পশ্চিম বংগত বাবৰি মছজিদ নিৰ্মাণৰ কাৰণে আধাৰশিলা স্থাপনক লৈ অটল হুমায়ুন কবীৰ। ইটা লৈ ওলাই আহিল হুমায়ুন কবীৰৰ সমৰ্থক

পশ্চিম বংগৰ মুৰ্ছিদাবাদত নিলম্বিত তৃণমূল কংগ্ৰেছৰ বিধায়ক হুমায়ুন কবীৰ মছজিদ নিৰ্মাণক লৈ বংগৰ ৰাজনীতিৰ কেন্দ্ৰবিন্দুলৈ আহিছে। তেওঁ ক’লে যে সকলো ঠিকেই আছে আৰু দুপৰীয়া ১২ বজালৈ অপেক্ষা কৰক।

নিলম্বিত বিধায়ক গৰাকী নিজৰ স্থিতিত অটল আছে। তেওঁ আজি বাবৰি মছজিদ শৈলীৰ মছজিদৰ আধাৰশিলা স্থাপন কৰিবলৈ ওলাইছে।

নিলম্বিত বিধায়ক গৰাকীয়ে কয় যে,’দুপৰীয়া ১২ বজাৰ পিছত কোৰান পাঠ সম্পূৰ্ণ হোৱাৰ পিছত আধাৰশিলা স্থাপন কৰা হ’ব।ৰাজ্যৰ আৰক্ষী আৰু কেন্দ্ৰীয় নিৰাপত্তা সংস্থাই আমাক সুৰক্ষা দি আছে’।

‘মছজিদৰ আধাৰশিলা স্থাপনৰ বাবে চৌদি আৰৱৰ পৰা মাউলভিছক মাতি অনা হৈছে।অনুষ্ঠানলৈ অহা লোকসকলৰ বাবেও বিৰিয়ানীৰ ব্যৱস্থা কৰা হৈছে’।

‘একাংশ লোকে মছজিদৰ আধাৰশিলা স্থাপন বন্ধ কৰিবলৈ আদালতত আন্দোলন কৰিছিল।কিন্তু কলকাতা উচ্চ ন্যায়ালয়ে প্ৰস্তাৱিত মছজিদ নিৰ্মাণত হস্তক্ষেপ কৰিবলৈ অস্বীকাৰ কৰে’।

অৱশ্যে, ভাৰতীয় জনতা পাৰ্টিৰ নেতা অৰ্জুন সিঙে হুমায়ুন কবীৰক সকীয়াই দিছে যে,যদি তেওঁ বাবৰি মছজিদৰ লাইনত প্ৰস্তাৱিত মছজিদৰ আধাৰশিলা স্থাপনৰ পৰিকল্পনা আগুৱাই নিব, তেওঁ বাবৰৰ ওচৰলৈ পঠিয়াই দিয়া হ’ব।

ফলত পশ্চিম বংগ চৰকাৰে অতিৰিক্ত নিৰাপত্তা বাহিনী মোতায়েন কৰি অঞ্চলটোত নিৰাপত্তা কটকটীয়া কৰিছে।

শুকুৰবাৰৰ পৰা হুমায়ুন কবীৰৰ ‘বাবৰি মছজিদ শৈলী’ মছজিদৰ আধাৰশিলা স্থাপনৰ স্থানত প্ৰস্তুতি আৰম্ভ হয়।এই অনুষ্ঠানত চৌদি আৰৱৰ ধৰ্মগুৰুসকলে অংশগ্ৰহণ কৰাৰ সম্ভাৱনা আছে,ইয়াত হাজাৰ হাজাৰ মানুহৰ বাবে খাদ্য প্ৰস্তুত কৰা হৈছে,ইয়াৰ পৰিপ্ৰেক্ষিতত কৰ্তৃপক্ষই নিৰাপত্তাৰ ব্যৱস্থা কটকটীয়া কৰিছে।

লগতে পঢ়ক: দুখন পাৰ্চপৰ্টৰ গোচৰত আব্দুল্লা আজমক ৭ বছৰৰ কাৰাদণ্ড…