৫.৬ প্ৰাবল্যৰ ভূমিকম্পই কঁপালে টাইৱানক…
বৃহস্পতিবাৰে পুৱা ৫.৬ প্ৰাবল্যৰ ভূমিকম্পই জোঁকাৰি যায় টাইৱানক । দ্বীপটোত কেইবাটাও ভূমিকম্পৰ ফলত সামান্য ক্ষতিসাধন হয় । আগন্তুক দিনত আৰু অধিক ভূমিকম্পৰ সম্ভাৱনা ব্যক্ত কৰিছে বিশেষজ্ঞসকলে । কেন্দ্ৰীয় বতৰ সংস্থা আৰু আমেৰিকাৰ ভূতাত্ত্বিক জৰীপৰ তথ্য অনুসৰি চিয়ায়ি কাউন্টিৰ ডাপু চহৰত ১০ কিলোমিটাৰ গভীৰতাত পুৱা ১০:১১ বজাত সংঘটিত হয় এই বৃহৎ ভূমিকম্প । ইয়াৰ অলপ সময়ৰ পিছতে ডাপুত কেইবাটাও কম তীব্ৰতাৰ ভূমিকম্প অনুভূত হয় । বৰ্তমান কোনো ধৰণৰ হতাহতিৰ তথ্য পোৱা হোৱা নাই ।
ইয়াৰ পূৰ্বে ২১ জানুৱাৰীত টাইৱানত ৬.৪ প্ৰাবল্যৰ ভূমিকম্প অনুভূত হৈছিল, য’ত ১৫ জন লোক আহত হৈছিল । তেওঁলোকক চিকিৎসাৰ বাবে চিকিৎসালয়ত ভৰ্তি কৰোৱা হয় । এই দুৰ্ঘটনাত অট্টালিকা আৰু পথৰ ক্ষতিসাধন হয় । যোৱা বছৰৰ এপ্ৰিল মাহত ৭.৪ প্ৰাবল্যৰ ভূমিকম্প অনুভূত হৈছিল আৰু ১৩ জন লোকৰ মৃত্যু হৈছিল । প্ৰায় এক হাজাৰ লোকো আহত হয় হৈছিল এই ভূমিকম্পত । যোৱা ২৫ বছৰৰ ভিতৰত দেশখনত এইটোৱেই আছিল আটাইতকৈ শক্তিশালী ভূমিকম্প ।