বলীউডৰ অভিনেত্ৰী তথা লাফ্টাৰ ৰাণী বুলি জনাজাত ভাৰতী সিঙে কান্দি থকা দেখিবলৈ পোৱা গৈছে। শেহতীয়াকৈ কাশ্মীৰৰ পেহেলগাম উপত্যকাত সংঘটিত সন্ত্ৰাসবাদী আক্ৰমণে সমগ্ৰ দেশক কঁপাই তুলিছে।

এই আক্ৰমণৰ খবৰে ভাৰতী সিংকো অতি দুখী কৰি তুলিছে আৰু তেওঁ কেইবাবাৰো উচুপি উঠিছিল।শেহতীয়াকৈ ভাৰতী সিঙে নিজৰ ব্লগত এই কথা প্ৰকাশ কৰিছে।

পেহেলগাম সন্ত্ৰাসবাদী আক্ৰমণৰ খবৰ পোৱাৰ পিছৰে পৰা ৰাতি ভালদৰে শুব পৰা নাই ভাৰতী সিং।কেৱল এয়াই নহয় তেওঁ ৰাতি সাৰ পাইও কান্দি থাকে।

পেহেলগাম আক্ৰমণৰ কথা জানিব পাৰি শোকত ডুব গৈছিল ভাৰতী সিং।তেওঁ কৈছিল যে, ‘যোৱা কেইদিনমানৰ পৰা মই দুখী হৈ আছো, মোৰ অনুভৱবোৰ কোনোবাই বুজিব নে নাই নাজানো’।

‘ইনষ্টাগ্ৰামত পেহেলগাম আৰু জম্মু-কাশ্মীৰ সম্পৰ্কে বিধ্বংসী ভিডিঅ’ আৰু পোষ্ট দেখিছো আৰু সেইবোৰে মোৰ হৃদয় ভাঙি পেলাইছে’।

‘এই সকলোবোৰ দেখি মোৰ কেনে লাগিছে বুজাব পৰা নাই।আনকি সেই হৃদয় বিদাৰক দৃশ্যবোৰ চাই ৰাতি দুই-তিনিবাৰকৈ মই কান্দিলোঁ’।

‘সেই সৰু ল’ৰা-ছোৱালীবোৰ…তেওঁলোকৰ কথা ক’বলৈও সাহস নাই৷ভাৰতৰ প্ৰতিজন মধ্যবিত্ত ব্যক্তিয়ে বছৰত এবাৰ  দেশৰ ভিতৰতে ক’ৰবাত ভ্ৰমণ কৰাৰ পৰিকল্পনা কৰে’।

‘কিন্তু এতিয়া মোৰ বৰ ভয় লাগিছে।এই বিষয়ত কি ক’ম বুজি পোৱা নাই। অনুগ্ৰহ কৰি শান্তি ৰাখক। ভাৰতীয় লোক সকল বহু মৰমীয়াল’।

বিগত ২৮ বছৰ ধৰি চলচ্চিত্ৰ জগতলৈ নিজৰ সৰ্বোত্তম অৱদান আগবঢ়োৱা প্ৰবীণ অভিনেতা অতুল কুলকাৰ্ণী কাশ্মীৰৰ উপত্যকাসমূহত ফুৰিবলৈ গৈছে।

অতুলে নিজৰ সামাজিক মাধ্যমত কাশ্মীৰলৈ যোৱা এখন খালী বিমান আৰু আক্ৰমণৰ পিছত তেওঁ পেহেলগামৰ কিছু ছবি শ্বেয়াৰ কৰিছিল যিবোৰ অতি সোনকালে ভাইৰেল হৈ পৰিছে।

ইয়াৰ সমান্তৰালকৈ তেওঁ সামাজিক মাধ্যমত ৰাইজক কাশ্মীৰলৈ আহিবলৈও আহ্বান জনায়।‘ৰং দে বসন্তী’ খ্যাতি অতুল কুলকাৰ্ণীয়ে এটা সাক্ষাৎকাৰত কাশ্মীৰলৈ যোৱাৰ আচল উদ্দেশ্যৰ বিষয়ে কৈছে।

তেওঁ কৈছে যে সন্ত্ৰাসবাদীৰ আক্ৰমণৰ পিছত তেওঁ নিজেই কাশ্মীৰলৈ গৈছে যাতে মানুহক এটা শক্তিশালী বাৰ্তা দিব পাৰো যে ভয় কৰাৰ প্ৰয়োজন নাই।

