পহলগাম সনন্ত্ৰাসবাদী আক্ৰমণৰ পিছত ভাৰতে পাকিস্তানৰ বিৰুদ্ধে গ্ৰহণ কৰিছে ইটোৰ পিছত সিটোকৈ কঠোৰ ব্যৱস্থা । প্ৰকৃতিৰ ভূ-স্বৰ্গত পাকিস্তান সমৰ্থিত সন্ত্ৰাসবাদীয়ে নিৰীহ লোকৰ ওপৰত কৰা বৰ্বৰ আক্ৰমণৰ পিছতে ভাৰতে দেশখনৰ বিৰুদ্ধে ধাৰাবাহিকভাৱে গ্ৰহণ কৰিছে কঠোৰ ব্যৱস্থা । যাৰ বাবে এতিয়া ভাৰতৰ ভয়ত কম্পমান হৈ পৰিছে চিৰ বৈৰী দেশখন । ইয়াৰ মজতে ভাৰতে পাকিস্তানত আন এক ডাঙৰ আঘাত হানিছে । এইবাৰ ভাৰতে পাকিস্তানলৈ সকলো শ্ৰেণীৰ ডাক আৰু পাৰ্চেল সেৱা বন্ধ কৰি দিছে । এতিয়া ডাক আৰু পাৰ্চেল বিমান বা স্থলপথেৰে পাকিস্তানলৈ পঠিয়াব নোৱাৰিব বা গ্ৰহণ কৰিব নোৱাৰিব ।

দক্ষিণ কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ পিছতে ভাৰতে পাকিস্তানৰ বিৰুদ্ধে এটাৰ পিছত এটাকৈ কঠোৰ ব্যৱস্থা গ্ৰহণ কৰা পৰিলক্ষিত হৈছে । ডাক আৰু পাৰ্চেল নিষিদ্ধ কৰাৰ সিদ্ধান্তও এই ধাৰাবাহিক কঠোৰ ব্যৱস্থাৰে অংশ । এই সন্ত্ৰাসবাদী আক্ৰমণত ২৬ জন লোকক নিৰ্মমভাৱে হত্যা কৰা হৈছিল । পাকিস্তানস্থিত সন্ত্ৰাসবাদী সংগঠন লস্কৰ-ই-তৈবাৰ সৈতে জড়িত ৰেজিষ্টেন্স ফ্ৰণ্ট (টি আৰ এফ) নামৰ এটা গোটে এই আক্ৰমণৰ দায়িত্ব স্বীকাৰ কৰিছিল । ২০১৯ চনৰ ফেব্ৰুৱাৰী মাহত পুলৱামা আক্ৰমণৰ পিছত জম্মু-কাশ্মীৰত এইটোৱেই আছিল সৰ্ববৃহৎ সন্ত্ৰাসবাদী আক্ৰমণ । সেই আক্ৰমণত ৪৭ জন চি আৰ পি এফ জোৱান শ্বহীদ হৈছিল ।

ভাৰতে পাকিস্তানক দিছে ডাঙৰ আঘাত-

ইয়াৰ পূৰ্বে পহলগাম সন্ত্ৰাসবাদী আক্ৰমণৰ পিছত নিৰাপত্তা সম্পৰ্কীয় কেবিনেট কমিটীৰ বৈঠকত বহু ডাঙৰ ডাঙৰ সিদ্ধান্ত গ্ৰহণ কৰা হৈছিল । এই বৈঠকত ১৯৬০ চনৰ সিন্ধু জল সন্ধি তাৎক্ষণিকভাৱে কাৰ্যকৰী হোৱাকৈ স্থগিত ৰখা হয় । ইয়াৰ লগে লগে সংহত চেক পোষ্ট আট্টাৰী শীঘ্ৰে কাৰ্যকৰী হোৱাকৈ বন্ধ কৰি দিয়া হয় । ইয়াৰ উপৰিও SAARC Visa Rehemption Scheme ৰ অধীনত পাকিস্তানী নাগৰিকক ভাৰতলৈ অহাত অনুমতি দিয়াত নিষেধাজ্ঞা আৰোপ কৰা হয় । লগতে ভাৰতত উপস্থিত থকা যিকোনো পাকিস্তানী নাগৰিকক ভাৰত এৰি যাবলৈ ৪৮ ঘন্টা সময় দিয়া হৈছিল ।

