ৰাজ্যসভা নিৰ্বাচনৰ মনোনয়ন পত্ৰ দাখিলৰ অন্তিম দিনটোত এই মনোনয়ন দাখিল কৰে বিজেপি নেতা তথা মন্ত্ৰী যোগেন মহন আৰু বিজেপি বিধায়ক তেৰছ গোৱালাই

সমাগত ৰাজ্যসভা নিৰ্বাচনৰ বাবে বিজেপিৰ দুগৰাকী প্ৰাৰ্থীয়ে অসমৰ পৰা মনোনয়ন দাখিল কৰে । ১৬ মাৰ্চত অনুষ্ঠিত হ’বলগীয়া ৰাজ্যসভা নিৰ্বাচনৰ মনোনয়ন পত্ৰ দাখিলৰ অন্তিম দিনটোত এই মনোনয়ন দাখিল কৰে বিজেপি নেতা তথা মন্ত্ৰী যোগেন মহন আৰু বিজেপি বিধায়ক তেৰছ গোৱালাই । ইফালে তৃতীয়খন আসনৰ বাবে মিত্ৰদল ইউপিপিএলৰ প্ৰমোদ বড়োৱে দাখিল কৰে মনোনয়ন ।

ৰাজ্যখনৰ তিনিখন খালী ৰাজ্যসভা আসনৰ ভিতৰত দুখনৰ বাবে বিজেপিয়ে কেবিনেট মন্ত্ৰী যোগেন মহন আৰু দুলীয়াজানৰ বিধায়ক তেৰছ গোৱালাক প্ৰাৰ্থী হিচাপে প্ৰক্ষেপ কৰিছে । তৃতীয়খন আসন বিজেপিৰ মিত্ৰদল ইউপিপিএলক এৰি দিয়া হৈছে । মনোনয়ন দাখিলত প্ৰাৰ্থীকেইগৰাকীৰ সৈতে উপস্থিত থাকে কেন্দ্ৰীয় মন্ত্ৰী সৰ্বানন্দ সোণোৱাল, মন্ত্ৰী অশোক সিংহল, ৰঞ্জিত কুমাৰ দাস, কেন্দ্ৰীয় মন্ত্ৰী পবিত্ৰ মাৰ্ঘেৰিটাকে ধৰি দলৰ কেইবাজনো জ্যেষ্ঠ নেতা । ইফালে পূৰ্বতে BTC মুখ্য কাৰ্যবাহী সদস্য হিচাপে কাৰ্যনিৰ্বাহ কৰা প্ৰমোদ বড়োৱে মনোনয়ন দাখিল প্ৰক্ৰিয়াৰ সময়ত ইউপিপিএলৰ কেইবাজনো নেতা তেওঁৰ সৈতে উপস্থিত থাকে ।

মনোনয় দাখিল কৰিবলৈ আহি যোগেন মহনে উচ্চ সদনলৈ তেওঁক প্ৰেৰণৰ বাবে বিজেপিৰ ৰাষ্ট্ৰীয় সভাপতি নীতিন নবীন, প্ৰধানমন্ত্ৰী নৰেন্দ্ৰ মোদী, ৰাজ্যিক বিজেপিৰ সভাপতি দিলীপ শইকীয়া আৰু মুখ্যমন্ত্ৰী হিমন্ত বিশ্ব শৰ্মাক ধন্যবাদ জনায় । মন্ত্ৰী মহনে বিগত দহ বছৰে তেওঁ বিধায়ক তথা মন্ত্ৰী হৈ থকাৰ সময়ছোৱাত যদি কিবা ভুল কৰিছিল তাৰ বাবে সকলোৰে ওচৰত ক্ষমা বিচৰা বুলি মন্তব্য কৰে । তেওঁ লগতে ৰাজ্যখনৰ সমস্যা সমূহ কেন্দ্ৰত শক্তিশালীভাৱে উপস্থাপন কৰি অসমক আগুৱাই নিবলৈ ৰাইজৰ আশীৰ্বাদ কামনা কৰে । আনহাতে ৰাজ্যসভা নিৰ্বাচনৰ বাবে চাইকেলেৰে মনোনয়ন দাখিল কৰিবলৈ উপস্থিত হয় বিধায়ক তেৰছ গোৱালা ।  

উল্লেখ্য যে, বৰ্তমানৰ সদস্যসকলৰ কাৰ্যকাল সমাপ্ত হোৱাৰ পৰিপ্ৰেক্ষিতত খালী হ’বলগীয়া অসমৰ তিনিখন আসন পূৰণৰ বাবে ৰাজ্যসভা নিৰ্বাচন অনুষ্ঠিত হৈছে । নিৰ্বাচনী সূচী অনুসৰি, ৬ মাৰ্চত মনোনয়ন পত্ৰ পৰীক্ষা কৰা হ’ব আৰু ৯ মাৰ্চ মনোনয়ন প্ৰত্যাহাৰৰ অন্তিম দিন হিচাপে ধাৰ্য কৰা হৈছে । ১৬ মাৰ্চত ভোটগ্ৰহণ অনুষ্ঠিত হ’ব ।

লগতে পঢ়ক : নিৰ্বাচনৰ পূৰ্বে ৩ কংগ্ৰেছী বিধায়কে বাজপেয়ী ভৱনত পিন্ধিলে গেৰুৱা বসন