২০২৫ চনৰ ২২ এপ্ৰিলত পহলগাম সন্ত্ৰাসবাদী আক্ৰমণৰ পিছৰে পৰা পাকিস্তানে অহৰহ ভাৰতৰ আক্ৰমণৰ আশংকা কৰি আহিছে।

চুবুৰীয়া দেশখনত ইমানেই ভয়ৰ সৃষ্টি হৈছে যে ভাৰতে যিকোনো সময়তে আক্ৰমণ কৰিব পাৰে বুলি বাৰে বাৰে একেখিনি কথাই কৈছে।

শেহতীয়া ঘটনাক লৈ প্ৰতিৰক্ষা মন্ত্ৰী খোৱাজা আছিফে কয় যে ভাৰতে যিকোনো সময়তে এল অ’ চিত সামৰিক আক্ৰমণ চলাব পাৰে।

এটা সাক্ষাৎকাৰত খোৱাজা আছিফে কয়, ‘LoC ৰ যিকোনো পইণ্টত ভাৰতে আক্ৰমণ কৰিব পাৰে বুলি খবৰ আহিছে।ইয়াৰ উপযুক্ত উত্তৰ পাকিস্তানে দিব।”

আছিফে লগতে কয় যে ‘পাকিস্তানৰ প্ৰধানমন্ত্ৰী শ্বাহবাজ শ্বৰীফে পহলগাম আক্ৰমণৰ আন্তঃৰাষ্ট্ৰীয় তদন্তৰ দাবী জনাইছে’।

তেওঁ কয় যে এনে তদন্তত ভাৰত নিজেই বা কোনো আভ্যন্তৰীণ গোট ইয়াৰ সৈতে জড়িত আছিল আৰু ইয়াৰ ফলত নতুন দিল্লীৰ ভিত্তিহীন অভিযোগৰ আঁৰৰ সত্যতা উন্মোচিত হ’ব।’

পহলগাম আক্ৰমণৰ পিছত ভাৰতৰ পৰা সামৰিক ব্যৱস্থা হ’ব পাৰে বুলি পাকিস্তানী মন্ত্ৰীয়ে কোৱা এইটোৱেই প্ৰথম নহয়।

যোৱা সপ্তাহত দেশৰ তথ্য মন্ত্ৰী আটা তাৰাৰে কয় যে ভাৰতৰ সম্ভাৱ্য আক্ৰমণৰ ভাবুকিৰ বাবেই পৰৱৰ্তী ২৪-৩৬ ঘন্টা গুৰুত্বপূৰ্ণ। অৱশ্যে সময় পাৰ হৈ গ’ল আৰু তেনে কোনো ব্যৱস্থা আৰম্ভ নহ’ল।

এই পৰিস্থিতিৰ মাজতে পাকিস্তানৰ সেনা প্ৰধান জেনেৰেল চৈয়দ অসীম মুনিৰে দেশৰ প্ৰতিষ্ঠা আৰু জনসাধাৰণৰ সমৃদ্ধি ৰক্ষাৰ বাবে পূৰ্ণ শক্তিৰে প্ৰত্যুত্তৰ দিয়াৰ কথা উল্লেখ কৰিছে।

পেহেলগাম সন্ত্ৰাসবাদী আক্ৰমণৰ পিছত ভাৰত আৰু পাকিস্তানৰ উত্তেজনাৰ মাজতে ৰাষ্ট্ৰসংঘৰ নিৰাপত্তা পৰিষদৰ এখন ৰুদ্ধদ্বাৰ বৈঠক অনুষ্ঠিত হয়।অৱশ্যে পাকিস্তানৰ অনুৰোধৰ পিছত অনুষ্ঠিত এই বৈঠকত কোনো সুনিৰ্দিষ্ট ফলাফল পোৱা নগ’ল।

সোমবাৰে ইউএনএছচিত বন্ধ দুৱাৰৰ বৈঠকৰ পাছত পাকিস্তানে লাজৰ সন্মুখীন হ’বলগীয়া হয়।এই বৈঠকৰ পিছত ৰাষ্ট্ৰসংঘই কোনো আনুষ্ঠানিক বিবৃতি প্ৰকাশ কৰা নাই বা নতুবা কোনো ধৰণৰ প্ৰস্তাৱ গৃহীত কৰা নাছিল।

বৈঠকখনত পেহেলগাম আক্ৰমণৰ বাবে পাকিস্তানক পৰোক্ষভাৱে তিৰস্কাৰ কৰিছে ৰাষ্ট্ৰসংঘৰ মহাসচিবগৰাকীয়ে।বৈঠকৰ পূৰ্বে ৰাষ্ট্ৰসংঘৰ মহাসচিব গুটেৰেছে পেহেলগাম সন্ত্ৰাসবাদী আক্ৰমণক তীব্ৰ গৰিহণা দি কয় যে ইয়াৰ বাবে দোষীক শাস্তি দিব লাগিব।অৱশ্যে সামৰিক ব্যৱস্থা সমাধান নহয় বুলি উল্লেখ কৰি তেওঁ দেশসমূহক সংযম হ’বলৈ পৰামৰ্শ দিয়ে।

এই বৈঠকৰ সময়ত পাকিস্তানে অহৰহ মিছা বক্তব্য দি থাকিল।তেওঁলোকে ভাৰতে সিন্ধু নদী সন্ধি স্থগিত ৰখাৰ পদক্ষেপক অবৈধ বুলি অভিহিত কৰিছে।

ইয়াৰ ফলত অঞ্চলটোৰ শান্তি আৰু নিৰাপত্তাৰ প্ৰতি ভাবুকি আহি পৰিছে বুলিও তেওঁলোকে কয়।পেহেলগাম সন্ত্ৰাসবাদী আক্ৰমণত জড়িত থকাৰ কথা পুনৰ অস্বীকাৰ কৰিলে পাকিস্তানে।

তেওঁলোকে দাবী কৰিছিল যে তেওঁলোক নিৰ্দোষী আৰু আমি এনে আক্ৰমণক গৰিহণা দিছো, ইয়াৰ লগত পাকিস্তানৰ কোনো সম্পৰ্ক নাই।এনে আক্ৰমণৰ স্বচ্ছ আৰু স্বতন্ত্ৰ তদন্তৰ বাবেও সাজু হৈছে পাকিস্তান।

জানিব পৰা মতে এই বৈঠকখন UNSC ৰ সাধাৰণ চেম্বাৰৰ পৰিৱৰ্তে বন্ধ কোঠাতহে হৈছিল। বৈঠকখন সেই সময়ত হৈছিল, যেতিয়া ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছে দুয়োখন পাৰমাণৱিক অস্ত্ৰধাৰী দেশৰ মাজত উত্তেজনা শিখৰত উপনীত হোৱাক লৈ উদ্বেগ প্ৰকাশ কৰিছিল।