‘গৌৰৱ গগৈৰ পত্নীৰ পাকিস্তানী সেনাৰ সৈতে ভাল সম্পৰ্ক আছে…’ পুনৰ বিস্ফোৰণ মুখ্যমন্ত্ৰী হিমন্ত শৰ্মাৰ

কংগ্ৰেছৰ সাংসদ গৌৰৱ গগৈৰ পত্নী এলিজাবেথ কলবাৰ্নক লৈ পুনৰ এক অভিযোগ উত্থাপন কৰিছে মুখ্যমন্ত্ৰী হিমন্ত বিশ্ব শৰ্মাই । তেওঁ অভিযোগ উত্থাপন কৰি কয় যে এলিজাবেথ কলবাৰ্নৰ পাকিস্তানী সেনাৰ সৈতে ভাল সম্পৰ্ক আছিল । কলবাৰ্নে ১৯ বাৰ পাকিস্তান ভ্ৰমণ কৰিছিল আৰু তেওঁৰ লগত চুবুৰীয়া দেশখনত পাকিস্তানী সেনাৰ বিষয়াও আছিল ।

মুখ্যমন্ত্ৰীয়ে অভিযোগ কৰে যে গগৈৰ পত্নীয়ে পাকিস্তানত কাম কৰিছিল আৰু তাৰ পিছত দিল্লীলৈ আহিছিল কোনো এন জি অ’ত কাম কৰিবলৈ, কিন্তু পাকিস্তানৰ পৰা তেওঁ দৰমহা লাভ কৰিয়েই আছিল । গগৈয়েও ব্যক্তিগতভাৱে পাকিস্তান ভ্ৰমণ কৰি তাত ১৫ দিন আছিল । তেওঁৰ পত্নী এলিজাবেথ কলবাৰ্নেও গগৈৰ লগত গৈছিল যদিও সাত দিনৰ পিছত তেওঁ ঘূৰি আহিছিল, আনহাতে গগৈ আৰু সাত দিন থাকিছিল । মুখ্যমন্ত্ৰীয়ে কয় যে গৌৰৱ গগৈয়ে ১৫ দিন পাকিস্তানত কি কৰিলে ক’ব লাগে ?  তেওঁ পাকিস্তানৰ সেনাবাহিনীক প্ৰত্যক্ষ নে পৰোক্ষভাৱে সহায় কৰিছিল নেকি ?

তেওঁ কয় যে প্ৰধানমন্ত্ৰী নৰেন্দ্ৰ মোদীৰ পাকিস্তান ভ্ৰমণক লৈ প্ৰশ্ন উত্থাপন হৈছে যদিও চৰকাৰী কাৰ্যসূচীত প্ৰধানমন্ত্ৰী তালৈ গৈছিল । চৰকাৰী প্ৰতিনিধি দলৰ অংশ হিচাপে গগৈ তালৈ যোৱা হ’লে আমি প্ৰশ্ন উত্থাপন নকৰিলোহেঁতেন, কিন্তু তেওঁ ব্যক্তিগতভাৱে তালৈ গৈছিল আৰু আমি জানিব বিচাৰো যে সেই দেশত তেওঁক কোনে আদৰণি জনাইছিল ?

মুখ্যমন্ত্ৰী শৰ্মাই কয় যে পাকিস্তানী নাগৰিক আলী তৌকীৰ শ্বেখ আৰু ভাৰতত তেওঁৰ সহযোগীসকলৰ মাজৰ সম্পৰ্কৰ তদন্ত কৰি থকা বিশেষ তদন্তকাৰী দলে তদন্ত সম্পূৰ্ণ কৰিছে আৰু গগৈ ৱাগাহ-আটাৰী সীমান্ত হৈ পাকিস্তানলৈ যোৱাৰ প্ৰমাণ আমাৰ হাতত আছে । কিন্তু তথ্যসমূহ প্ৰমাণীকৰণৰ বাবে আমি বিধিগত বিধানসমূহ পূৰণ কৰিব লাগিব আৰু ইয়াৰ বাবে সময় লাগিব । আমি ইতিমধ্যে এই প্ৰক্ৰিয়া আৰম্ভ কৰিছো আৰু ১০ ছেপ্টেম্বৰৰ ভিতৰত আমি সম্পূৰ্ণ কৰিম । এছ আই টিয়ে প্ৰয়োজনীয় ঠাইবোৰ ভ্ৰমণ কৰিছিল ঠিকেই, কিন্তু প্ৰমাণ সংগ্ৰহৰ প্ৰক্ৰিয়া আছে ।

