মণিপুৰত প্ৰধানমন্ত্ৰী মোদী

শনিবাৰে মণিপুৰৰ চুৰাচান্দপুৰত উপস্থিত হয় প্ৰধানমন্ত্ৰী নৰেন্দ্ৰ মোদী । উপস্থিত হোৱাৰ লগ লগে ফুলাম গামোচাৰে আদৰণি জনোৱা হয় প্ৰধানমন্ত্ৰীগৰাকীক । প্ৰধানমন্ত্ৰী মোদীয়ে স্থানীয় ৰাইজৰ সৈতেও মত বিনিময় কৰে ।

উল্লেখ্য যে, আজি প্ৰধানমন্ত্ৰীয়ে চুৰাচান্দপুৰত ৭৩০০ কোটিৰো অধিক মূল্যৰ কেইবাটাও উন্নয়নমূলক প্ৰকল্পৰ আধাৰশিলা স্থাপন কৰে । এই উপলক্ষে প্ৰধানমন্ত্ৰী মোদীয়ে কয় যে মণিপুৰ দেশৰ মুকুট । মণিপুৰ সাহস আৰু আবেগৰ ভূমি । ২০১৪ চনৰ পৰা আমি মণিপুৰৰ সংযোগৰ কাম কৰি আহিছো । এতিয়া মণিপুৰৰ গাঁৱলৈয়ো পথ গৈছে । ইয়াৰ বাবেই মণিপুৰ উন্নয়নৰ পথত আগবাঢ়িছে ।

মণিপুৰৰ জনসাধাৰণক উদ্দেশ্যি প্ৰধানমন্ত্ৰী মোদীয়ে কয়, ‘মণিপুৰৰ ভূমি সাহস আৰু শৌৰ্য্যৰ ভূমি । মণিপুৰৰ ৰাইজৰ আত্মাক প্ৰণাম জনাব বিচাৰিছো । প্ৰচণ্ড বৰষুণ হোৱাৰ পিছতো আপোনালোক সকলোৱে ইয়ালৈ আহিছে, আপোনালোকৰ মৰমৰ বাবে ধন্যবাদ জনাইছো । ধাৰাসাৰ বৰষুণৰ বাবে মোৰ হেলিকপ্টাৰ আহিব নোৱাৰিলে, গতিকে পথেৰে অহাৰ সিদ্ধান্ত ল’লোঁ । ৰাস্তাত দেখা দৃশ্যবোৰৰ বাবে ভগৱানক ধন্যবাদ জনাইছো যে আজি মোৰ হেলিকপ্টাৰখনে কাম কৰা নাছিল । মণিপুৰৰ যুৱক-যুৱতীসকলক যিদৰে হাতত ত্ৰিৰংগ ধৰি থকা দেখিলোঁ, মই জীৱনৰ এই মুহূৰ্তটো কেতিয়াও পাহৰিব নোৱাৰো ।’

মণিপুৰত আশা আৰু বিশ্বাসৰ পুৱাই টোকৰ মাৰিছে-

মণিপুৰে যোৱা ২ বছৰ ধৰি হিংসাৰ সৈতে যুঁজি আহিছে । প্ৰধানমন্ত্ৰী মোদীয়ে ৰাইজক শান্তিৰ বাবে আবেদন জনাই কয়, ‘যিকোনো স্থানত শান্তি প্ৰতিষ্ঠা কৰাটো অতি গুৰুত্বপূৰ্ণ । যোৱা ১১ বছৰত বহু সংঘাতৰ অন্ত পৰিছে । আশা আৰু বিশ্বাসৰ পুৱাই টোকৰ মাৰিছে । যোৱা কেইবছৰমানৰ পৰা ইয়াৰ মানুহে উন্নয়নক অগ্ৰাধিকাৰ দিছে । ভৱিষ্যতেও উন্নয়নে অধিক শক্তি লাভ কৰিব বুলি মোৰ বিশ্বাস । শান্তিৰ পথত আগবাঢ়ি যাবলৈ আৰু সপোন পূৰণ কৰিবলৈ, সন্তানৰ ভৱিষ্যত সুনিশ্চিত কৰিবলৈ সকলো সংগঠনলৈ আহ্বান জনাম । মই আপোনালোকৰ লগত আছো ।’