অভিনেতা গৰাকীয়ে কৈছিল যে, ‘এইখন আমাৰ কাশ্মীৰ, আমাৰ দেশ, আমি নিশ্চয় আহিম’।তেওঁ লগতে কয় যে মুম্বাইত বহি এই কথা ক’লে ভুল হ’লহেঁতেন৷

সেইবাবেই ৰাইজক আশ্বস্ত কৰিবলৈ মই নিজেই কাশ্মীৰলৈ আহিছো।সন্ত্ৰাসবাদীৰ চিন্তাধাৰাৰ প্ৰতি আমি উত্তৰ দিব লাগিব।তেওঁ ক’লে, ‘এয়া আমাৰ কাশ্মীৰ আৰু আমি ইয়ালৈ আহি থাকিম’।

চলিত মাহৰ ২২ তাৰিখে জম্মু-কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণে স্তম্ভিত কৰি তুলিছে অভিনেত্ৰী হিনা খানক।অভিনেত্ৰীগৰাকীয়ে সামাজিক মাধ্যমৰ জৰিয়তে এই আক্ৰমণৰ প্ৰতিক্ৰিয়া প্ৰকাশ কৰিছে।

তেওঁ এটা পোষ্ট শ্বেয়াৰ কৰি নিজৰ দুখ প্ৰকাশ কৰিছে আৰু এই ঘটনাটোৰ নিন্দা কৰিছে। ইয়াৰ লগতে তেওঁ কাশ্মীৰী হোৱাৰ বাবে ক্ষমাও খুজিছে।

অভিনেত্ৰী গৰাকীয়ে লিখিছে যে, ‘শোকবাৰ্তা।এটা ক’লা দিন।নিন্দনীয়। মমতাৰ আহ্বান কৰিছো।যদি আমি বাস্তৱক গ্ৰহণ কৰাত ব্যৰ্থ হওঁ তেতিয়া একোৱেই গুৰুত্বপূৰ্ণ নহয়’।

‘বিশেষকৈ মুছলমান হিচাপে যদি আমি প্ৰকৃততে যি হৈছিল সেয়া মানি নলওঁ তেন্তে বাকী সকলোবোৰেই ঠিক তেনেকুৱাই কৰিব’।

তেওঁ এই সন্ত্ৰাসবাদী আক্ৰমণটোক লৈ ক্ষোভ প্ৰকাশ কৰি কৈছে যে, ‘যি ধৰণে এই আক্ৰমণটো নিৰ্দয়, অমানৱীয়, মগজু নোহোৱা সন্ত্ৰাসবাদীয়ে কৰিছে, যিয়ে নিজকে মুছলমান বুলি কয়, তেওঁলোক বহুত ভংয়কৰ’।

‘মই কল্পনাও কৰিব নোৱাৰো এজন মুছলমানক বন্দুক আগত ৰাখি নিজৰ ধৰ্ম ত্যাগ কৰিবলৈ কয় আৰু তথাপি তেওঁক হত্যা কৰে। এইটোৱে মোৰ হৃদয় ভাঙি পেলাইছে।’

মই সেই সকলক ঘৃণ কৰো, যিসকলে এই কাম কৰিছে।যিসকলে এই কাম কৰিলে, যি ধৰ্ম্মতেই নাথাকক কিয়, মোৰ বাবে তেওঁলোক মানুহ নহয়।একাংশ মুছলমানৰ এই কাৰ্যত মোৰ লাজ লাগিছে’।

‘মই নিজৰ সতীৰ্থ ভাৰতীয়সকলক প্ৰাৰ্থনা কৰিছো যাতে তেওঁলোকে যে আমাক বিচ্ছিন্ন নকৰে। আমি যদি ইজনে সিজনৰ লগত যুঁজিবলৈ আৰম্ভ কৰো তেন্তে আমি তেওঁলোকে বিচৰা কামটোৱে কৰিম,আমাক বিভাজিত কৰিবলৈ, যুঁজি থাকিবলৈ আৰু ভাৰতীয় হিচাপে আমি এনেকুৱা হ’বলৈ দিব নালাগে।’

তেওঁ লগতে কয় যে, এজন ভাৰতীয় হিচাপে মই নিজৰ দেশৰ সৈতে থিয় দিছো। এজন মুছলমান হিচাপে মোৰ সকলো সহযোগী হিন্দু আৰু সকলো ভাৰতীয়ৰ ওচৰত ক্ষমা বিচাৰিছো’।

‘মই এই ঘটনাক লৈ ন্যায় বিচাৰিছো। ইয়াক লৈ কোনো ৰাজনীতি নকৰিব, কোনো বিভাজন নকৰিব। জয় হিন্দ।