৯০ জন যুৱকক পাকিস্তানৰ দূতাবাসলৈ লৈ গৈছিল গগৈয়ে : শৰ্মা

ইজৰাইল ভ্ৰমণৰ সময়ত কংগ্ৰেছৰ সাংসদগৰাকীয়ে পাছপ’ৰ্ট হেৰুৱাৰ কথা কৈছিল আৰু ইয়াৰ ফলত তথ্য হেৰুৱাইছে বুলিও মুখ্যমন্ত্ৰী শৰ্মাই কয় । পাকিস্তানৰ পৰা উভতি অহাৰ পাছত গগৈয়ে ৯০ জন যুৱকক পাকিস্তানৰ দূতাবাসলৈ লৈ যায় আৰু তাৰে বহুতেই পিছত দাবী কৰে যে তেওঁলোকক তালৈ লৈ যোৱা বুলি আগতীয়াকৈ কোৱা হোৱা নাছিল । তেওঁ যুৱকসকলক উগ্ৰপন্থী কৰিব বিচাৰিছিল বুলি অভিযোগ উত্থাপন কৰে ড০ শৰ্মাই ।

মুখ্যমন্ত্ৰী হিম্নত বিশ্ব শৰ্মাই কয় যে তেওঁৰ পৰিয়ালত কেৱল গৌৰৱ গগৈহে ভাৰতীয় নাগৰিক । তেওঁ নিজৰ সন্তান দুটাৰ ভাৰতীয় নাগৰিকত্ব ত্যাগ কৰিছে । নথিপত্ৰৰ প্ৰমাণ পোৱাৰ পিছত প্ৰধানমন্ত্ৰীৰ কাৰ্যালয়ত দাখিল কৰিম আৰু গোচৰ কেন্দ্ৰীয় সংস্থাক গতাই দিয়াৰ পিছত তদন্তৰ অধিক পৰিসৰ থাকিব । এই বিষয়ত অসম চৰকাৰৰ ক্ষমতা সীমিত আৰু এটা নিৰ্দিষ্ট পইণ্টলৈকেহে তদন্ত কৰিব পাৰে বুলি কয় তেওঁ ।

মুখ্যমন্ত্ৰী হিমন্ত বিশ্ব শৰ্মাই ভাৰতীয় সেনাৰ সাহস আৰু মনোভাৱক প্ৰশংসা কৰে । তেওঁ কয় যে পাকিস্তানে যেতিয়াই ভাৰতৰ ঐক্য আৰু অখণ্ডতাক প্ৰত্যাহ্বান জনাবলৈ সাহস কৰিছিল তেতিয়াই ভাৰতীয় জোৱানসকলে শত্ৰুক সাহসেৰে পৰাস্ত কৰি দেশৰ গৌৰৱ অক্ষুন্ন ৰাখিছিল । ইয়াৰ উপৰিও ভিত্তিহীন অভিযোগ উত্থাপন কৰাৰ বাবে কংগ্ৰেছকো সমালোচনা কৰে তেওঁ ।

এল অ’ চিত পাকিস্তানৰ অবিৰত গুলীচালনাৰ বিৰুদ্ধে ভাৰতীয় সেনাৰ প্ৰতিশোধমূলক কাৰ্যক প্ৰশংসা কৰে মুখ্যমন্ত্ৰী ড০ শৰ্মাই । এক্সত তেওঁ লিখিছে ভাৰত-পাকিস্তান যুদ্ধ: ভাৰতৰ বীৰত্ব আৰু জয়ৰ ঐতিহ্য । স্বাধীনতাৰ পিছৰে পৰা ভাৰতৰ সাহসী সশস্ত্ৰ বাহিনীয়ে বাৰে বাৰে পাকিস্তানী আগ্ৰাসনৰ বিৰুদ্ধে আমাৰ দেশৰ সাৰ্বভৌমত্ব ৰক্ষা কৰি দৃঢ়তাৰে থিয় দিছে । পাকিস্তানে যেতিয়াই ভাৰতৰ ঐক্য আৰু অখণ্ডতাক প্ৰত্যাহ্বান জনাবলৈ সাহস কৰিছিল তেতিয়াই আমাৰ জোৱানসকলে সাহসেৰে শত্ৰুক নিৰ্ণায়কভাৱে পৰাস্ত কৰিছিল আৰু ভাৰতৰ গৌৰৱ ৰক্ষা কৰিছিল ।

