ৰাজহুৱা ধনেৰে বাবৰি মছজিদ নিৰ্মাণ কৰিব বিচাৰিছিল নেহৰুৱে । এই অভিযোগ প্ৰতিৰক্ষা মন্ত্ৰী ৰাজনাথ সিঙৰ ।

বৰোদাত প্ৰতিৰক্ষা মন্ত্ৰী ৰাজনাথ সিঙে বাবৰি মছজিদ আৰু দেশৰ প্ৰথম প্ৰধানমন্ত্ৰী জৱাহৰলাল নেহৰুৰ ভূমিকাক লৈ কেইবাটাও প্ৰশ্ন উত্থাপন কৰে । তেওঁ উল্লেখ কৰে যে জৱাহৰলাল নেহৰুৱে ৰাজহুৱা ধন ব্যৱহাৰ কৰি বাবৰি মছজিদ পুনৰ নিৰ্মাণ কৰিব বিচাৰিছিল যদিও তেতিয়াৰ গৃহমন্ত্ৰী চৰ্দাৰ পেটেলে তেওঁৰ পৰিকল্পনা সফল হোৱাত বাধা দিছিল । এই কাৰণেই বাবৰি মছজিদ কেতিয়াও পুনৰ নিৰ্মাণ কৰা নহ’ল ।

গুজৰাটৰ সাদলী গাঁৱত অনুষ্ঠিত একতা সমদলত অংশগ্ৰহণ কৰি প্ৰতিৰক্ষা মন্ত্ৰীগৰাকীয়ে এই মন্তব্য কৰে । পদযাত্ৰাৰ সময়ত তেওঁ কয় যে আজি আমি যিজন মহান ব্যক্তিৰ ১৫০ সংখ্যক জন্ম জয়ন্তী উদযাপন কৰিছো তেওঁ ভাৰতৰ বাবে এক ঐক্যবদ্ধ শক্তি আছিল আৰু ভাৰতৰ স্বাধীনতাৰ ক্ষেত্ৰত তেওঁৰ নিৰ্ণায়ক নেতৃত্ব আৰু ভূমিকাৰ বাবে সদায় স্মৰণীয় হৈ থাকিব ।

ৰাজনাথ সিঙে কয়, নেহৰুৱে ৰাজহুৱা ধনেৰে বাবৰি মছজিদ নিৰ্মাণৰ পৰামৰ্শ দিছিল । কিন্তু সেই সময়ত চৰ্দাৰ পেটেলে স্পষ্টকৈ ইয়াক অস্বীকাৰ কৰিছিল । তেওঁ ৰাজহুৱা ধনেৰে বাবৰি মছজিদ নিৰ্মাণ কৰিবলৈ দিয়া নাছিল । ইয়াৰ পিছত নেহৰুৱে সোমনাথ মন্দিৰ পুনৰ নিৰ্মাণৰ বিষয়টো উত্থাপন কৰে । চৰ্দাৰ পেটেলে উত্তৰ দিয়ে যে এই বিষয়টো বেলেগ । মন্দিৰৰ বাবে জনসাধাৰণে ৩০ লাখ টকা আগবঢ়াইছিল । এটা ট্ৰাষ্ট গঠন হৈছিল । চৰকাৰী টকাৰ এটকাও এই প্ৰকল্পত খৰছ হোৱা নাছিল ।

ৰাজনাথ সিঙে আৰু কয় যে নেহৰুৱে পেটেলৰ মৃত্যুৰ পিছত সংগ্ৰহ কৰা ধন কুঁৱা আৰু পথ নিৰ্মাণত ব্যয় কৰাৰ পৰামৰ্শ দিছিল । তেওঁৰ উত্তৰাধিকাৰক দমন কৰাৰ চেষ্টা কৰা হৈছিল । পেটেল আছিল সঁচা অৰ্থত উদাৰ আৰু নিৰপেক্ষ নেতা । তেওঁ কেতিয়াও তুষ্টিকৰণৰ ৰাজনীতি কৰা নাছিল । তেওঁ লগতে কয় যে ১৯৪৬ চনৰ অধ্যক্ষ নিৰ্বাচনত বেছিভাগ ভোট নেহৰুৰ পক্ষত পৰিছিল যদিও গান্ধীৰ জোৰত পেটেলে প্ৰাৰ্থীত্ব প্ৰত্যাহাৰ কৰে আৰু নেহৰু অধ্যক্ষ হয় । পৰৱৰ্তী সময়ত তেওঁ প্ৰধানমন্ত্ৰী হয় ।

ৰাজনাথ সিঙে কয় যে চৰ্দাৰ পেটেলে এবাৰ কৈছিল, “মই নেতা নহয়, মই সৈনিক” আৰু তেওঁ সৈনিক হিচাপে ৰাষ্ট্ৰৰ বাবে নিজৰ জীৱন উৎসৰ্গা কৰিছিল । তেওঁৰ বলিষ্ঠ নেতৃত্বই ভাৰতক একত্ৰিত আৰু অবিভাজ্য কৰি ৰাখিছিল । আজিৰ শক্তিশালী ভাৰত চৰ্দাৰ পেটেলৰ অদম্য ইচ্ছা আৰু দৃষ্টিভংগীৰ অমৰ উত্তৰাধিকাৰ । কাশ্মীৰৰ যোগদানৰ সময়ত চৰ্দাৰ পেটেলৰ সকলো দাবীৰ প্ৰতি গুৰুত্ব দিয়া হ’লে ভাৰতে কাশ্মীৰত ইমান দীৰ্ঘদিনীয়া সমস্যাৰ সন্মুখীন নহ’লহেঁতেন বুলিও কয় ৰাজনাধ সিঙে ।

লগতে পঢ়ক : সংসদত পৰাজয়ৰ হতাশা প্ৰকাশ নকৰিবঃ বিৰোধীক প্ৰধানমন্ত্ৰী মোদীৰ পৰামৰ্শ