পাকিস্তানে ভাৰতৰ বি এছ এফৰ জোৱান পূৰ্ণম কুমাৰ শ্ব’ক ঘূৰাই দিছে । পাকিস্তানী ৰেঞ্জাৰে আট্টাৰী ৱাগাহ সীমান্তৰ মাজেৰে বি এছ এফৰ কনিষ্টবলজনক দেশলৈ উভতাই পঠিয়াইছে । বিগত বিশ দিন তেওঁ পাকিস্তানৰ জিম্মাত আছিল । পুৱা ১০:৩০ বজাত স্বদেশলৈ উভতি আহে কনিষ্টবল পূৰ্ণম কুমাৰ । ইতিমধ্যে জোলানজনক সোধ-পোছ অব্যাহত আছে ।

কেনেকৈ পাকিস্তানৰ হাতত বন্দী হ’ল পূৰ্ণম কুমাৰ ?

ভুলবশতঃ আন্তৰ্জাতিক সীমান্ত পাৰ হৈ পূৰ্ণম কুমাৰ পাকিস্তানত উপস্থিত হোৱাৰ পিছতে তেওঁক পাকিস্তান ৰেঞ্জাৰে জিম্মাত লয় । তেওঁ পঞ্জাৱৰ ফিৰোজপুৰ ছেক্টৰত পোষ্ট আছিল । ভাৰতে ৭ মে’ত ‘অপাৰেচন সিন্দুৰ’ৰ অধীনত সন্ত্ৰাসবাদী আত্মগোপন স্থানত নিখুঁত আক্ৰমণ চলাইছিল । ইয়াৰ পিছতে পাকিস্তানে ভাৰতৰ কেইবাটাও স্থানক লক্ষ্য কৰি ব্যৰ্থ আক্ৰমণ চলাই ।  যাৰ ফলত দুয়ো দেশৰ মাজত উত্তেজনা বৃদ্ধি পায় । এনে পৰিস্থিতিত পূৰ্ণমৰ পৰিয়ালৰ চিন্তা বৃদ্ধি পাই ।

ডি জি এম অ’ৰ সৈতে হোৱা আলোচনাত পূৰ্ণম কুমাৰৰ বিষয়টো উত্থাপন হ’ব বুলি আশা প্ৰকাশ কৰিছিল পূৰ্ণম কুমাৰৰ পত্নী ৰজনীয়ে । তেওঁ কৈছিল, ‘যেতিয়া ৩ মে’ত ভাৰতীয় সেনাই ৰাজস্থানত এজন পাকিস্তানী ৰেঞ্জাৰক আটক কৰি ৰাখিছিল, তেতিয়া এনে লাগিছিল যে হয়তো মোৰ স্বামীকো মুকলি কৰি দিয়া হ’ব । কিন্তু এনে নহ’ল । এতিয়া ডি জি এম অ’ৰ আলোচনাৰ পৰা নতুন আশাৰ সৃষ্টি হৈছে ।

ৰজনীয়ে লগতে কয় যে দেওবাৰে পশ্চিমবংগৰ মুখ্যমন্ত্ৰী মমতা বেনাৰ্জীয়ে তেওঁক ফোন কৰি সকলো ধৰণৰ সহায়ৰ আশ্বাস দিয়ে । মুখ্যমন্ত্রীয়ে শহুৰেকৰ বাবে চিকিৎসা সাহায্যৰ কথাও উল্লেখ কৰে ৷

ভাৰতে নতুন দিল্লীত পাকিস্তানী উচ্চায়ুক্তত কৰ্মৰত এজন বিষয়াক persona non grata বুলি ঘোষণা কৰি ২৪ ঘন্টাৰ ভিতৰত দেশ এৰি যাবলৈ নিৰ্দেশ দিছে । পাকিস্তানী বিষয়াজন তেওঁৰ অধিকাৰক্ষেত্ৰৰ বাহিৰত অন্যান্য সন্দেহজনক কামত জড়িত আছিল বাবে ভাৰতে এই ব্যৱস্থা গ্ৰহণ কৰিছে । ভাৰতে আজি এই সন্দৰ্ভত পাকিস্তান উচ্চায়ুক্তৰ চাৰ্জ ডি এফেয়াৰৰ সন্দৰ্ভত ডেমাৰ্চ (আন এখন দেশৰ বিৰুদ্ধে লোৱা কূটনৈতিক পদক্ষেপ) জাৰি কৰি বিষয়াজনক ২৪ ঘন্টাৰ ভিতৰত দেশ এৰি যাবলৈ নিৰ্দেশ দিয়ে ।