কঠোৰ সকীয়নি প্ৰধানমন্ত্ৰী মোদীৰ-

ইয়াৰ পূৰ্বে ‘মন কি বাত’ অনুষ্ঠানত পুনৰবাৰ পহলগাম আক্ৰমণক লৈ শোক প্ৰকাশ কৰিছিল প্ৰধানমন্ত্ৰী মোদীয়ে । পহলগাম আক্ৰমণৰ দোষীক কঠোৰ শাস্তি দিয়াৰ প্ৰয়োজনীয়তাও তেওঁ পুনৰ কয় । তেওঁ কয় যে পহলগাম কাণ্ডই দেশবাসীক আঘাত দিছে আৰু দেশবাসীৰ হৃদয়ত গভীৰ যন্ত্ৰণা আছে । মানুহে অনুভৱ কৰিব পাৰে ভুক্তভোগীৰ পৰিয়ালৰ যন্ত্ৰণা । আতংকৰ ছবি দেখি উতলি আছে প্ৰতিজন ভাৰতীয়ৰ তেজ ।

প্ৰধানমন্ত্ৰী মোদীয়ে কয় যে আমি এই প্ৰত্যাহ্বানৰ সন্মুখীন হ’বলৈ আমাৰ সংকল্প শক্তিশালী কৰিব লাগিব । আমি এক শক্তিশালী ৰাষ্ট্ৰ হিচাপে আমাৰ ইচ্ছাশক্তি শক্তিশালী কৰিব লাগিব । ভাৰতৰ জনসাধাৰণৰ মাজত যি ক্ষোভ অনুভৱ হয়, সেই ক্ষোভ সমগ্ৰ বিশ্বতে অনুভৱ কৰা হয় । এই সন্ত্ৰাসবাদী আক্ৰমণৰ পিছত সমগ্ৰ বিশ্বৰ পৰা ধাৰাবাহিকভাৱে শোক প্ৰকাশ পাইছে । বহু ৰাষ্ট্ৰপতিয়ে মোক ফোন কৰি পহলগাম কাণ্ডক লৈ শোক প্ৰকাশ কৰিছে । এই জঘন্য সন্ত্ৰাসবাদী আক্ৰমণক সকলোৱে তীব্ৰ গৰিহণা দিছে । সন্ত্ৰাসবাদৰ বিৰুদ্ধে যুঁজত সমগ্ৰ বিশ্বই দেশৰ সৈতে থিয় দিছে । ভুক্তভোগী পৰিয়ালক আশ্বাস দিছো যে তেওঁলোকে ন্যায় পাব… । এই আক্ৰমণৰ দোষীক কঠোৰতম শাস্তি দিয়া হ’ব ।

পহলগাম সন্ত্ৰাসবাদী আক্ৰমণৰ পিছত ভাৰতৰ কঠোৰ স্থিতিৰ বাবে ভয়ত কম্পমান পাকিস্তানে হতাশাত ভুগি আন্তঃৰাষ্ট্ৰীয় সীমান্ততো যুদ্ধবিৰতি উলংঘা আৰম্ভ কৰিছে । ইয়াৰ পূৰ্বে পাকিস্তানে ৫ দিন ধৰি নিয়ন্ত্ৰণ ৰেখাত যুদ্ধবিৰতি উলংঘা কৰি আহিছিল । মঙলবাৰ-বুধবাৰৰ নিশা পাকিস্তানী পোষ্টৰ পৰা বন্দুকৰ গুলীৰ শব্দ শুনা যায় । অৱশ্যে ভাৰতে পাকিস্তানক এই কাণ্ডৰ উপযুক্ত উত্তৰ দিয়ে ।

পাকিস্তানে যুদ্ধবিৰতি উলংঘাৰ পিছত এল অ’ চিৰ বহু খণ্ডত কাৰ্যকলাপ বৃদ্ধি পাইছে । ভাৰতীয় সেনাই পৰিস্থিতিৰ ওপৰত তীক্ষ্ণ দৃষ্টি ৰাখিছে আৰু সীমান্ত অঞ্চলত অপাৰেচনেল এলাৰ্ট জাৰি কৰা হৈছে । আচলতে পহলগামত সন্ত্ৰাসবাদী আক্ৰমণৰ পিছত ভাৰত চৰকাৰ একচন মোডত আছে আৰু পাকিস্তানৰ বিৰুদ্ধে কঠোৰ সিদ্ধান্ত গ্ৰহণ কৰিছে । ইফালে নিয়ন্ত্ৰণ ৰেখাত উত্তেজনা বৃদ্ধি পাইছে ।

