মুখ্যমন্ত্ৰী ড০ হিমন্ত বিশ্ব শৰ্মাই ৰঙালী বিহু তথা অসমীয়া নৱবৰ্ষ উপলক্ষে ৰাজ্যবাসীক আন্তৰিক শুভেচ্ছা জ্ঞাপন কৰে

আজি মানুহ বিহু । ৰাজ্যৰ চৌদিশে উখল-মাখল পৰিৱেশ । ৰঙালীৰ ৰঙত মতলীয়া ৰাজ্যবাসী । ইয়াৰ মাজতে মুখ্যমন্ত্ৰী ড০ হিমন্ত বিশ্ব শৰ্মাই ৰঙালী বিহু তথা অসমীয়া নৱবৰ্ষ উপলক্ষে ৰাজ্যবাসীক আন্তৰিক শুভেচ্ছা জ্ঞাপন কৰে । তেওঁ ব’হাগক নতুন বছৰৰ এক সজীৱ আৰম্ভণি আৰু “অসমৰ প্ৰাণস্পন্দন” বুলি অভিহিত কৰে ।

এক্সৰ এক পোষ্টত মুখ্যমন্ত্ৰীগৰাকীয়ে লিখিছে, “ৰঙালী বিহু আৰু অসমীয়া নৱবৰ্ষৰ পবিত্ৰ ক্ষণত শুভেচ্ছা জনালোঁ । আজিৰ এই দিনটোৱে ব’হাগক বুজায়, যিটো এটা নতুন বছৰৰ সজীৱ আৰম্ভণি আৰু অসমৰ জনজীৱনৰ প্ৰাণস্পন্দন ।”

পোষ্টটোত লগতে তেওঁ লিখিছে, “এই আনন্দময় তথা অতি চেনেহৰ দিনটোত মই অসমবাসীক আন্তৰিক অভিনন্দন আৰু শুভেচ্ছা জনাইছোঁ । এই নতুন বছৰটোৱে প্ৰতিটো ঘৰলৈ সুখ, সমৃদ্ধি আৰু নতুন আশা কঢ়িয়াই আনক । ব’হাগৰ প্ৰথম পুৱাৰ পৰম্পৰা অনুসৰি, মই আপোনালোক সকলোৰে আশীৰ্বাদ আৰু শুভেচ্ছা বিনম্ৰতাৰে কামনা কৰিছোঁ ।”

ফেচবুক পোষ্টত মুখ্যমন্ত্ৰীগৰাকীয়ে লিখিছে-“ পহিলা ব’হাগ আৰু অসমীয়া নৱবৰ্ষৰ ওলগ । আজি অসমৰ জনজীৱনৰ প্ৰাণস্পন্দন ব’হাগ বিহু তথা অসমীয়াৰ নৱবৰ্ষ ৷ আজিৰ এই বিশেষৰো বিশেষ দিনটিত মোৰ প্ৰাণৰ অসমবাসীলৈ আন্তৰিক ওলগ, মৰম-চেনেহ যাচিলোঁ ৷ আজিৰ এই শুভ দিনটিত সকলোৰে জীৱন পোহৰময় হোৱাৰ কামনা কৰিলোঁ ৷ স্বাভাৱিকতে ব’হাগৰ প্ৰথম পুৱাটিত আপোনালোক সকলোৰে আশিস বিচাৰিলোঁ ৷”

উল্লেখ্য যে, অসমত এদিন পূৰ্বে পৰম্পৰাগত ‘গৰু বিহু’ৰ সৈতে ৰাজ্যৰ সৰ্ববৃহৎ উৎসৱ ৰঙালী বিহুৰ সপ্তাহজোৰা উদযাপন আৰম্ভ হয় । ৰঙালী বিহুৰ প্ৰথম দিনটোত গৰু বিহু পালন কৰা হয় ।

লগতে পঢ়ক : ৰাজ্যবাসীলৈ অসমীয়া নতুন বৰ্ষ আৰু ৰঙালী বিহুৰ শুভেচ্ছা প্ৰধানমন্ত্ৰী মোদীৰ