কিন্তু পাকিস্তানী বিষয়াগৰাকীৰ পৰিচয় আৰু তেওঁ কেনেধৰণৰ সন্দেহজনক কামত জড়িত আছিল সেই সন্দৰ্ভত চৰকাৰে কোনো তথ্য প্ৰদান কৰা নাই । বৈদেশ মন্ত্ৰালয়ৰ বিবৃতিত কোৱা হৈছে যে, “ভাৰতত চৰকাৰী মৰ্যাদাৰ সৈতে অসংগতিপূৰ্ণ কাৰ্যকলাপত জড়িত হোৱাৰ বাবে ভাৰত চৰকাৰে নতুন দিল্লীত পাকিস্তান উচ্চায়ুক্তত কৰ্মৰত এজন পাকিস্তানী বিষয়াক নন গ্ৰেটা বুলি ঘোষণা কৰিছে । বিষয়াগৰাকীক ২৪ ঘন্টাৰ ভিতৰত ভাৰত এৰি যাবলৈ কোৱা হৈছে । এই সন্দৰ্ভত আজি পাকিস্তান উচ্চায়ুক্তৰ চাৰ্জ ডি এফেয়াৰ্ছলৈ এখন ডেমাৰ্চ জাৰি কৰা হয় ।”

পহলগাম সন্ত্ৰাসবাদী আক্ৰমণৰ প্ৰতিক্ৰিয়া স্বৰূপে নতুন দিল্লীয়ে পাকিস্তান আৰু পাক অধিকৃত কাশ্মীৰ (PoK)ৰ ৯টা সন্ত্ৰাসবাদী আন্তঃগাঁথনি স্থান ধ্বংস কৰিবলৈ অপাৰেচন সিন্দুৰ আৰম্ভ কৰাৰ পিছতে ভাৰত আৰু পাকিস্তানৰ মাজত উত্তেজনা বৃদ্ধি পোৱাৰ সময়তে এই পদক্ষেপ গ্ৰহণ কৰা হৈছে । এই অভিযানত ভাৰতে বিমান আক্ৰমণত জয়ছ, লস্কৰ আৰু হিজবুলৰ ৯টা সন্ত্ৰাসবাদী ঘাটি ধ্বংস কৰে, য’ত কমেও ১০০টা সন্ত্ৰাসবাদী নিহত হয় ।

পহলগাম সন্ত্ৰাসবাদী আক্ৰমণৰ এদিন পিছত ২৩ এপ্ৰিলত ভাৰতে পাকিস্তানৰ বিৰুদ্ধে কেইবাটাও কঠোৰ কূটনৈতিক পদক্ষেপ গ্ৰহণ কৰে, য’ত নতুন দিল্লীত পাকিস্তান উচ্চায়ুক্তৰ বিষয়াৰ সংখ্যা ৫৫ৰ পৰা ৩০লৈ হ্ৰাস কৰাকে ধৰি ভাৰতে পাকিস্তানৰ সকলো প্ৰতিৰক্ষা উপদেষ্টাক বহিষ্কাৰ কৰি এসপ্তাহৰ ভিতৰত দেশ এৰি যাবলৈ নিৰ্দেশ দিয়ে । ভাৰতে ইছলামবাদত থকা উচ্চায়ুক্তৰ পৰাও প্ৰতিৰক্ষা উপদেষ্টাসকলক প্ৰত্যাহাৰ কৰি কূটনীতিবিদৰ সংখ্যাও হ্ৰাস কৰে ।

পহলগাম সন্ত্ৰাসবাদী আক্ৰমণ আৰু ভাৰতৰ প্ৰতিশোধমূলক অপাৰেচন সিন্দুৰৰ পিছত পুনৰবাৰ পাকিস্তানৰ বিৰুদ্ধে জল আক্ৰমণ আৰম্ভ হৈছে । শনিবাৰে পুৱা ভাৰতে কূটনৈতিক আৰু সামৰিক হেঁচা বজাই ৰখাৰ লগতে চেনাব নদীৰ ওপৰত নিৰ্মিত ছালাল বান্ধৰ পাঁচখন গেট খুলি দিয়ে । ইয়াৰ বাবে পাকিস্তানত বানৰ দৰে পৰিস্থিতিৰ সৃষ্টি হৈছে ।

পুৱা ৬:১৫ বজাত জম্মু সংমণ্ডলৰ ৰিয়াছি জিলাত অৱস্থিত ছালাল বান্ধৰ পৰা পানী এৰি দিয়া হয় । দুদিন পূৰ্বেও বাগলীহাৰ বান্ধৰ দুখন গেট আৰু ছালাল বান্ধৰ তিনিখন গেট মুকলি কৰা হৈছিল । পানী এৰি দিয়াৰ পিছত শনিবাৰে চেনাবৰ পানীৰ স্তৰ ৰিয়াছি, তালৱাৰা, কানচিপট্টা, জে ডি, ডেৰা বাবাৰ তলৰ অঞ্চলৰ পৰা আখনূৰৰ গ্ৰাম্য অঞ্চললৈকে ২২ ফুটৰ ওপৰলৈ উঠি যায় ।

কেতিয়াও সলনি নোহোৱা নিজৰ চৰিত্ৰ পুনৰ বিশ্ববাসীৰ আগত উদঙাই যুদ্ধবিৰতিৰ চাৰি ঘন্টা পাৰ নহৌতেই পাকিস্তানে আৰম্ভ কৰিছে ড্ৰোন আক্ৰমণ আৰু গোলাবৰ্ষণ । ঘোষণাৰ মাত্ৰ চাৰি ঘন্টাৰ পিছতেই যুদ্ধবিৰতি উলংঘন কৰিছে পাকিস্তানে ।

