ষোভ প্ৰদৰ্শন কৰে জ্ঞানেন্দ্ৰ শ্বাহৰ ৰাষ্ট্ৰীয় প্ৰজাতন্ত্ৰিক পাৰ্টিয়ে । ডেম’ক্ৰেটিক পাৰ্টিৰ অভিযোগ যে শুকুৰবাৰৰ বিক্ষোভৰ পিছত বিগত দুদিনত যিসকল লোকক গ্ৰেপ্তাৰ কৰা হৈছে, তেওঁলোকৰ অধিকাংশই সেইসকল লোক যিসকলৰ বিক্ষোভৰ সৈতে কোনো সম্পৰ্ক নাই । কোনো ভূমিকা নোহোৱাকৈ এশৰো অধিক লোকক গ্ৰেপ্তাৰ কৰাৰ অভিযোগ উত্থাপন কৰি দলটোৱে তেওঁলোকক মুক্তিৰ দাবী জনাইছে । ইয়াৰ সমান্তৰালকৈ এনে লোকৰ বিৰুদ্ধে ৰুজু হোৱা গোচৰ প্ৰত্যাহাৰ কৰিবলৈয়ো দাবী উত্থাপন হৈছে । নেশ্যনেল ডেম’ক্ৰেটিক পাৰ্টিয়েও বৰ্তমানৰ অলি চৰকাৰৰ পদত্যাগৰ দাবী জনাইছে ।

আনহাতে, নেপালৰ প্ৰধানমন্ত্ৰী কে পি শৰ্মা অলিয়ে সংসদত কয় যে প্ৰাক্তন ৰজা জ্ঞানেন্দ্ৰ শ্বাহে গণৰাজ্য দিৱস উপলক্ষে নিজৰ বাৰ্তা প্ৰকাশ কৰি ৰাইজৰ পৰা সমৰ্থন বিচাৰিছিল আৰু তাৰ পিছত কাঠমাণ্ডুত উপস্থিত হোৱাৰ লগে লগে বিভিন্ন স্থানত আদৰণি কাৰ্যসূচীৰ আয়োজন কৰা হয় । প্ৰধানমন্ত্ৰী অলিয়ে কয় যে যোৱা শুকুৰবাৰে জ্ঞানেন্দ্ৰ শ্বাহে সমাজৰ অবাঞ্চিত নাগৰিকক ফোন কৰি আন্দোলনৰ সেনাধ্যক্ষ বুলি ঘোষণা কৰিছিল আৰু তেওঁৱেই প্ৰতিবাদকাৰীসকলক হিংসাত্মক কাৰ্য্যত উচটনি দিছিল ।

প্ৰাক্তন ৰজাই ভংগ কৰিলে চুক্তি-

প্ৰধানমন্ত্ৰী অলিয়ে কয় যে এইবোৰ ঘটনাই প্ৰমাণ কৰে যে প্ৰাক্তন ৰজা জ্ঞানেন্দ্ৰই সংবিধান জাৰি কৰাৰ সময়ত হোৱা চুক্তি উলংঘা কৰিছে । এই সময়ত প্ৰাক্তন ৰজাই এজন সাধাৰণ নাগৰিকৰ দৰে শান্তিপূৰ্ণ জীৱন যাপন কৰিবলৈ আৰু এজন নাগৰিকক দিয়া সকলো অধিকাৰ ভোগ কৰি ব্যৱসায় চলাবলৈ স্বাধীন আছিল । ইয়াৰ উপৰিও ৰাষ্ট্ৰৰ প্ৰাক্তন মুৰব্বী হিচাপে দিয়া সকলো সুবিধাও তেওঁক দিয়া হৈছিল । ইয়াৰ উপৰিও পূৰ্বৰ ৰজাজনক নাগাৰ্জুন দৰবাৰ ব্যৱহাৰ কৰিবলৈও অনুমতি দিয়া হৈছিল ।