২৮ ছেপ্টেম্বৰত মুম্বাইত অনুষ্ঠিত হ’ব বি চি চি আইৰ বাৰ্ষিক সাধাৰণ সভা

ভাৰতীয় ক্ৰিকেট নিয়ন্ত্ৰণ ব’ৰ্ডৰ এ জি এম অৰ্থাৎ বাৰ্ষিক সাধাৰণ সভা ২৮ ছেপ্টেম্বৰত মুম্বাইত অনুষ্ঠিত হ’ব । এই সময়ছোৱাত ব’ৰ্ডৰ অধ্যক্ষ আৰু আই পি এলৰ অধ্যক্ষকে ধৰি কেইবাটাও পদৰ বাবে নিৰ্বাচন অনুষ্ঠিত হ’ব । চলিত মাহৰ আৰম্ভণিতে প্ৰাক্তন ভাৰতীয় ক্ৰিকেটাৰ ৰজাৰ বিনীয়ে পদত্যাগ কৰাৰ পিছত বি চি চি আইৰ অধ্যক্ষ পদ খালী হোৱাৰ বিপৰীতে ইণ্ডিয়ান প্ৰিমিয়াৰ লীগৰ অধ্যক্ষ অৰুণ ধুমলে ছবছৰীয়া কাৰ্যকাল সম্পূৰ্ণ কৰাৰ পিছত বাধ্যতামূলক কুলিং পিৰিয়ডলৈ যোৱাৰ সম্ভাৱনা আছে ।

পদ অক্ষুণ্ণ ৰখাৰ সম্ভাৱনা-

বি চি চি আইৰ সচিব দেৱজিৎ শইকীয়াই এই পৰ্যন্ত প্ৰায় তিনি বছৰৰ কাৰ্যকাল সম্পূৰ্ণ কৰিছে । ইয়াত তেওঁ দুবছৰ তিনিমাহ যুটীয়া সচিব আৰু ৯ মাহ সচিব হিচাপে কাম কৰি আহিছে । এনে পৰিস্থিতিত পদটোত তেওঁৰ ধাৰাবাহিকতা প্ৰায় নিশ্চিত বুলি ধৰা হৈছে । দৰাচলতে জয় শ্বাহ আন্তঃৰাষ্ট্ৰীয় ক্ৰিকেট পৰিষদৰ অধ্যক্ষ হোৱাৰ পাছত চলিত বৰ্ষৰ জানুৱাৰী মাহত সৰ্বসন্মতিক্ৰমে সচিব নিৰ্বাচিত হৈছিল শইকীয়া । ইয়াৰ উপৰিও পদ অক্ষুণ্ণ ৰখাৰ সম্ভাৱনা থকা আন বিষয়াসকলৰ ভিতৰত আছে ৰোহন গৌণ দেশাই আৰু প্ৰভতেজ ভাটিয়া । চলিত বৰ্ষৰ মাৰ্চ মাহত দেশাই যুটীয়া সচিব নিৰ্বাচিত হোৱাৰ লগতে জানুৱাৰী মাহত ভাটিয়াক শইকীয়াৰ সৈতে কোষাধ্যক্ষ হিচাপে নিযুক্তি দিয়া হয় ।

২০২২ত অধ্যক্ষ হৈছিল বিনী-

২০২২ চনৰ অক্টোবৰ মাহত বিনীক বি চি চি আইৰ অধ্যক্ষ হিচাপে নিযুক্তি দিয়া হৈছিল । ভাৰতীয় প্ৰাক্তন অধিনায়ক সৌৰভ গাংগুলীৰ ঠাইত বিনীক বি চি চি আইৰ অধ্যক্ষ হিচাপে নিযুক্তি দিয়া হৈছিল । গাংগুলীয়ে তিনি বছৰীয়া কাৰ্যকাল সম্পূৰ্ণ কৰিছিল । তেতিয়া বিনীয়েই আছিল শীৰ্ষ পদৰ বাবে মনোনয়ন দাখিল কৰা একমাত্ৰ প্ৰাৰ্থী । ইয়াৰ পূৰ্বে ছেপ্টেম্বৰ মাহত অনুষ্ঠিত হ’বলগীয়া বি চি চি আইৰ এ জি এমলৈকে বিনী এই পদত থাকিব বুলি খবৰ ওলাইছিল যদিও জুলাই মাহত ৭০ বছৰ সম্পূৰ্ণ হোৱাৰ বাবে তেওঁৰ কাৰ্যকাল শেষ হয় ।