মণিপুৰৰ পথ আৰু ৰেলৰ বাজেট বৃদ্ধি-

প্ৰধানমন্ত্ৰী মোদীয়ে কয়, ‘মণিপুৰ এখন সীমান্ত ৰাজ্য আৰু ইয়াত সংযোগ সদায় এটা ডাঙৰ প্ৰত্যাহ্বান হৈ আহিছে । ভাল ৰাস্তাৰ অভাৱত আপোনালোকে সন্মুখীন হোৱা অসুবিধাবোৰ মই ভালদৰে বুজি পাওঁ । সেইবাবেই ২০১৪ চনৰ পৰা মণিপুৰৰ সংযোগৰ নিৰন্তৰ উন্নতিৰ ওপৰত গুৰুত্ব দি আহিছো আৰু ইয়াৰ বাবে ভাৰত চৰকাৰে দুটা স্তৰত কাম কৰিছে । প্ৰথমে আমি মণিপুৰৰ পথ আৰু ৰেলৱেৰ বাজেট বৃদ্ধি কৰিলোঁ । দ্বিতীয়তে, আমি গাঁওসমূহক পথৰ সৈতে সংযোগ কৰাৰ প্ৰচেষ্টা চলাইছিলো । বিগত কেইটামান বছৰত মণিপুৰৰ ৰাষ্ট্ৰীয় ঘাইপথত ৩৭০০ কোটি টকা ব্যয় কৰা হৈছে । নতুন ঘাইপথ নিৰ্মাণৰ বাবে ব্যয় কৰা হৈছে ৮,৭০০ কোটি টকা । ভৱিষ্যতেও এই উন্নয়নৰ পৰ্যায় অব্যাহত থাকিব ।’

লগতে পঢ়ক : ‘মই আপোনাৰ লগত আছো…’;মণিপুৰৰ পৰিস্থিতি সন্দৰ্ভত প্ৰধানমন্ত্ৰী মোদীৰ গুৰুত্বপূৰ্ণ মন্তব্য

আকাশ মাৰ্গেৰে বান বিধ্বস্ত হিমাচল পৰিদৰ্শন প্ৰধানমন্ত্ৰী মোদীৰ

এইবাৰৰ বাৰিষাত বানপানী, ভূমিস্খলন আৰু ধাৰাষাৰ বৰষুণৰ ফলত বেয়াকৈ ক্ষতিগ্ৰস্ত হোৱা হিমাচল প্ৰদেশৰ মাণ্ডী আৰু কুল্লুৰ দুৰ্যোগগ্ৰস্ত অঞ্চলসমূহৰ মঙলবাৰে আকাশী জৰীপ কৰে প্ৰধানমন্ত্ৰী মোদীয়ে । প্ৰধানমন্ত্ৰী মোদীয়ে বানাক্ৰান্ত ৰাজ্যখনৰ বাবে ১৫০০ কোটিৰ সাহায্যৰ কথাও ঘোষণা কৰে ।

তেওঁ এক্সত এটা পোষ্টত লিখিছে, ‘হিমাচল প্ৰদেশৰ বান আৰু ভূমিস্খলনৰ ফলত হোৱা ক্ষয়-ক্ষতিৰ মূল্যায়নৰ বাবে আকাশী জৰীপ চলোৱা হয় । এই কঠিন সময়ত আমি জনসাধাৰণৰ সৈতে দৃঢ়তাৰে থিয় দিছো আৰু ক্ষতিগ্ৰস্ত লোকসকলক অবিৰত সহায় নিশ্চিত কৰাৰ বাবে সকলো প্ৰচেষ্টা চলোৱা হৈছে ।’

হিমাচল প্ৰদেশলৈ ১৫০০ কোটিৰ আৰ্থিক সাহায্যৰ লগতে কেন্দ্ৰীয় চৰকাৰৰ এছ ডি আৰ এফ আৰু প্ৰধানমন্ত্ৰী কিষাণ সন্মান নিধিৰ দ্বিতীয় কিস্তিও আগতীয়াকৈ মুকলি কৰি দিয়া হ’ব । প্ৰধানমন্ত্ৰী মোদীয়ে সমগ্ৰ অঞ্চল আৰু জনসাধাৰণক পুনৰ ভাল অৱস্থালৈ অনাৰ বাবে বহুমুখী পন্থাৰ আহ্বান জনায় ।

পি এম আৱাস যোজনাৰ অধীনত নিৰ্মাণ হ’ব ঘৰ-

প্ৰধানমন্ত্ৰী আৱাস যোজনাৰ অধীনত হিমাচল প্ৰদেশত ভূমিস্খলন আৰু বানপানীৰ ফলত ক্ষতিগ্ৰস্ত হোৱা লোকসকলৰ ঘৰ পুনৰ নিৰ্মাণ কৰা হ’ব । ৰাষ্ট্ৰীয় ঘাইপথ মেৰামতি কৰা হ’ব, বিদ্যালয় পুনৰ নিৰ্মাণ কৰা হ’ব । ইয়াৰ সমান্তৰালভাৱে প্ৰধানমন্ত্ৰীৰ ৰাষ্ট্ৰীয় সাহায্য পুঁজিৰ অধীনতো দুৰ্যোগত ক্ষতিগ্ৰস্ত লোকসকলে সহায় লাভ কৰিব । পশুধনৰ বাবে জাৰি কৰা হ’ব মিনি কিট ।