অসমীয়া নৱবৰ্ষ আৰু ৰঙালী বিহু উপলক্ষে ৰাজ্যবাসীলৈ শুভেচ্ছা জ্ঞাপন কৰে প্ৰধানমন্ত্ৰী মোদীয়ে

প্ৰধানমন্ত্ৰী নৰেন্দ্ৰ মোদীয়ে বুধবাৰে অসমীয়া নৱবৰ্ষ আৰু ৰঙালী বিহু উপলক্ষে ৰাজ্যবাসীলৈ শুভেচ্ছা জ্ঞাপন কৰে । ৰঙালী বিহু অসমৰ অন্যতম গুৰুত্বপূৰ্ণ উৎসৱ, যিয়ে বসন্তৰ আগমন আৰু কৃষি বতৰৰ আৰম্ভণিক সূচায় । হুঁচৰি, বিহু, পিঠা-পনা আদিৰ জৰিয়তে এই উৎসৱ উদযাপন কৰা হয় । এই উৎসৱে আনন্দ, নতুনত্ব আৰু বিশেষকৈ কৃষকসকলৰ মাজলৈ কৃষিৰ সমৃদ্ধি কঢ়িয়াই আনে ।

‘এক্স’ পষ্টত প্ৰধানমন্ত্ৰী মোদীয়ে লিখিছে, “আপোনালোক সকলোকে ৰঙালী বিহুৰ ওলগ জনালোঁ !” পষ্টটোৰ সৈতে সংলগ্ন এখন ফটোত লিখা আছে, “এই সজীৱ উৎসৱে নতুনৰ আৰম্ভণি, সমৃদ্ধি আৰু একতাৰ ভাৱক উদযাপন কৰে । এই উৎসৱে অসমীয়া সংস্কৃতিক ধুনীয়াকৈ প্ৰদৰ্শন কৰে, যিয়ে সকলোতে জনপ্ৰিয়তা লাভ কৰিছে । মই এটি সফলতা, সুখ আৰু সুস্বাস্থ্যৰে ভৰা বছৰৰ বাবে প্ৰাৰ্থনা জনাইছোঁ ।”

উল্লেখ্য য়ে, অসমে মঙলবাৰে পৰম্পৰাগত গৰু বিহুৰে ৰাজ্যখনৰ সৰ্ববৃহৎ উৎসৱ ৰঙালী বিহুৰ সপ্তাহজোৰা উদযাপন আৰম্ভ কৰে । ৰঙালী বিহুৰ প্ৰথম দিনটোত গৰু বিহু পালন কৰা হয় । এজন কৃষকৰ জীৱনৰ অন্যতম তাৎপৰ্যপূৰ্ণ উদযাপন হিচাবে গণ্য কৰা এই বিশেষ দিনটোত গাঁওবাসীয়ে তেওঁলোকৰ গোধনক মাহ-হালধি সানি গা ধুৱায় । পশুধনৰ সমৃদ্ধি আৰু মংগলৰ বাবে এই বিহু পালন কৰা হয় ।

কেঁচা হালধি, মাটি মাহ গৰু-ম’হবোৰক নোৱাই-ধুৱাই লাউ-বেঙেনা খুওৱা হয় আৰু নতুন পঘাৰে বন্ধা হয় । মানুহে গৰুক উদ্দেশ্যি পৰম্পৰাগত গায় “লাউ খা, বেঙেনা খা, বছৰে বছৰে বাঢ়ি যা, মাৰ সৰু, বাপেৰ সৰু, তই হবি বৰ বৰ গৰু ।” এই বিহুত পশু ধনক সেৱা-শুশ্ৰুষা কৰাৰ অৰ্থ হ’ল কৃষি আৰু দৈনন্দিন জীৱনৰ গুৰুত্বপূৰ্ণ অংশ গৰুৰ প্ৰতি সন্মান তথা কৃতজ্ঞতা প্ৰকাশ কৰা ।

লগতে পঢ়ক : ১৬ এপ্ৰিলৰ পৰা বিশেষ সংসদৰ অধিৱেশন, মহিলা সংৰক্ষণ বিধেয়ক সন্দৰ্ভত ভাষণ দিব প্ৰধানমন্ত্ৰী মোদীয়ে