শ্ৰীলংকাৰ ৰাষ্ট্ৰপতি অনুৰা কুমাৰ দিছানায়াকে দেওবাৰে তিনিদিনীয়া ভ্ৰমণসূচীৰে ভাৰতত উপস্থিত হয় । বৈদেশিক সচিব বিক্ৰম মিশ্ৰীয়ে তেওঁৰ ভ্ৰমণ আৰু প্ৰধানমন্ত্ৰী মোদীৰ সৈতে হোৱা বৈঠক সন্দৰ্ভত এখন সংবাদমেল অনুষ্ঠিত কৰে । তেওঁ জনোৱা মতে, প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰপতি অনুৰা কুমাৰ দিছানায়কেৰ শ্ৰীলংকা ভ্ৰমণৰ বাবে আমন্ত্ৰণ গ্ৰহণ কৰিছে । বৈদেশিক সচিব বিক্ৰম মিশ্ৰীয়ে কয় যে দ্বিপাক্ষিক বৈঠকৰ সময়ত ৰাষ্ট্ৰপতি দিছানায়কে প্ৰধানমন্ত্ৰীক আমন্ত্ৰণ প্ৰদান কৰে ।

বৈদেশিক সচিবগৰাকীয়ে কয় যে তাৰিখ এতিয়াও কূটনৈতিক মাধ্যমৰ জৰিয়তে চূড়ান্ত হোৱা নাই । তেওঁ লগতে জনায় যে দুয়োখন দেশৰ নেতাৰ মাজত ব্যাপক আলোচনা অনুষ্ঠিত হৈছিল আৰু দুয়োজন নেতাই সহমতত উপনীত হয় যে, মাছমৰীয়াসকলৰ সৈতে সম্পৰ্কিত বিষয়বোৰ মানৱীয় দিশৰ পৰা মোকাবিলা কৰিব লাগে কিয়নো এইবোৰ জীৱিকা সম্পৰ্কীয় বিষয় আৰু যিকোনো পৰিস্থিতিত বল প্ৰয়োগ পৰিহাৰ কৰিব লাগে ।

‘অনুদান সাহায্যৰ বাবে ভাৰতক ধন্যবাদ’

বৈদেশিক সচিব বিক্ৰম মিশ্ৰীয়ে আৰু কয় যে, বৰ্তমানৰ ভ্ৰমণৰ লক্ষ্য হৈছে এই অতি শক্তিশালী অংশীদাৰিত্বক সম্প্ৰসাৰিত কৰা আৰু ইয়াৰ সীমাবদ্ধতাক আৰু অধিক আগুৱাই নিয়া । ৰাষ্ট্ৰপতি দিছানায়কে শ্ৰীলংকাত উন্নয়নমূলক প্ৰকল্প গ্ৰহণৰ বাবে ঋণ পুনৰ্গঠন আৰু অনুদান সাহায্য প্ৰদানৰ ক্ষেত্ৰত ভাৰতে লোৱা গুৰুত্বপূৰ্ণ ভূমিকাৰ বাবে ধন্যবাদ জনায় । বিশেষকৈ শ্ৰীলংকাত সম্পূৰ্ণ হোৱা ৭টা ঋণ প্ৰকল্পৰ সৈতে জড়িত পৰিশোধ নিষ্পত্তিৰ বাবে ২০.৬৬ মিলিয়ন ডলাৰৰ অনুদান সাহায্যৰ বাবে ভাৰতক ধন্যবাদ জনায় তেওঁ । প্ৰধানমন্ত্ৰীয়ে শ্ৰীলংকাৰ অৰ্থনৈতিক স্থিতিশীলতাৰ প্ৰচেষ্টাক সমৰ্থন কৰাৰ আমাৰ অবিৰত দায়বদ্ধতাক পুনৰ দৃঢ় কৰে । ভাৰতৰ এই পন্থা বিনিয়োগ ভিত্তিক আৰু অনুদানমুখী হ’ব বুলিও প্ৰধানমন্ত্ৰীয়ে ৰাষ্ট্ৰপতি দিছানায়কেক আশ্বাস দিয়ে ।

‘ভাৰত সদায়ে সহায় কৰা প্ৰথম দেশ’

বিক্ৰম মিশ্ৰীয়ে কয়, ‘শ্ৰীলংকাৰ ৰাষ্ট্ৰপতিৰ পদ গ্ৰহণ কৰাৰ পিছত দিছনায়কেৰ এয়া প্ৰথম ভ্ৰমণ । কাৰ্যভাৰ গ্ৰহণ কৰাৰ পিছত ভাৰতক প্ৰথম বিদেশী গন্তব্যস্থান হিচাপে বাছি লোৱাটোৱে ভাৰতৰ সৈতে দ্বিপাক্ষিক সম্পৰ্কক শ্ৰীলংকাই কিমান গুৰুত্ব প্ৰদান কৰে, সেই কথাই দেখুৱাইছে । শ্ৰীলংকা ভাৰতৰ নিকটতম সামুদ্ৰিক প্ৰতিবেশী আৰু ভাৰতৰ চুবুৰীয়া প্ৰথম নীতি আৰু ভাৰতৰ ভিজন সাগৰৰ অবিচ্ছেদ্য অংগ হৈ আহিছে । ভাৰতে বাৰে বাৰে দেখুৱাইছে যে ই শ্ৰীলংকাৰ এক নিৰ্ভৰযোগ্য অংশীদাৰ আৰু বিশ্বাসযোগ্য বন্ধু, ভাৰত সদায় সহায় কৰা প্ৰথম দেশ । ৰাষ্ট্ৰপতি দিছানায়কে প্ৰধানমন্ত্ৰী নৰেন্দ্ৰ মোদীক ভাৰতৰ সহায়ৰ বাবে ধন্যবাদ জ্ঞাপন কৰে, বিশেষকৈ ২০২২-২০২৩ বৰ্ষত ৪ বিলিয়ন ডলাৰৰ সাহায্যৰ বাবে… ভাৰতে আই এম এফৰ সৈতে যোগাযোগৰ জৰিয়তে শ্ৰীলংকাৰ বাবে এই বিত্তীয় স্থিতিশীলতা প্ৰচেষ্টাত যোগদান কৰিছে… আমি শ্ৰীলংকাৰ সৰ্ববৃহৎ বাণিজ্যিক অংশীদাৰ, সৰ্ববৃহৎ পৰ্যটক আৰু বিনিয়োগৰ উৎস ।’

