পেহেলগাম সন্ত্ৰাসবাদী আক্ৰমণৰ তদন্ত এতিয়া সন্ত্ৰাসবাদ বিৰোধী সংস্থা, ৰাষ্ট্রীয় তদন্ত সংস্থাই হাতত লৈছে৷কেন্দ্ৰীয় গৃহ মন্ত্ৰালয়ৰ নিৰ্দেশৰ পিছতে তদন্তকাৰী সংস্থাই এই বিষয়ত আনুষ্ঠানিক তদন্ত আৰম্ভ কৰিছে।তদন্তকাৰী সংস্থাটোৱে প্ৰাথমিক তদন্তত গুৰুত্বপূৰ্ণ প্ৰমাণ পাইছে।

এই ঘটনাটোৰ পিছত বুধবাৰৰ পৰা অপৰাধস্থলীত উপস্থিত হৈ NIAৰ দলটোৱে প্ৰমাণৰ বাবে তদন্ত তীব্ৰতৰ কৰি তুলিছে। বৰ্তমান সন্ত্ৰাসবাদী আক্ৰমণৰ এজন মূল সাক্ষীক বিচাৰি পাইছে, যিজন এজন স্থানীয় ফটোগ্ৰাফাৰ।

আক্ৰমণৰ সময়ত এই ফটোগ্ৰাফাৰ গৰাকীয়ে এজোপা গছত উঠি সমগ্ৰ সন্ত্ৰাসবাদী আক্ৰমণটোৰ ৰেকৰ্ডিং কৰি আছিল।তদন্তকাৰী সংস্থাটোৱে বিশ্বাস কৰে যে ফটোগ্ৰাফাৰজনৰ ভিডিঅ’সমূহ এই গোচৰত গুৰুত্বপূৰ্ণ তথ্য প্ৰদান কৰিব।

ৰেকৰ্ডিং অনুসৰি, ‘প্ৰথম অৱস্থাত দুজন সন্ত্ৰাসবাদীয়ে এখন দোকানৰ আঁৰত লুকাই আছিল…তাৰ পিছত এই সন্ত্ৰাসবাদীসকলে ওলাই আহি প্ৰথমে তাত থকা লোকসকলক কলিমা পঢ়িবলৈ দিছিল।

কিন্তু কলিমা পঢ়িব নোৱাৰাৰ বাবে ৪ জন হিন্দু লোকক গুলিয়াই হত্যা কৰিছিল। ইয়াৰ বাবে সমগ্ৰ অঞ্চলটোত আতংক বিয়পি পৰে আৰু মানুহবোৰ ইফালে সিফালে দৌৰিছিল।

এন আই এৰ দলসমূহে সন্ত্ৰাসবাদ বিৰোধী সংস্থাটোৰ জ্যেষ্ঠ বিষয়াসকলৰ তত্বাৱধানত যিসকলে নিজৰ চকুৰে এই ভয়ংকৰ আক্ৰমণটো দেখিছিল তেওঁলোকক জেৰা চলাই আছে।

পেহেলগামৰ আক্ৰমণৰ পিছতো পাকিস্তানে নিজৰ কুৎসিত কাৰ্যকলাপৰ পৰা বিৰত থকা নাই।পাকিস্তানে অহৰহ উলংঘা কৰি আছে যুদ্ধবিৰতি।

২৫–২৬ এপ্ৰিলৰ নিশা কাশ্মীৰৰ নিয়ন্ত্ৰণ ৰেখাৰ সিপাৰে পাকিস্তান সেনাবাহিনীৰ বিভিন্ন পোষ্টৰ পৰা গুলিচালনা কৰিছে।

ভাৰতীয় সৈন্যইও তাৰ উপযুক্ত উত্তৰ দিছে। বৰ্তমান কোনো ধৰণৰ হতাহতিৰ খবৰ পোৱা নাই।ভাৰতীয় সেনাই এই তথ্য দিছে।

য়াৰ পূৰ্বে বৃহস্পতিবাৰৰ লগতে শুকুৰবাৰেও কাশ্মীৰ উপত্যকাৰ নিয়ন্ত্ৰণ ৰেখাৰ কাষৰীয়া অঞ্চলত ভাৰতীয় সেনাৰ ফৰৱাৰ্ড পোষ্টত গুলিচালনা কৰা হৈছিল।সেনাই ইয়াৰ উপযুক্ত উত্তৰ দিলে।

ভাৰতীয় সেনাৰ এজন বিষয়াই জনোৱা মতে, নিয়ন্ত্ৰণ ৰেখাৰ কিছু ঠাইত পাকিস্তানী সেনাই ক্ষুদ্ৰ অস্ত্ৰৰে গুলিচালনা কৰে।

ইয়াৰ উপযুক্ত উত্তৰ দিয়া হৈছে।একে সময়তে উত্তৰ কাশ্মীৰৰ এল অ’ চিৰ পৰিস্থিতিৰ বাবে স্থানীয় ৰাইজে ভয়ত কটাবলগীয়া হৈছে।

