বিস্ফোৰণৰ প্ৰাবল্য ইমানেই ভয়াৱহ আছিল যে ৰে’লখনৰ ইঞ্জিনসহ তিনিটা ডবা লাইনচ্যুত হয় আৰু আন দুটা ডবা সম্পূৰ্ণৰূপে ওলটপালট হৈ পৰে

পাকিস্তানৰ দক্ষিণ-পশ্চিম প্ৰদেশ বেলুচিস্তানৰ কুৱেটাত দেওবাৰে পুৱা এক ভয়াবহ সন্ত্ৰাসবাদী আক্ৰমণ সংঘটিত হয় । চহৰখনৰ চমন ফটক ৰে’লৱে এলেকাৰ সমীপত সংঘটিত এই বিস্ফোৰণত অতি কমেও ২৪ জন লোক নিহত হোৱাৰ বিপৰীতে ৫০ জনৰো অধিক লোক গুৰুতৰভাৱে আহত হয় ।

কৰ্তৃপক্ষই জানিবলৈ দিয়া মতে, সামৰিক বাহিনীৰ লোক আৰু তেওঁলোকৰ পৰিয়ালক কঢ়িয়াই নিয়া এখন ৰে’লক লক্ষ্য কৰি এই পৰিকল্পিত আক্ৰমণ চলোৱা হৈছিল ।

বিস্ফোৰক ভৰ্তি বাহনেৰে আক্ৰমণ, লাইনচ্যুত কেইবাটাও ডবা-

চৰকাৰী সূত্ৰই প্ৰকাশ কৰা অনুসৰি, অহা ঈদৰ ছুটি কটাবলৈ সামৰিক কৰ্মী আৰু তেওঁলোকৰ পৰিয়ালৰ লোকসকলে পেছাৱৰ অভিমুখী ‘জাফৰ এক্সপ্ৰেছ’ নামৰ ৰে’লখনেৰে যাত্ৰা কৰিছিল । পুৱা প্ৰায় ৮ বজাত ৰে’লখনে চমন ফটকৰ এটা চিগনেল পাৰ হৈ যোৱাৰ সময়তে এখন বিস্ফোৰক ভৰ্তি বাহনে ৰে’লখনৰ এটা ডবাত প্ৰচণ্ড জোৰে খুন্দা মাৰে ।

স্থানীয় সংবাদ মাধ্যম আৰু ‘ডন’ৰ প্ৰতিবেদন অনুসৰি, বিস্ফোৰণৰ প্ৰাবল্য ইমানেই ভয়াৱহ আছিল যে ৰে’লখনৰ ইঞ্জিনসহ তিনিটা ডবা লাইনচ্যুত হয় আৰু আন দুটা ডবা সম্পূৰ্ণৰূপে ওলটপালট হৈ পৰে ।

যুদ্ধকালীন তৎপৰতাৰে উদ্ধাৰ অভিযান-

ঘটনাৰ পিছতে কুৱেটাৰ সকলো চৰকাৰী চিকিৎসালয়ত জৰুৰীকালীন অৱস্থা ঘোষণা কৰা হৈছে আৰু বন্ধৰ দিনটোতো সকলো চিকিৎসক তথা চিকিৎসা কৰ্মীক জৰুৰীভাৱে কৰ্তব্যত যোগদান কৰিবলৈ মাতি পঠিওৱা হৈছে । বৰ্তমান ৫০ জনতকৈও অধিক লোক চিকিৎসালয়ত চিকিৎসাধীন হৈ আছে, যাৰ ভিতৰত কেইবাজনৰো অৱস্থা অতি সংকটজনক । ফলত মৃতকৰ সংখ্যা আৰু বৃদ্ধি পোৱাৰ আশংকা কৰা হৈছে ।

আনহাতে, সাৱধানতা অৱলম্বন কৰি পেছাৱৰমুখী জাফৰ এক্সপ্ৰেছখনক কুৱেটা ৰে’ল ষ্টেচনতে ৰখাই দিয়া হয় । পাকিস্তান ৰে’লৱে বিভাগে জানিবলৈ দিয়া মতে, দুৰ্ঘটনাস্থলীত উদ্ধাৰকাৰী ট্ৰাক আৰু সাহায্য ৰে’লৰ জৰিয়তে উদ্ধাৰ অভিযান পূৰ্ণগতিত চলাই থকা হৈছে । সমগ্ৰ চহৰখনতে নিৰাপত্তা ব্যৱস্থা কটকটীয়া কৰাৰ লগতে সকলো প্ৰাসংগিক প্ৰতিষ্ঠানক হাই এলাৰ্টত ৰখা হৈছে ।

লগতে পঢ়ক : হোৱাইট হাউচৰ সমীপত তীব্ৰ গুলীচালনা: বন্দুকধাৰীসহ দুজন আহত