প্ৰধানমন্ত্ৰী মোদী বৰ্তমান ১৫ ৰ পৰা ২০ মে’লৈ আয়োজিত এক গুৰুত্বপূৰ্ণ পাঁচখন দেশৰ ভ্ৰমণসূচীত আছে

পাঁচদিনীয়া বিদেশ ভ্ৰমণৰ চতুৰ্থ পৰ্যায়ত নৰৱেত উপস্থিত হোৱা ভাৰতৰ প্ৰধানমন্ত্ৰী নৰেন্দ্ৰ মোদীক সোমবাৰে দেশখনৰ এক সৰ্বোচ্চ সন্মানেৰে বিভূষিত কৰা হয় । নৰৱেৰ ৰজা হাৰাল্ড পঞ্চমে প্ৰধানমন্ত্ৰী মোদীক ‘গ্ৰেণ্ড ক্ৰছ অৱ দি ৰয়েল নৰৱেজিয়ান অৰ্ডাৰ অৱ মেৰিট’ (Grand Cross of the Royal Norwegian Order of Merit) সন্মান প্ৰদান কৰে ।

নৰৱে আৰু আন্তঃৰাষ্ট্ৰীয় সম্প্ৰদায়ৰ সৈতে দ্বিপাক্ষিক সম্পৰ্ক অধিক সুদৃঢ় কৰাৰ ক্ষেত্ৰত আগবঢ়োৱা অসাধাৰণ সেৱা আৰু বিশেষ অৱদানৰ স্বীকৃতিস্বৰূপ প্ৰধানমন্ত্ৰীগৰাকীক এই সৰ্বোচ্চ সন্মান আগবঢ়োৱা হয় । উল্লেখ্য যে, এই নতুন স্বীকৃতিৰ সৈতে প্ৰধানমন্ত্ৰী মোদীয়ে তেওঁৰ কাৰ্যকালত বিভিন্ন বিদেশী ৰাষ্ট্ৰৰ পৰা লাভ কৰা আন্তঃৰাষ্ট্ৰীয় সন্মানৰ সংখ্যা ৩২ খনলৈ বৃদ্ধি পালে ।

ৰয়েল নৰৱেজিয়ান অৰ্ডাৰ অৱ মেৰিটৰ ইতিহাস আৰু নিয়ম-

১৯৮৫ চনত নৰৱেৰ তদানীন্তন ৰজা ওলাভ পঞ্চমে এই সন্মানৰ প্ৰতিষ্ঠা কৰিছিল । নৰৱে তথা সমগ্ৰ মানৱজাতিৰ স্বাৰ্থত ব্যতিক্ৰমী সেৱা আগবঢ়োৱা দেশখনৰ নাগৰিকৰ লগতে বিদেশী বিশিষ্ট ব্যক্তিসকলকো এই সন্মানেৰে ভূষিত কৰা হয় । এই সন্মানৰ প্ৰতীকচিহ্ন বা ইনচিগ্নিয়াটো সোণ বা ৰূপৰে নিৰ্মিত ‘ছেইণ্ট ওলাভৰ ক্ৰছ’ আৰ্হিৰ, যাৰ চাৰিওটা চুকত মুকুট আৰু কেন্দ্ৰভাগত ৰজা ওলাভ প্ৰথমৰ মনোগ্ৰাম সম্বলিত এটা ৰঙা ক্ৰছ থাকে ।

প্ৰট’কল অনুসৰি, এই অৰ্ডাৰৰ বিভিন্ন স্তৰসমূহ পিন্ধাৰ সুকীয়া নিয়ম আছে । ‘নাইটছ ক্ৰছ’ বুকৰ বাওঁফালে পিন্ধা হয় আৰু ‘কমাণ্ডাৰ্ছ ক্ৰছ’ ডিঙিত ফিতাৰে ওলমাই দিয়া হয় । আনহাতে, প্ৰধানমন্ত্ৰী মোদীয়ে লাভ কৰা সৰ্বোচ্চ স্তৰ ‘গ্ৰেণ্ড ক্ৰছ’ সোঁ কান্ধৰ পৰা বাওঁফাললৈ বিস্তৃত এখন বহল কাপোৰ বা সেশ্বৰ (Sash) সৈতে পিন্ধা হয় । মহিলা প্ৰাপকসকলৰ ক্ষেত্ৰত অৱশ্যে এইসমূহ বাওঁ বুকুত এটা ধেনু আকৃতিৰ ফিতাