২২ এপ্ৰিলত পহলগামত সংঘটিত সন্ত্ৰাসবাদী আক্ৰমণৰ পিছত আজি অনুষ্ঠিত হ’ব কেন্দ্ৰীয় কেবিনেটৰ প্ৰথমখন বৈঠক । আজি পুৱা ১১ বজাত প্ৰধানমন্ত্ৰী নৰেন্দ্ৰ মোদীৰ অধ্যক্ষতাত এখন বৈঠক আহ্বান কৰা হৈছে । ইয়াৰ সমান্তৰালকৈ আজি নিৰাপত্তা বিষয়ক সমিতি চি চি এছৰ বৈঠকো অনুষ্ঠিত হ’ব ।

যোৱা সপ্তাহত কেন্দ্ৰীয় কেবিনেটৰ কোনো বৈঠক অনুষ্ঠিত হোৱা নাছিল আৰু ২৩ এপ্ৰিলত কেৱল কেবিনেট কমিটি অন ছিকিউৰিটিৰ বৈঠকত পহলগাম সন্ত্ৰাসবাদী আক্ৰমণক গৰিহণা দিয়া হৈছিল । যোৱা বুধবাৰে চি চি এছৰ বৈঠকৰ পাছত ভাৰতে পাকিস্তানৰ সৈতে কূটনৈতিক সম্পৰ্ক হ্ৰাস কৰাকে ধৰি কেইবাটাও পদক্ষেপৰ কথা ঘোষণা কৰিছিল ।

সেনাক স্বতন্ত্ৰতা দিলে প্ৰধানমন্ত্ৰী মোদীয়ে-

মঙলবাৰে (২৯ এপ্ৰিল) প্ৰধানমন্ত্ৰী নৰেন্দ্ৰ মোদীৰ অধ্যক্ষতাত এখন উচ্চ পৰ্যায়ৰ বৈঠক অনুষ্ঠিত হয় । সন্ত্ৰাসবাদৰ বিৰুদ্ধে ‘শক্তিশালী আঘাত’ কৰিবলৈ তেওঁ সেনাক স্বতন্ত্ৰতা প্ৰদান কৰে । এই বৈঠকত প্ৰতিৰক্ষা মন্ত্ৰী ৰাজনাথ সিং, ৰাষ্ট্ৰীয় নিৰাপত্তা উপদেষ্টা অজিত ডোভাল, প্ৰতিৰক্ষা মুৰব্বী জেনেৰেল অনিল চৌহানৰ লগতে সেনা, নৌসেনা আৰু বায়ুসেনাৰ মুৰব্বীসকলো উপস্থিত থাকে ।

বৈঠকত এই কথা কৈছে প্ৰধানমন্ত্ৰী মোদীয়ে-

বৈঠকত প্ৰধানমন্ত্ৰী মোদীয়ে কয় যে সন্ত্ৰাসবাদৰ ওপৰত তীব্ৰ আক্ৰমণ আমাৰ ৰাষ্ট্ৰীয় সংকল্প । ভাৰতীয় সশস্ত্ৰ বাহিনীৰ পেছাদাৰী সামৰ্থ্যৰ ওপৰত সম্পূৰ্ণ আস্থা প্ৰকাশ কৰি তেওঁ কয় যে তেওঁলোকৰ হাতত “আমাৰ সঁহাৰিৰ পদ্ধতি, উদ্দেশ্য আৰু সময়ৰ বিষয়ে সিদ্ধান্ত ল’বলৈ সম্পূৰ্ণ কাৰ্যকৰী স্বাধীনতা আছে । প্ৰধানমন্ত্ৰী মোদীয়ে ইতিমধ্যে কৈছে যে সন্ত্ৰাসবাদী আৰু তেওঁলোকৰ সমৰ্থকসকলে কল্পনা কৰিব নোৱৰা পৰিণতিৰ সন্মুখীন হ’ব ।”

পহলগাম আক্ৰমণৰ পিছত হাই এলাৰ্টত সেনা বাহিনী-

পহলগাম আক্ৰমণৰ পিছত সশস্ত্ৰ বাহিনীক হাই এলাৰ্টত ৰখা হৈছে, নিয়ন্ত্ৰণ ৰেখা আৰু আন্তঃৰাষ্ট্ৰীয় সীমান্তৰ নিৰ্দিষ্ট ইউনিটসমূহক অপাৰেচনেল ৰেডিনেছ মোডত ৰখা হৈছে । ড্ৰ’ন, চেটেলাইট ইমেজৰী আৰু ইলেক্ট্ৰনিক ইন্টাৰচেপ্টৰ জৰিয়তে পাকিস্তান অধিকৃত কাশ্মীৰ (PoK)ৰ সন্ত্ৰাসবাদী লঞ্চপেডসমূহ তীক্ষ্ণ দৃষ্টিৰে নিৰীক্ষণ কৰি থকা হৈছে ।

পাৰ হ’ল ৯০ ঘণ্টাৰো অধিক সময় । এই ৯০ ঘন্টাত সামৰিক পৰ্যায়ত অনুষ্ঠিত হ’ল তিনিখনকৈ বৈঠক । কিন্তু এতিয়াও ভুলবশতঃ সীমান্ত অতিক্ৰম কৰা বি এছ এফৰ জোৱানজনক মুকলি কৰি দিয়া নাই পাকিস্তানে । সীমান্ত পাৰ হৈ যোৱা বি এছ এফৰ জোৱানক ঘূৰাই অনাৰ বাবে বি এছ এফ আৰু পাকিস্তান ৰেঞ্জাৰৰ মাজত তিনি ৰাউণ্ডৰ বৈঠক অনুষ্ঠিত হৈছে যদিও এতিয়াও মুকলি হোৱা নাই জোৱানজন । পাকিস্তানী ৰেঞ্জাৰে কয় যে তেওঁলোকৰ হাতত জোৱানজনৰ কোনো তথ্য নাই ।

ভুলতে সীমান্ত পাৰ হৈছিল বি এছ এফৰ জোৱান-

উল্লেখযোগ্য যে বুধবাৰে পঞ্জাৱৰ ফিৰোজপুৰত আন্তঃৰাষ্ট্ৰীয় সীমান্ত নিৰীক্ষণ কৰি থকাৰ সময়তে পূৰ্ণম কুমাৰ শ্ব’ নামৰ বি এছ এফৰ জোৱান এজনে ভুলবশতঃ সীমান্ত পাৰ হৈ যায় । য’ত পাকিস্তানী ৰেঞ্জাৰে তেওঁক আটক কৰি জিম্মাত লয় । বি এছ এফৰ জোৱানজনে সামৰিক ইউনিফৰ্ম পিন্ধিছিল আৰু লগতে তেওঁৰ চাৰ্ভিচ ৰাইফলো আছিল । বিষয়াসকলে জনোৱা মতে, সীমান্তৰ ওচৰত কৰ্তব্যৰত অৱস্থাত জোৱানজনে ভুলবশতঃ সীমান্ত পাৰ হৈ গছৰ ছাঁত বহিছিল, য’ত তেওঁক পাকিস্তানী ৰেঞ্জাৰে আটক কৰা বুলি অভিযোগ উঠিছে । এতিয়া জোৱানজনক উভতাই অনাৰ বাবে প্ৰচেষ্টা অব্যাহত আছে ।

ফিল্ড কমাণ্ডাৰ পৰ্যায়ৰ বৈঠকৰ বাবে প্ৰস্তুতি-

এতিয়া বি এছ এফে পাকিস্তানী ৰেঞ্জাৰৰ সৈতে ফিল্ড কমাণ্ডাৰ পৰ্যায়ৰ বৈঠকৰ দাবী জনাইছে । বিষয়াসকলে কয় যে এই বৈঠক অতি সোনকালে হ’ব পাৰে । বি এছ এফৰ ডিজি দলজিৎ চৌধুৰীয়েও এই সন্দৰ্ভত বিতং তথ্য গৃহ মন্ত্ৰালয়ক দিছে । বি এছ এফ জোৱানৰ পৰিয়াল পশ্চিম বংগত থাকে । জোৱানজনৰ পিতৃয়ে পুত্ৰৰ সুৰক্ষাৰ প্ৰতি উদ্বেগ প্ৰকাশ কৰি পুত্ৰৰ নিৰাপদে ঘূৰি অহাৰ বাবে চৰকাৰক আবেদন জনাইছে ।

জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ পিছতেই এতিয়া ভাৰতীয় সেনাই নিজৰ শক্তি প্ৰদৰ্শন কৰিছে । যুদ্ধ অনুশীলনৰ জৰিয়তে সেনাই নিজৰ শক্তি প্ৰমাণ কৰিছে । ইয়াৰ মাজতে আৰব সাগৰত নিয়োজিত ভাৰতীয় নৌসেনাৰ যুদ্ধ জাহাজসমূহে শেহতীয়াকৈ কেইবাটাও জাহাজ বিধ্বংসী ক্ষেপণাস্ত্ৰ নিক্ষেপ কৰে । ভাৰতীয় নৌসেনাই কয় যে ভাৰতীয় নৌসেনাৰ জাহাজসমূহে দীৰ্ঘ দূৰত্বৰ নিখুঁত আক্ৰমণৰ বাবে প্লেটফৰ্ম, চিষ্টেম আৰু ক্ৰুৰ প্ৰস্তুতি পুনৰ প্ৰমাণীকৰণ আৰু প্ৰদৰ্শন কৰিবলৈ একাধিক সফল জাহাজ বিৰোধী ক্ষেপণাস্ত্ৰৰ পৰীক্ষণ কৰিছিল । ভাৰতীয় নৌসেনা যিকোনো সময়তে, যিকোনো ঠাইতে, যিকোনো প্ৰকাৰে ৰাষ্ট্ৰৰ সামুদ্ৰিক স্বাৰ্থ সুৰক্ষিত কৰিবলৈ যুদ্ধৰ বাবে সাজু, বিশ্বাসযোগ্য আৰু ভৱিষ্যতৰ বাবে সাজু ।

ইয়াৰ পূৰ্বে ভাৰতীয় নৌসেনাই আৰব সাগৰত থলুৱা বিমানবাহী জাহাজ আই এন এছ বিক্ৰান্ত মোতায়েন কৰিছিল । ভাৰত আৰু পাকিস্তানৰ মাজত ক্ৰমাৎ উত্তেজনা বৃদ্ধি পোৱাৰ মাজতে ইয়াক কৌশলগত সংকেত হিচাপে বিবেচিত হৈছে । ২২ এপ্ৰিলত জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ পিছত এই নিয়োগ কৰা হৈছিল ।

ইয়াৰ পূৰ্বে ভাৰতীয় নৌসেনাই ছ’চিয়েল মিডিয়া প্লেটফৰ্ম ‘এক্স’ত এটা পোষ্ট দিছিল । তাত লিখা আছিল, ‘ঐক্যত শক্তি, উদ্দেশ্যপ্ৰণোদিত উপস্থিতি ।’

উল্লেখ্য যে, জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণক লৈ সমগ্ৰ দেশতে ক্ষোভৰ সৃষ্টি হৈছে । সন্ত্ৰাসবাদৰ আশ্ৰয়স্থল পাকিস্তানক ভাৰতে কেতিয়া আৰু কেনেকৈ উপযুক্ত উত্তৰ দিব সেয়া চাবলৈ সমগ্ৰ দেশেই অপেক্ষা কৰি আছে । ইফালে ভাৰতৰ তিনিওটা সেনাই প্ৰস্তুতি আৰম্ভ কৰিছে । তেওঁলোকে কয় যে যিকোনো পৰিস্থিতিত যিকোনো শত্ৰুক উপযুক্ত উত্তৰ দিবলৈ সাজু ।