তেওঁৰ মতে, দীৰ্ঘদিন ধৰি দুয়োখন দেশৰ মাজত শান্তি পুনৰুদ্ধাৰ হোৱাৰ বাবে এই অঞ্চলসমূহত শান্তিৰ লগতে উন্নয়নও হ’বলৈ আৰম্ভ কৰিছিল।

পেহেলগাম সন্ত্ৰাসবাদী আক্ৰমণৰ পিছত আজি জম্মু-কাশ্মীৰৰ উপ-ৰাজ্যপাল মনোজ সিনহাই সেনা প্ৰধান উপেন্দ্ৰ দ্বিবেদীৰ সৈতে শ্ৰীনগৰত এক বৈঠকত মিলিত হয়।

এই বৈঠকত এল জিয়ে স্পষ্টকৈ সেনা প্ৰধানক কয় যে ‘পেহেলগাম আক্ৰমণৰ দোষীৰ লগতে সন্ত্ৰাসবাদীৰ আন্তঃগাঁথনি আৰু পৰিৱেশ তন্ত্ৰকো ধ্বংস কৰা’।

তেওঁ লগতে কয় যে ‘সন্ত্ৰাসবাদীয়ে য’তেই আত্মগোপন কৰি আছে, তেওঁলোকক বিচাৰি উলিয়াওক আৰু তেওঁলোকৰ কৰ্মৰ বাবে কঠোৰ শাস্তি দিয়ক।সন্ত্ৰাসবাদীয়ে সাধাৰণ নাগৰিকৰ ওপৰত কৰা এই আক্ৰমণৰ গুৰুতৰ মূল্য দিব লাগিব’।

বৈঠকখনত সেনা প্ৰধান উপেন্দ্ৰ দ্বিবেদীৰ সৈতে জিঅ’চি কমাণ্ড সুচিন্দ্ৰ কুমাৰৰ, উপ সেনা মুৰব্বী লেফটেনেণ্ট জেনেৰেল প্ৰতীক শৰ্মা আৰু জিঅ’চি ১৫ কৰ্পৰ লেফটেনেণ্ট জেনেৰেল প্ৰশান্ত শ্ৰীবাস্তৱো উপস্থিত থাকে।

পেহেলগাম আক্ৰমণৰ পিছত অনুষ্ঠিত এই বৈঠকত, নিৰাপত্তা পৰিস্থিতি, সেনাৰ অভিযান, নিৰাপত্তা সংস্থাসমূহৰ সমন্বয় আৰু হ্ৰস্বম্যাদী আৰু দীৰ্ঘম্যাদী কৌশলৰ বিষয়ে আলোচনা কৰা হয়।

পেহেলগাম ঘটনাৰ সৈতে জড়িত সন্ত্ৰাসবাদী আছিফ শ্বেখ আদিলৰ ঘৰ বোমা বিস্ফোৰণেৰে উৰুৱাই দিয়া হৈছে। তথ্য অনুসৰি পুলৱামা জিলাৰ আৱন্তিপোৰাৰ ট্ৰাল অঞ্চলৰ মংহামাত সংঘটিত বিস্ফোৰণত সন্ত্ৰাসবাদী আছিফ শ্বেখৰ ঘৰ ধ্বংস কৰা হয়।

আনহাতে, বিজবেহাৰাৰ গুৰি নিবাসী লস্কৰ-ই-তৈবাৰ সন্ত্ৰাসবাদী আদিলৰ ঘৰো ইতিমধ্যে ভাঙি পেলোৱা হৈছে। খবৰ অনুসৰি ভাৰতীয় সেনা আৰু জম্মু-কাশ্মীৰ আৰক্ষীৰ সৈতে চি আৰ পি এফৰ এটা দলে নিশা ট্ৰাল স্থিত আছিফ শ্বেখৰ ঘৰত উপস্থিত হয়।

ঘৰৰ তালাচীৰ সময়ত এটা বাকচৰ ভিতৰত কিছু সন্দেহজনক সামগ্ৰী প্ৰত্যক্ষ কৰিছিল।লগে লগে সেই বিস্ফোৰক সামগ্ৰীক নিষ্ক্ৰিয় কৰা হয় আৰু সেই সময়তে প্ৰচণ্ড শব্দ কৰি বিস্ফোৰণ সংঘটিত হয়,যাৰ ফলত আছিফ শ্বেখৰ ঘৰটো ধ্বংস হয়।

ইয়াৰ ফলত কোনো লোক হতাহতি হোৱা নাই।কাৰণ বিস্ফোৰণটোৰ পূৰ্বে অঞ্চলটো সকলো ঘৰ খালী কৰা হৈছিল। তথ্য অনুসৰি ৪২ আৰ আৰৰ অভিযন্তাৰ দলে নিশ্চিত কৰাৰ পিছত ধ্বংস কৰা হয় বাসগৃহ দুটা।