নৱেম্বৰ মাহলৈকে গ্রেপ্তাৰ কৰা হৈছে ২,৫৫৬জন অবৈধ বাংলাদেশীক ৷ ২০২২ চনৰ পৰা ভাৰত-ম্যানমাৰ সীমান্তত অবৈধ নাগৰিকৰ আগমন বৃদ্ধি পোৱা পৰিলক্ষিত হৈছে ৷

উন্মুক্ত সীমান্তৰে এতিয়াও অব্যাহত আছে অবৈধ বাংলাদেশীৰ অনুপ্রৱেশ ৷ ৪,০৯৬.৭০ কিলোমিটাৰ দৈর্ঘ্যৰ ভাৰত–বাংলাদেশ সীমান্তৰ ২০.৯২ শতাংশ বর্তমানেও উন্মুক্ত হৈয়ে আছে ৷ এই ৮৫৬.৭৭৮ কিলোমিটাৰৰ উন্মুক্ত সীমান্তৰে বিগত ১২ বছৰত ২১,৪০৭জন অবৈধ বাংলাদেশীক সীমান্তৱর্তী এলেকাৰ পৰা নিৰাপত্তা বাহিনীয়ে কৰায়ত্ত কৰিবলৈ সক্ষম হৈছে ৷

চলিত বছৰত নৱেম্বৰ মাহলৈকে গ্রেপ্তাৰ কৰা হৈছে ২,৫৫৬জন অবৈধ বাংলাদেশীক ৷ কেৱল যোৱা নৱেম্বৰ মাহটোত সীমান্তৰ পৰা গ্রেপ্তাৰ কৰা হৈছে ৩০৬জন অবৈধ বাংলাদেশীক ৷ লোকসভাত কেন্দ্রীয় গৃহ ৰাজ্যমন্ত্রী নিত্যানন্দ ৰায়ে এই উদ্বেগজনক তথ্য দাঙি ধৰিছে ৷ সদনৰ প্ৰশ্নোত্তৰকালত তৃণমূল কংগ্রেছৰ সাংসদ জগদীশ চন্দ্র বর্মা বাসুনিয়া আৰু শর্মিলা সৰকাৰে উত্থাপন কৰা এক প্ৰশ্নৰ উত্তৰত বিভাগীয় ৰাজ্যমন্ত্রীজনে প্রদান কৰা তথ্য অনুসৰি, ভাৰত–বাংলাদেশ সীমান্তৰ সমান্তৰালকৈ ভাৰত–ম্যানমাৰ সীমান্তৰেও অনুপ্রৱেশৰ সংখ্যা শেহতীয়াকৈ ব্যাপকভাৱে বৃদ্ধি পোৱা পৰিলক্ষিত হৈছে ৷

যোৱা ১২ বছৰত নিৰাপত্তা বাহিনীয়ে ভাৰত-ম্যানমাৰ সীমান্তৰ পৰা কৰায়ত্ত কৰিছে ১,৬০২জন অবৈধ নাগৰিকক ৷ ইয়াৰ ভিতৰত কেৱল এই বছৰতে গ্রেপ্তাৰ কৰা হৈছে ৪৩৭জন লোকক ৷ যোৱা বছৰত গ্রেপ্তাৰ কৰা হৈছিল ৪৪১জন অবৈধ নাগৰিকক ৷

লক্ষণীয়ভাৱে ২০২২ চনৰ পৰা ভাৰত-ম্যানমাৰ সীমান্তত অবৈধ নাগৰিকৰ আগমন বৃদ্ধি পোৱা পৰিলক্ষিত হৈছে ৷ ২০২২ চনত ১৭৩জন আৰু ২০২৩ চনত ২১২জন অবৈধ নাগৰিকক ভাৰত–ম্যানমাৰ সীমান্তৰ পৰা গ্রেপ্তাৰ কৰা হয় ৷

মন্ত্রী ৰায়ে প্রদান কৰা তথ্য অনুসৰি, ১,৬৪৩ কিলোমিটাৰব্যাপী ভাৰত–ম্যানমাৰ সীমান্তৰ মাত্র ৯.২১৪ কিলোমিটাৰ এলেকাত কাঁহটীয়া তাঁৰৰ বেৰ আছে ৷ আনহাতে, ভাৰত-বাংলাদেশ সীমান্তত ২০১৪ চনৰ পৰা ২০২৪ চনলৈকে বছৰি কৰায়ত্ত কৰা অবৈধ বাংলাদেশীৰ সংখ্যা হৈছে ক্রমে ২,১৬০, ২,৮০৯, ১,৬০১, ৯০৭, ৮৮৪, ১,১০৯, ৯৫৫, ১,২০৮, ২,০৭৬, ২,৬১৭ আৰু ২,৫২৫ ৷ অর্থাৎ ২০২২ চনৰ পৰা ভাৰত–বাংলাদেশ সীমান্ততো অবৈধ বাংলাদেশীৰ তৎপৰতা বৃদ্ধি পাইছে ৷

লক্ষণীয়ভাৱে মন্ত্রী ৰায়ে প্রদান কৰা তথ্য কেৱল সীমান্তৱর্তী অঞ্চলৰ পৰা কৰায়ত্ত কৰা অবৈধ বাংলাদেশীৰহে ৷ ইয়াৰ উপৰি গোপনে কিমানসংখ্যক অবৈধ বাংলাদেশীয়ে ভাৰতত প্রৱেশ কৰিছে তাৰ কোনো হিচাপ চৰকাৰৰ ওচৰত নাই ৷ মন কৰিবলগীয়া যে ভাৰত-বাংলাদেশ সীমান্তৰ ৭৯ শতাংশ কাঁইটীয়া তাঁৰৰ বেৰেৰে সুৰক্ষিত কৰাৰ বিপৰীতে ২,১৩৫.১৩৬ কিলোমিটাৰব্যাপী ভাৰত-পাকিস্তান সীমান্তৰ ৯৩.২৫ শতাংশই বেৰেৰে সুৰক্ষিত ৷

লগতে পঢ়ক : পাঁচ বছৰত অসমত বৃদ্ধি পথ দুৰ্ঘটনাত নিহতৰ সংখ্যাঃ কেন্দ্রীয় পথ পৰিবহণ মন্ত্রীৰ উদ্বেগজনক তথ্য