জম্মু-কাশ্মীৰৰ পহলগামত ২২ এপ্ৰিলত সংঘটিত হোৱা সন্ত্ৰাসবাদী আক্ৰমণৰ পিছত সমগ্ৰ দেশতে পাকিস্তানৰ বিৰুদ্ধে ক্ষোভৰ সৃষ্টি হৈছে । ইতিমধ্যে ভাৰতে সন্ত্ৰাসবাদ সন্দৰ্ভত চুবুৰীয়া দেশখনৰ বিৰুদ্ধে ব্যৱস্থা আৰম্ভ কৰিছে । ইয়াৰ মাজতে আৰ এছ এছৰ মুৰব্বী মোহন ভাগৱতেও এই সন্দৰ্ভত প্ৰতিক্ৰিয়া প্ৰকাশ কৰিছে । তেওঁ কয় যে অত্যাচাৰ কৰাসকলক শিক্ষা দিয়াটো আমাৰ কৰ্তব্য ।

তেওঁ কয়, “ৰাৱণক তেওঁৰ কল্যাণৰ বাবে হত্যা কৰা হৈছিল । ভগৱানে তেওঁক হত্যা কৰিছিল । এয়া হিংসা নহয় অহিংসা । অহিংসা আমাৰ ধৰ্ম কিন্তু অত্যাচাৰ কৰাসকলক ধৰ্ম শিকোৱাটো অহিংসা । আমি কেতিয়াও আমাৰ ওচৰ-চুবুৰীয়াৰ ক্ষতি নকৰো । ইয়াৰ পিছতো যদি কোনোবাই ভুল পথ গ্ৰহণ কৰে তেন্তে জনসাধাৰণক ৰক্ষা কৰাটো ৰজাৰ কৰ্তব্য । ৰজাই নিজৰ কাম কৰিব ।”

‘যুদ্ধ ধৰ্ম আৰু অধৰ্মৰ মাজত’

আৰ এছ এছৰ মুৰব্বীগৰাকীয়ে কয় যে, “এই আক্ৰমণৰ দ্বাৰা সোঁৱৰাই দিয়া হৈছে যে এয়া ধৰ্ম আৰু অধৰ্মৰ যুঁজ । মানুহক তেওঁলোকৰ ধৰ্মৰ বিষয়ে সোধা হৈছিল আৰু হত্যা কৰা হৈছিল । হিন্দুসকলে কেতিয়াও এই কাম নকৰে । এইটো আমাৰ স্বভাৱ নহয় । ঘৃণা আৰু শত্ৰুতা কেৱল আমাৰ সংস্কৃতিত নাই কিন্তু মনে মনে লোকচান সহ্য কৰাটোও আমাৰ সংস্কৃতিত নাই । আমাৰ হৃদয়ত যন্ত্ৰণা আছে । আমি ক্ষোভত আছো । আমি বেয়াৰ অন্ত পেলাবলৈ আমাৰ শক্তি দেখুৱাব লাগিব ।”

তেওঁ আৰু কয়, “ৰাৱণকো হত্যা কৰা হৈছিল কাৰণ তেওঁ নিজৰ মন সলনি কৰিবলৈ অস্বীকাৰ কৰিছিল । কোনো বিকল্প বাকী নাছিল । ৰামে তেওঁক হত্যা কৰিছিল যদিও তেওঁক সংস্কাৰৰ সুযোগো দিয়া হৈছিল, যেতিয়া তেওঁ সংস্কাৰ কৰা নাছিল, তেতিয়াহে তেওঁক হত্যা কৰা হৈছিল ।”

মোহন ভাগৱতে কয়, “আমি শক্তিশালী সঁহাৰি আশা কৰিছো । প্ৰকৃততে অহিংস ব্যক্তিও শক্তিশালী হ’ব লাগে । যদি শক্তি নাথাকে তেন্তে বিকল্প নাই কিন্তু শক্তি থাকিলে প্ৰয়োজনৰ সময়ত দৃশ্যমান হ’ব লাগে ।”