শ্ৰদ্ধা কাপুৰৰ ‘ইঠা’ক লৈ বিতৰ্ক!নাম সলনি কৰাৰ দাবী পৰিয়ালবৰ্গৰ
শ্ৰদ্ধা কাপুৰ অভিনীত ছবি ‘ইঠা’ মুক্তিৰ পূৰ্বে বিতৰ্কৰ মাজত সোমাই পৰিছে।কিংবদন্তি ভিঠাবাই নাৰায়ণগাঁওকাৰৰ পৰিয়াল আৰু এন চি পিয়ে ছবিখনৰ শিৰোনামক লৈ আপত্তি কৰিছে।
শ্ৰদ্ধা কাপুৰৰ বহুল চৰ্চিত আৰু বহু প্ৰতীক্ষিত ছবি ‘ইঠা’ৰ টিজাৰ মুক্তি পোৱাৰ পিছতে দৰ্শকৰ মাজত এক অভূতপূৰ্ব উত্তেজনা দেখা গৈছে। ছবিখনত শ্ৰদ্ধা কাপুৰৰ শক্তিশালী অভিনয় আৰু নৃত্যই ইণ্টাৰনেটত চৰ্চা লাভ কৰিছে। কিন্তু মুক্তিৰ পূৰ্বেই ছবিখন এক নতুন বিতৰ্কত সাঙোৰ খাই পৰিছে। এই বিতৰ্ক ছবিখনৰ কাহিনী বা অভিনেতা-অভিনেত্ৰীক লৈ নহয়, বৰঞ্চ ইয়াৰ নামকৰণক লৈহে সৃষ্টি হৈছে। মহাৰাষ্ট্ৰৰ এগৰাকী মহান লাৱণী শিল্পী ভিঠাবাই নাৰায়ণগাওঁকাৰৰ জীৱনৰ আধাৰত নিৰ্মিত এই ছবিখনৰ নাম ‘ইঠা’ ৰখাক লৈ প্ৰশ্ন উত্থাপন হৈছে।
নেশ্যলিষ্ট কংগ্ৰেছ পাৰ্টি (NCP)ৰ চলচ্চিত্ৰ আৰু সাংস্কৃতিক বিভাগে ছবিখনৰ নামৰ ওপৰত আপত্তি দৰ্শাইছে। তেওঁলোকৰ মতে, যেতিয়া ছবিখন সম্পূৰ্ণৰূপে ভিঠাবাই নাৰায়ণগাওঁকাৰৰ জীৱনৰ ওপৰত আধাৰিত, তেতিয়া ইয়াৰ নামটোও তেওঁৰ নামৰ সৈতে জড়িত হোৱা উচিত। তেওঁলোকৰ ধাৰণা মতে, ছবিখনৰ নাম ‘ভিঠা’ বা ‘ভিঠাবাই’ ৰখা উচিত, যাতে তেওঁৰ পৰিচয় আৰু অৱদানক উচিত সন্মান প্ৰদান কৰিব পৰা যায়।
জানিব পৰা মতে, এনচিপিৰ উপৰিও ভিঠাবাই নাৰায়ণগাওঁকাৰৰ পৰিয়ালেও একেই দাবী উত্থাপন কৰিছে। তেওঁৰ পুত্ৰ কৈলাস নাৰায়ণগাওঁকাৰ আৰু ৰাজেশ নাৰায়ণগাওঁকাৰৰ লগতে নাতিয়েক মোহিত নাৰায়ণগাওঁকাৰেও জনাইছে যে ছবিখনৰ নাম এনে হোৱা উচিত যাতে মানুহে পোনে পোনে ভিঠাবাইৰ পৰিচয়ৰ সৈতে সংযোগ স্থাপন কৰিব পাৰে।
এনচিপিৰ চলচ্চিত্ৰ আৰু সাংস্কৃতিক বিভাগৰ মহাৰাষ্ট্ৰৰ সভাপতি বাবাচাহেব পাটিলে কয় যে ভিঠাবাই নাৰায়ণগাওঁকাৰ কেৱল এগৰাকী শিল্পী নহয়, তেওঁ মহাৰাষ্ট্ৰৰ সাংস্কৃতিক সম্পদ। সেয়েহে তেওঁৰ জীৱনৰ ওপৰত নিৰ্মিত ছবিৰ নামো তেওঁৰ মৰ্যাদা অনুসৰি হ’ব লাগে। বৰ্তমানলৈকে এই বিতৰ্কৰ সন্দৰ্ভত নিৰ্দেশক লক্ষ্মণ উতেকাৰ বা প্ৰডাকচন হাউছ ‘মেডক ফিল্মছ’ৰ তৰফৰ পৰা কোনো আনুষ্ঠানিক বিবৃতি প্ৰকাশ পোৱা নাই।
ছবিখনৰ টিজাৰে দৰ্শকৰ দৃষ্টি আকৰ্ষণ কৰিবলৈ সক্ষম হৈছে। ইয়াত শ্ৰদ্ধা কাপুৰক ভিঠাবাই নাৰায়ণগাওঁকাৰৰ চৰিত্ৰত দেখা গৈছে। টিজাৰটোৰ আটাইতকৈ আৱেগিক দৃশ্যটো হ’ল য’ত তেওঁক গৰ্ভাৱস্থাৰ সময়তো মঞ্চত পৰিবেশন কৰা দেখা গৈছে। এই ছবিখনত শ্ৰদ্ধা কাপুৰৰ উপৰিও ৰণদীপ হুড্ডা আৰু মহম্মদ জিছান আয়ুবক গুৰুত্বপূৰ্ণ চৰিত্ৰত দেখা যাব। ছবিখন অহা ২৮ আগষ্টত চিনেমা হলত মুক্তি পাব।
লগতে পঢ়ক: ‘গেলেক্সি এপাৰ্টমেণ্ট’ত আৰু নেদেখিব ছলমান খানক: কিয় ল’লে এই সিদ্ধান্ত ?