জম্মু-কাশ্মীৰত সীমান্তৰ সিপাৰে পাকিস্তানৰ উচটনিমূলক কাৰ্যকলাপ পুনৰ তীব্ৰতৰ হৈ পৰিছে । শনিবাৰে নিশা পাকিস্তানে বহু অঞ্চলত যুদ্ধবিৰতি উলংঘা কৰি প্ৰচণ্ড গোলাবৰ্ষণৰ আশ্ৰয় লৈছে, আনহাতে কাশ্মীৰৰ বাৰামুল্লা জিলাত সন্দেহযুক্ত ড্ৰোন বিস্ফোৰণ সংঘটিত হৈছে ।

জানিব পৰা মতে পাকিস্তানে আখনূৰ, ৰাজৌৰী আৰু আৰ এছ পুৰা আন্তঃৰাষ্ট্ৰীয় সীমান্তত আৰ্টিলাৰীৰে গোলাবৰ্ষণ আৰম্ঊ কৰিছে । একে সময়তে বাৰামুল্লাত ড্ৰোন আক্ৰমণ সংঘটিত হৈছে । জম্মুৰ পালানৱালা খণ্ডতো পাকিস্তানে যুদ্ধবিৰতি উলংঘা কৰিছে । এই ঘটনাৰ লগে লগে ভাৰতীয় সেনা বাহিনীক ইয়াৰ উপযুক্ত উত্তৰ দিবলৈ নিৰ্দেশ দিয়া হৈছে । পাকিস্তানে যুদ্ধবিৰতি উলংঘা কৰাৰ বাবে বি এছ এফক উপযুক্ত উত্তৰ দিবলৈ নিৰ্দেশ দিছে চৰকাৰে । এই ঘটনাৰ পিছত জম্মুৰ এক বৃহৎ অংশত ব্লেকআউট কৰা হৈছে । বাৰামুল্লাতো ব্লেকআউট হোৱাৰ খবৰ প্ৰকাশ পাইছে । শ্ৰীনগৰৰ বহু অঞ্চলত বিদ্যুৎ বিচ্ছিন্ন হৈ পৰিছে ।

ইয়াৰ বাহিৰেও ৰাজস্থানৰ পোখৰাণলৈ বৃহৎ সংখ্যক ড্ৰোন দেখা পোৱা বুলি খবৰ প্ৰকাশ পাইছে । অৱশ্যে ভাৰতীয় প্ৰতিৰক্ষা ব্যৱস্থাই এই ড্ৰোনসমূহ ধ্বংস কৰি ভূপতিত কৰিছে । ৰাজৌৰীৰ পৰাও গুলীচালনাৰ খবৰ আহিছে ।

উল্লেখ্য যে ভাৰত আৰু পাকিস্তানৰ মাজত শনিবাৰে বিয়লি যুদ্ধবিৰতি ঘোষণা হৈছিল । এই তথ্য দি বৈদেশিক সচিব বিক্ৰম মিশ্ৰীয়ে কয় যে আজি বিয়লি ৩.৩৫ বজাত দুয়োখন দেশৰ ডি জি এম অ’ৰ মাজত বাৰ্তালাপ হয় । সিদ্ধান্ত লোৱা হ’ল যে দুয়োখন দেশে ৫ বজাৰ পৰা আকাশ, পানী আৰু স্থলভাগত আক্ৰমণ তৎক্ষণাত বন্ধ কৰিব । ইয়াৰ লগে লগে দুয়োখন দেশৰ মাজত যুদ্ধবিৰতি ঘোষণা কৰা হৈছে । মিশ্ৰীয়ে কয় যে অহা ১২ মে’ত দুয়োখন দেশৰ বিষয়াসকলে পৰৱৰ্তী কৌশলৰ বিষয়ে আলোচনা কৰিব । কিন্তু যুদ্ধবিৰতিৰ চাৰি ঘন্টা পাৰ নহৌতেই এতিয়া বিশ্বাসঘাতক পাকিস্তানে পুনৰ গোলাবৰ্ষণ আৰম্ভ কৰিছে ।

পাকিস্তানে যুদ্ধবিৰতি উলংঘা কৰাৰ পিছতেই এতিয়া জম্মু-কাশ্মীৰৰ মুখ্যমন্ত্ৰী ওমৰ আব্দুল্লাই সামাজিক মাধ্যমত ক্ষোভ প্ৰকাশ কৰিছে । মুখ্যমন্ত্ৰী ওমৰ আব্দুল্লাই টুইটাৰত উষ্মা প্ৰকাশ কৰি কয়, “যুদ্ধবিৰতিৰ কি হ’ল ?  শ্ৰীনগৰত বিস্ফোৰণৰ শব্দ শুনা গ’ল । এয়া যুদ্ধবিৰতি নহয় । মধ্য শ্ৰীনগৰত এইমাত্ৰ বায়ু প্ৰতিৰক্ষা ইউনিটে প্ৰত্যাক্ৰমণ আৰম্ভ কৰিছে ।”