অধ্যক্ষ হিচাপে বিনীৰ কাৰ্যকাল-

বিনী বি চি চি আইৰ অধ্যক্ষ হোৱাৰ পিছত ভাৰতে দুখন সীমিত অভাৰ ফৰ্মেট আই চি চি প্ৰতিযোগিতাত জয়লাভ কৰে । ভাৰতে আই চি চি টি-২০ বিশ্বকাপ ২০২৪ আৰু আই চি চি চেম্পিয়নছ ট্ৰফী ২০২৫ত জয়লাভ কৰে । ঐতিহাসিক মহিলা প্ৰিমিয়াৰ লীগ (ডব্লিউ পি এল)ও বিনীৰ অধ্যক্ষ হিচাপে কাৰ্যনিৰ্বাহ কৰাৰ সময়ত আৰম্ভ হয় । অধ্যক্ষ হিচাপে থকা সময়ছোৱাত ঘৰুৱা ক্ৰিকেটে উন্নত উৎসাহ লাভ কৰিছিল । খেলুৱৈৰ দৰমহা বৃদ্ধি কৰি টিম ইণ্ডিয়াৰ জ্যেষ্ঠ খেলুৱৈসকলক ঘৰুৱা প্ৰতিযোগিতাত খেলা কৰিবলৈ উপযুক্ত আৰু কঠোৰ পদক্ষেপ গ্ৰহণ কৰা হয় ।

লগতে পঢ়ক : হকী এছিয়া কাপৰ ফাইনেলত ভাৰত… ৭-০ত পৰাস্ত চীন

এছিয়া কাপ ‘বৰ্জন’ কৰিবলৈ সাজু বি চি চি আই

এছিয়া কাপ ২০২৫ লৈ অব্যাহত আছে অনিশ্চয়তা । প্ৰতিবেদন অনুসৰি যদি এছিয়ান ক্ৰিকেট পৰিষদৰ বাৰ্ষিক সাধাৰণ সভা (এ জি এম) ঢাকাত অনুষ্ঠিত হয়, তেন্তে বি চি চি আইয়ে যিকোনো প্ৰস্তাৱক “বৰ্জন” কৰিব পাৰে । টি-২০ ফৰ্মেটত ছটা দলৰ মাজত অনুষ্ঠিত হ’ব লগা প্ৰতিযোগিতা এছিয়া কাপৰ ভৱিষ্যত অনিশ্চিত । ভাৰত এই প্ৰতিযোগিতাৰ নিৰ্দিষ্ট আয়োজক আৰু এ চি চিয়ে এতিয়াও ঘোষণা কৰা নাই প্ৰতিযোগিতাখনৰ সূচী বা স্থান । আনহাতে, ছেপ্টেম্বৰ মাহত প্ৰতিযোগিতাখনৰ আয়োজনৰ কথা আছিল যদিও এতিয়া এই প্ৰতিযোগিতাৰ ওপৰত সংকটৰ ডাৱৰ উৰিছে ।

উল্লেখ্য যে ২৪ জুলাইত ঢাকাত সভা অনুষ্ঠিত হোৱাৰ কথা । কিন্তু শেহতীয়াকৈ ভাৰত আৰু বাংলাদেশৰ মাজত যি পৰিস্থিতিৰ সৃষ্টি হৈছে তাৰ প্ৰতি লক্ষ্য ৰাখি ভাৰতে বৈঠকৰ বাবে যাত্ৰা কৰিবলৈ অস্বীকাৰ কৰিছে । শেহতীয়াকৈ বি চি চি আই আৰু বি চি বিয়ে পাৰস্পৰিকভাৱে ভাৰতৰ বাংলাদেশ ভ্ৰমণ ২০২৫ চনৰ আগষ্টৰ পৰা ২০২৬ চনৰ ছেপ্টেম্বৰলৈ পিছুৱাই দিয়াৰ সিদ্ধান্ত লৈছিল ।

পাকিস্তানৰ গৃহমন্ত্ৰী মহছিন নাকভি এ চি চিৰ নেতৃত্বত আছে । প্ৰকাশিত বাতৰি অনুসৰি বৈঠক সন্দৰ্ভত নাকভিয়ে ভাৰতৰ ওপৰত “অপ্ৰয়োজনীয় হেঁচা” প্ৰয়োগ কৰিবলৈ চেষ্টা কৰিছে । লগতে বি চি চি আইয়ে সংস্থাটোৰ অধ্যক্ষক সভাৰ স্থান সলনি কৰিবলৈ অনুৰোধ জনাইছিল যদিও এতিয়ালৈকে কোনো সঁহাৰি পোৱা নাই ।

প্ৰতিবেদন অনুসৰি ভাৰতৰ বাহিৰেও শ্ৰীলংকা, আফগানিস্তান আৰু ওমানৰ ক্ৰিকেট ব’ৰ্ডেও এই বৈঠকৰ পৰা আঁতৰি থকাৰ সিদ্ধান্ত ল’ব পাৰে । এই দেশসমূহেও ঢাকাক বৈঠকৰ স্থান হিচাপে লোৱাত আপত্তি প্ৰকাশ কৰিছে ।

লগতে পঢ়ক : ‘ঋষভ পন্তক চতুৰ্থ টেষ্টৰ পৰা আঁতৰাই ৰাখক’;ৰবি শাস্ত্ৰীয়ে টিম ইণ্ডিয়াক দিলে পৰামৰ্শ