পৰগৱাল ছেক্টৰতো গুলীচালনা-

পাকিস্তানে বিগত ৬ দিন ধৰি অবিৰতভাৱে যুদ্ধবিৰতি উলংঘা কৰি সমগ্ৰ নিশা লঘু অস্ত্ৰৰে গুলীচালনা কৰি আহিছে । কিন্তু বুধবাৰে পাকিস্তানে পৰিস্থিতি অধিক অৱনমিত কৰি তুলিছে । এতিয়া জম্মুৰ পৰাগোৱাল খণ্ডৰ আন্তঃৰাষ্ট্ৰীয় সীমান্ততো গুলীচালনা কৰিছে পাকিস্তানী সেনাই ।

জানিব পৰা মতে মঙলবাৰে পুৱালৈকে পাকিস্তানী সেনাই কেৱল নিয়ন্ত্ৰণ ৰেখাতহে যুদ্ধবিৰতি উলংঘা কৰি আছিল যদিও এতিয়া বুধবাৰে নিশা জম্মুৰ পৰাগোৱাল ছেক্টৰৰ আন্তঃৰাষ্ট্ৰীয় সীমান্তত গুলীচালনা কৰিছে ।

ক্ষুদ্ৰ অস্ত্ৰৰে গুলীচালনা কৰিছে পাকিস্তানে-

২৯–৩০ এপ্ৰিলৰ নিশা পাকিস্তানে জম্মু-কাশ্মীৰৰ নৌশ্বেৰা, সুন্দৰবানি আৰু আখনূৰ ছেক্টৰত নিয়ন্ত্ৰণ ৰেখাৰ সিপাৰে গুলীচালনাৰ কৰে । এই গুলীচালনা পাকিস্তানী সেনাই ক্ষুদ্ৰ অস্ত্ৰৰে কৰিছিল । ভাৰতীয় সেনাই এতিয়ালৈকে আৰ্টিলাৰী আৰু এয়াৰ ডিফেন্স গান ব্যৱহাৰ কৰা নাই কাৰণ পাকিস্তানৰ ফালৰ পৰা কেৱল ক্ষুদ্ৰ অস্ত্ৰৰ গুলীচালনাহে চলি আছে ।

ইয়াৰ উপৰিও বাৰামুল্লা আৰু কুপৱাৰা জিলাৰ এল অ’ চিৰ কাষৰ পাকিস্তানী সেনাৰ চকীসমূহৰ পৰা আৰু পৰগৱাল খণ্ডৰ আন্তঃৰাষ্ট্ৰীয় সীমান্তৰ সিপাৰেও অপ্ৰৰোচিতভাৱে ক্ষুদ্ৰ অস্ত্ৰৰ গুলীচালনাৰ খবৰ পোৱা গৈছে । ভাৰতীয় সেনাৰ সৈন্যই ক্ষীপ্ৰতাৰে ব্যৱস্থা গ্ৰহণ কৰি পাকিস্তানী সেনাক ইয়াৰ প্ৰত্যুত্তৰ দিয়ে ।

সমগ্ৰ কাশ্মীৰত এল অ’ চিৰ দৈৰ্ঘ্য ৩৪৩.৯ কিলোমিটাৰ, আনহাতে জম্মু অঞ্চলত সীমান্তৰ ২২৪.৫ কিলোমিটাৰ এল অ’ চিৰ অধীনত পৰে ।

পৰগৱাল খণ্ডত বৃদ্ধি পালে বি এছ এফৰ গতিবিধি-

পাকিস্তানক এতিয়া পৰগৱাল খণ্ডত (আন্তঃৰাষ্ট্ৰীয় সীমান্ত) সক্ৰিয় হৈ থকা দেখা গৈছে । ইয়াত বি এছ এফৰ নিয়োগ বৃদ্ধি কৰা হৈছে আৰু সতৰ্কতা কটকটীয়া কৰা হৈছে । আখনূৰৰ পৰা লখনপুৰলৈকে বিস্তৃত আন্তঃৰাষ্ট্ৰীয় সীমান্তৰ মুঠ দৈৰ্ঘ্য ২০৯.৮ কিলোমিটাৰ ।