আধাৰ আৰু ভোটাৰ আই ডি (EPIC) সংযোগৰ পথ মুকলি কৰা হৈছে । মঙলবাৰে অনুষ্ঠিত এক গুৰুত্বপূৰ্ণ বৈঠকত দেশৰ নিৰ্বাচন আয়োগে ভোটাৰ আই ডিৰ সৈতে আধাৰ সংযোগ কৰাৰ অনুমতি প্ৰদান কৰিছে । এই সন্দৰ্ভত এক বিবৃতিত নিৰ্বাচন আয়োগে কয় যে সংবিধানৰ ৩২৬ নং অনুচ্ছেদ আৰু জনপ্ৰতিনিধিত্ব আইনৰ ২৩(৪), ২৩(৫) আৰু ২৩(৬) ধাৰা অনুসৰি ই পি আই চিক আধাৰৰ সৈতে সংযুক্ত কৰা হ’ব । ইয়াৰ পূৰ্বে চৰকাৰে আধাৰৰ সৈতে পেন কাৰ্ড লিংক কৰাৰ সিদ্ধান্ত লৈছিল ।
বিবৃতিটোত কোৱা হৈছে যে, ১৯৫০ চনৰ জনপ্ৰতিনিধিত্ব আইনৰ ৩২৬ নং ধাৰা আৰু উচ্চতম ন্যায়ালয়ৰ প্ৰাসংগিক সিদ্ধান্ত অনুসৰি ই পি আই চিক আধাৰৰ সৈতে সংযোগ কৰাৰ বাবে নিৰ্বাচন আয়োগে পদক্ষেপ গ্ৰহণ কৰিব । আজি নিৰ্বাচন সদনত ই চি ড০ সুখবীৰ সিং সন্ধু আৰু ড০ বিবেক যোশীৰ সৈতে চি ই চি জ্ঞানেশ কুমাৰৰ নেতৃত্বত কেন্দ্ৰীয় গৃহ সচিব-সচিব, বিধান বিভাগ, সচিব মেইটৱাই আৰু চি ই অ’ ইউ আই ডি এ আই আৰু ই চি আইৰ কাৰিকৰী বিশেষজ্ঞৰ সৈতে বৈঠকত অংশগ্ৰহণ কৰে ।
ভোটদানৰ অধিকাৰ কেৱল ভাৰতীয় নাগৰিকৰ-
ভাৰতৰ সংবিধানৰ ৩২৬ নং অনুচ্ছেদ অনুসৰি ভোটাধিকাৰ কেৱল ভাৰতৰ নাগৰিককহে দিব পাৰি, আধাৰ কাৰ্ডে কেৱল এজন ব্যক্তিৰ পৰিচয় প্ৰতিষ্ঠা কৰে । সংবিধানৰ ৩২৬ নং অনুচ্ছেদ, ১৯৫০ চনৰ জনপ্ৰতিনিধিত্ব আইনৰ ২৩(৪), ২৩(৫) আৰু ২৩(৬) ধাৰা আৰু ডব্লিউ পি (চিভিল) নং ১৭৭/২০২৩ত উচ্চতম ন্যায়ালয়ৰ সিদ্ধান্ত অনুসৰি ই পি আই চিক আধাৰৰ সৈতে সংযোগ কৰা হ’ব বুলি সিদ্ধান্ত লোৱা হয় । এতিয়া ইউ আই ডি এ আই আৰু ই চি আইৰ কাৰিকৰী বিশেষজ্ঞৰ মাজত কাৰিকৰী আলোচনা অতি সোনকালে আৰম্ভ হ’ব ।
ভুৱা ভোটাৰ চিনাক্তকৰণত সহায় কৰিব-
দৰাচলতে নিৰ্বাচন আয়োগে শেহতীয়াকৈ সিদ্ধান্ত লৈছিল যে আগন্তুক তিনিমাহৰ ভিতৰত ডুপ্লিকেট নম্বৰ থকা ভোটাৰ আই ডিক নতুন ই পি আই চি নম্বৰ প্ৰদান কৰিব । নিৰ্বাচন আয়োগে কয় যে ডুপ্লিকেট নম্বৰ থকাৰ অৰ্থ ভুৱা ভোটাৰ নহয় । আধাৰক ই পি আই চিৰ সৈতে সংযোগ কৰাৰ আঁৰৰ মূল উদ্দেশ্য হৈছে ভোটাৰ তালিকাত থকা ভুলবোৰ আঁতৰাই নিকা কৰি তোলা । নিৰ্বাচন আয়োগৰ মতে এই পদক্ষেপে ভুৱা ভোটাৰ চিনাক্তকৰণত সহায় কৰিব ।
আধাৰক ভোটাৰ আই ডিৰ সৈতে সংযোগ কৰাৰ আঁৰৰ আন এটা কাৰণ হ’ল ইয়াৰ দ্বাৰা ভুৱা ভোটদান ৰোধ কৰিব পৰা যাব । এই ব্যৱস্থা কাৰ্যকৰী হ’লে একাধিক স্থানত এজন ব্যক্তিয়ে ভোটদানৰ সম্ভাৱনা নাইকিয়া হ’ব আৰু নিৰ্বাচনী প্ৰক্ৰিয়া অধিক স্বচ্ছ হ’ব ।