শ্ৰীলংকাৰ ৰাষ্ট্ৰপতি অনুৰা কুমাৰ দিছানায়াকে তিনিদিনীয়া ভ্ৰমণ কাৰ্যসূচীৰে দেওবাৰে ভাৰতত উপস্থিত হয় । ইয়াৰ মাজতে তেওঁ সোমবাৰে প্ৰধানমন্ত্ৰী নৰেন্দ্ৰ মোদীৰ সৈতে দ্বিপাক্ষিক সম্পৰ্ক শক্তিশালী কৰাৰ লগতে প্ৰতিৰক্ষা, বাণিজ্য আৰু বিনিয়োগ বৃদ্ধিৰ বাবে বিস্তৃত আলোচনাত মিলিত হয় । উল্লেখ্য যে শ্ৰীলংকাৰ ৰাষ্ট্ৰপতি নিৰ্বাচিত হোৱাৰ পিছত এইটোৱেই ৰাষ্ট্ৰপতিগৰাকীৰ প্ৰথম বিদেশ ভ্ৰমণ, যাৰ বাবে তেওঁ দেওবাৰে ৰাষ্ট্ৰীয় ৰাজধানী নতুন দিল্লীত উপস্থিত হয় । আলোচনাৰ পূৰ্বে ৰাষ্ট্ৰপতি ভৱনত ৰাষ্ট্ৰপতি দিছানায়কেক আদৰণি জনোৱা হয় । তেওঁ ৰাষ্ট্ৰপতি দ্ৰৌপদী মুৰ্মুকো সাক্ষাৎ কৰে ।

প্ৰধানমন্ত্ৰী মোদী আৰু অনুৰা দিছানায়কেৰ আলোচনা সন্দৰ্ভত বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে কয় যে দুয়োখন দেশৰ মাজত বাণিজ্য, বিনিয়োগ, উন্নয়ন আৰু নিৰাপত্তা সহযোগিতাৰ বিষয়ে আলোচনা কৰা হয় ।

জয়শংকৰে সামাজিক মাধ্যমত পোষ্ট কৰে-

বিদেশ মন্ত্ৰী এছ জয়শংকৰে সামাজিক মাধ্যমত পোষ্ট কৰিছে যে্, “ভাৰত ভ্ৰমণৰ আৰম্ভণিতে ৰাষ্ট্ৰপতি দিছানায়েকক সাক্ষাৎ কৰি আনন্দিত হৈছো । শ্ৰীলংকা আমাৰ ‘চুবুৰীয়া প্ৰথম’ নীতি আৰু ‘সাগৰীয় দৃষ্টিভংগী’ৰ বাবে গুৰুত্বপূৰ্ণ । প্ৰধানমন্ত্ৰী মোদীৰ সৈতে তেওঁৰ আলোচনাই আমাৰ দুয়োখন দেশৰ মাজত বিশ্বাস আৰু সহযোগিতা বৃদ্ধি কৰিব বুলি মই নিশ্চিত ।”

দিছানায়েকৰ সামাজিক মাধ্যমৰ পোষ্ট-

ইয়াৰ পূৰ্বে ৰাষ্ট্ৰপতি দিছানায়েকে কয় যে বৈদেশিক পৰিক্ৰমা মন্ত্ৰী জয়শংকৰ আৰু ৰাষ্ট্ৰীয় নিৰাপত্তা উপদেষ্টা অজিত ডোভালৰ সৈতে হোৱা বৈঠকত পাৰস্পৰিক স্বাৰ্থৰ বিষয়ত তেওঁ “অতি উপযোগী আলোচনা” কৰিছিল । “আজি সন্ধিয়া প্ৰায় ৫:৩০ বজাত নতুন দিল্লীত উপস্থিত হওঁ, য’ত তথ্য আৰু সম্প্ৰচাৰ ৰাজ্যিক মন্ত্ৰী ড০ এল মুৰুগান আৰু অন্যান্য বিষয়াসকলে মোক উষ্ম আদৰণি জনায় । আজি ৰাতি এছ জয়শংকৰ আৰু অজিত ডোভালৰ সৈতে পাৰস্পৰিক স্বাৰ্থৰ ওপৰত গুৰুত্বপূৰ্ণ আলোচনা হয় ।“

বৈদেশিক মন্ত্ৰালয়ৰ বিবৃতি-

দিছানায়কেৰ ভাৰত ভ্ৰমণ সন্দৰ্ভত বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালে ছ’চিয়েল মিডিয়া পোষ্টত কয় যে দিছানায়কৰ এই ভ্ৰমণে ভাৰত-শ্ৰীলংকাৰ সম্পৰ্ক গভীৰ কৰাৰ লগতে দ্বিপাক্ষিক অংশীদাৰিত্ব ত্বৰান্বিত কৰাৰ ওপৰত গুৰুত্ব আৰোপ কৰিব । ৰাষ্ট্ৰপতি দ্ৰৌপদী মুৰ্মুকো তেওঁ সাক্ষাৎ কৰিব ।