তেওঁ ভাৰত আৰু পাকিস্তানৰ মাজত হোৱা চাৰিখন যুদ্ধ, ১৯৪৭-৪৯ চনৰ ভাৰত-পাক যুদ্ধ, ১৯৬৫ চনৰ যুদ্ধ, ১৯৭১ চনৰ যুদ্ধ আৰু ১৯৯৯ চনৰ কাৰ্গিল যুদ্ধৰ বিষয়ে তথ্য প্ৰদান কৰে । শৰ্মাই কয় যে প্ৰতিটো ভাৰত-পাকিস্তানৰ সংঘাতে এটা চিৰন্তন সত্যৰ আঁত ধৰে । যেতিয়াই ভাৰতে আক্ৰমণৰ সন্মুখীন হৈছিল তেতিয়াই আমাৰ জোৱানসকল নিৰ্ভীক, অপৰাজিত আৰু নিজৰ সংকল্পত অটল হৈ আছিল । সাহস আৰু ত্যাগৰ এই উত্তৰাধিকাৰে প্ৰতিজন ভাৰতীয় নাগৰিকক অনুপ্ৰাণিত কৰি যাব । শৰ্মাই কয় যে আমাৰ সশস্ত্ৰ বাহিনী সকলো পৰিস্থিতিত ভাৰতৰ সাৰ্বভৌমত্ব আৰু সন্মান ৰক্ষাৰ বাবে সজাগ আৰু প্ৰতিশ্ৰুতিবদ্ধ । জয় হিন্দ ।

কংগ্ৰেছক তীক্ষ্ণ সমালোচনা-

কংগ্ৰেছকো লক্ষ্য কৰি লয় মুখ্যমন্ত্ৰী ড০ শৰ্মাই । অসম চৰকাৰৰ বিৰুদ্ধে ভিত্তিহীন অভিযোগ উত্থাপন কৰাৰ পূর্বে তথ্য সঠিকভাৱে জনাটো জৰুৰী বুলিও তেওঁ কয় ৷ অসম আৰক্ষীয়ে সাংসদ প্ৰদ্যুত বৰদলৈৰ সৈতে জড়িত ঘটনাৰ পুংখানুপুংখ তদন্ত কৰিছে । এতিয়া স্পষ্টভাৱে প্ৰতিষ্ঠা হৈছে যে আক্ৰমণকাৰী মহম্মদ ইমদাদুল ইছলাম । তেওঁ আছিল কংগ্ৰেছ কৰ্মী । যাক পঞ্চায়ত নিৰ্বাচনত নাকচ কৰা হৈছিল দলৰ টিকট । এই ঘটনা সম্পূর্ণৰূপে কংগ্রেছৰ ভিতৰৰ দলীয় আৰু অন্তর্যুদ্ধৰ ফল ৷ এয়া অসম চৰকাৰৰ পৃষ্ঠপোষকতা বা সমৰ্থিত কাৰ্য নাছিল । এই পৰীক্ষিত তথ্যৰ পৰিপ্ৰেক্ষিতত আপোনালোকে অসম চৰকাৰৰ বিৰুদ্ধে কৰা ভিত্তিহীন আৰু বিভ্ৰান্তিকৰ মন্তব্য প্ৰত্যাহাৰ কৰিব বুলি আশা কৰিলোঁ ।

অসমৰ মুখ্যমন্ত্ৰী হিমন্ত বিশ্ব শৰ্মাই শনিবাৰে কয় যে জম্মু-কাশ্মীৰত সংঘটিত সন্ত্ৰাসবাদী আক্ৰমণৰ পিছত এতিয়ালৈকে ৰাজ্যখনত পাকিস্তানৰ সমৰ্থকত সামাজিক মাধ্যমত পোষ্ট কৰাৰ অপৰাধত ১৪ জন লোকক গ্ৰেপ্তাৰ কৰা হৈছে । তেওঁ স্পষ্টকৈ কয় যে প্ৰয়োজন হ’লে এই লোকসকলৰ বিৰুদ্ধে ৰাষ্ট্ৰীয় নিৰাপত্তা আইন অৰ্থাৎ এন এছ এৰ অধীনত ব্যৱস্থা গ্ৰহণ কৰা হ’ব । গুৱাহাটীস্থিত ভাৰতীয় জনতা পাৰ্টিৰ ৰাজ্যিক কাৰ্যালয়ত অনুষ্ঠিত এক অনুষ্ঠানত ড০ শৰ্মাই কয় যে ভাৰত আৰু পাকিস্তানৰ মাজত কোনো সাদৃশ্য নাই । দুয়োখন দেশ শত্ৰু ৰাষ্ট্ৰ আৰু আমি তেনেকৈয়ে থকা উচিত ।