বিশেষকৈ যিসকল কৃষকৰ বৰ্তমান বিদ্যুতৰ সংযোগ নাই তেওঁলোকক অতিৰিক্ত সাহায্য প্ৰদান কৰা হ’ব । প্ৰধানমন্ত্ৰী আৱাস যোজনাৰ অধীনত ক্ষতিগ্ৰস্ত ঘৰৰ জিঅ’টেগিং কৰা হ’ব । ইয়াৰ দ্বাৰা ক্ষতিৰ সঠিক মূল্যায়ন আৰু ক্ষতিগ্ৰস্ত লোকসকলক দ্ৰুতভাৱে সাহায্য প্ৰদান কৰাত সহায়ক হ’ব ।

শিশুসকলৰ নিৰৱচ্ছিন্ন শিক্ষা নিশ্চিত কৰিবলৈ বিদ্যালয়সমূহে ক্ষতিৰ ৰিপৰ্ট আৰু জিঅ’টেগ কৰা হব, যিয়ে সমগ্ৰ শিক্ষা অভিযানৰ অধীনত সময়মতে সাহায্য লাভ কৰাত সহায় কৰিব । ইতিমধ্যে কেন্দ্রীয় চৰকাৰে বিভিন্ন মন্ত্র্যালয়ৰ এটা দল হিমাচল প্রদেশলৈ প্রেৰণ কৰি ক্ষয়-ক্ষতিৰ বুজ লয় ৷ এই দলটোৱে দাখিল কৰা বিশদ প্ৰতিবেদনৰ ভিত্তিত কেন্দ্ৰীয় চৰকাৰে হিমাচল প্ৰদেশৰ বাবে অধিক সহায়ৰ কথা বিবেচনা কৰিব ।

হিমাচল ত ৩৭০ জনৰো অধিক লোকৰ মৃত্যু-

২০ জুনৰ পৰা ৮ ছেপ্টেম্বৰৰ ভিতৰত হিমাচল প্ৰদেশত হোৱা প্ৰচণ্ড বৰষুণ, ডাৱৰ বিস্ফোৰণ, বানপানী আৰু ভূমিস্খলনৰ ফলত ৪,১২২ কোটি টকাৰো অধিক লোকচান হৈছে । ৰাজ্যিক দুৰ্যোগ ব্যৱস্থাপনা কৰ্তৃপক্ষ আৰু ৰাজ্যিক জৰুৰীকালীন অভিযান কেন্দ্ৰৰ তথ্য অনুসৰি ৰাজ্যখনত ৩৭০ জনতকৈ অধিক লোকৰ মৃত্যু হৈছে, ইয়াৰে ২০৫ জন লোকৰ মৃত্যু হৈছে বৰষুণৰ লগত জড়িত কাণ্ডত, য’ত ৪৩ জন ভূমিস্খলন, ১৭ জন ডাৱৰ বিস্ফোৰণ আৰু ৯ জন লোকৰ মৃত্যু হৈছে ।

ইফালে এই পাহাৰীয়া ৰাজ্যত পথ দুৰ্ঘটনাত ১৬৫ জন লোকৰ মৃত্যু হৈছে । ইয়াৰ উপৰিও ৪১ জন লোক এতিয়াও সন্ধানহীন হৈ আছে । হিমাচল প্ৰদেশত হোৱা ধাৰাসাৰ বৰষুণে আন্তঃগাঁথনিৰো ব্যাপক ক্ষতিসাধন কৰিছে । ৰাজ্যখনত ৬৩৪৪টা ঘৰ, ৪৬১খন দোকান আৰু ব্যৱসায়িক প্ৰতিষ্ঠানৰ ক্ষতিসাধন হৈছে । বাৰিষা আৰম্ভ হোৱাৰ পিছৰে পৰা ৰাজ্যখনত ১৩৬টা ভূমিস্খলন, ৯৫টা বান আৰু ৪৫টা ডাৱৰ বিস্ফোৰণৰ তথ্য পোৱা গৈছে ।

লগতে পঢ়ক : ফ্ৰান্সৰ ৰাষ্ট্ৰপতি মেক্ৰনৰ সৈতে বাৰ্তালাপ প্ৰধানমন্ত্ৰী মোদীৰ… ভাৰত ভ্ৰমণলৈ আমন্ত্ৰণ মেক্ৰনক