‘ছ’চিয়েল মিডিয়াৰ সকলো পোষ্ট পৰ্যালোচনা কৰা হৈছে’

মুখ্যমন্ত্ৰী ড০ শৰ্মাই কয় যে শুকুৰবাৰে কৃষক মুক্তি সংগ্ৰাম সমিতিৰ এজন নেতাক ‘ভাৰত বিৰোধী মন্তব্য’ কৰাৰ অপৰাধত গ্ৰেপ্তাৰ কৰা হৈছিল । এনে মনোভাৱ গ্ৰহণ কৰা যিকোনো লোককে গ্ৰেপ্তাৰ কৰা হ’ব বুলি সকীয়াই দিয়ে মুখ্যমন্ত্ৰীয়ে । তেওঁ কয়, ‘প্ৰয়োজন হ’লে আমি তেওঁলোকৰ ওপৰত এন এছ এৰ বিধান প্ৰয়োগ কৰিম । আমি সকলো (ছ’চিয়েল মিডিয়া) পোষ্ট পৰ্যালোচনা কৰি আছো আৰু যিকোনো ব্যক্তিক আমি যদি ৰাষ্ট্ৰবিৰোধী বুলি বিবেচনা কৰোঁ তেওঁলোকৰ বিৰুদ্ধে ব্যৱস্থা গ্ৰহণ কৰা হ’ব ।’ ছ’চিয়েল মিডিয়া প্লেটফৰ্ম ‘এক্স’ত এটা পোষ্টত মুখ্যমন্ত্ৰীগৰাকীয়ে কয় যে পাকিস্তানৰ সমৰ্থনত মন্তব্য কৰাৰ বাবে গ্ৰেপ্তাৰ হোৱা লোকৰ সংখ্যা ১৪লৈ বৃদ্ধি পাইছে ।

শনিবাৰে সন্ধিয়া ৭ বজালৈকে গ্ৰহণ কৰা ব্যৱস্থাৰ তথ্য দি তেওঁ লিখিছে, ‘এতিয়ালৈকে দেশদ্ৰোহীমূলক মন্তব্য কৰা ১৪ জন লোকক গ্ৰেপ্তাৰ কৰা হৈছে ।’ দিনটোত কাছাৰত ২ জন, হাইলাকান্দি, নগাঁও আৰু শ্ৰীভূমিত ১ জনকে ধৰি কমেও ৬ জন লোকক গ্ৰেপ্তাৰ কৰা হয় । ‘এক্স’ ত আন এটা পোষ্টত মুখ্যমন্ত্ৰীয়ে কয় যে শুকুৰবাৰে নিশা শ্ৰীভূমি জিলাত এজন ব্যক্তিক আটক কৰা হৈছিল । আন এটা পোষ্টত তেওঁ জনাইছে যে, ‘ছ’চিয়েল মিডিয়াত পাকিস্তানৰ সমৰ্থনত পোষ্ট দিয়াৰ বাবে কাছাৰ আৰক্ষীয়ে আৰু ২ জন লোকক গ্ৰেপ্তাৰ কৰিছে ।’

আৰক্ষীৰ জিম্মাত AIUDFৰ বিধায়ক-

ইয়াৰ পূৰ্বে ড০ শৰ্মাই কয় যে বৃহস্পতিবাৰে অল ইণ্ডিয়া ইউনাইটেড ডেম’ক্ৰেটিক ফ্ৰণ্টৰ বিধায়ক আমিনুল ইছলামকে ধৰি ২ জন লোকক গ্ৰেপ্তাৰ কৰাৰ বিপৰীতে শুকুৰবাৰে সমগ্ৰ ৰাজ্যতে আৰু ৬ জন লোকক গ্ৰেপ্তাৰ কৰা হৈছে । মঙলবাৰে জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ পিছতে এই ব্যৱস্থা গ্ৰহণ আৰম্ভ কৰা হয় । উল্লেখ্য যে, এই আক্ৰমণৰ পিছত অসম আৰক্ষীয়ে ছচিয়েল মিডিয়াত চোকা নিৰীক্ষণ কৰি ৰাষ্ট্ৰ বিৰোধী কাৰ্যকলাপৰ বিৰুদ্ধে কঠোৰ ব্যৱস্থা গ্ৰহণ কৰিছে ।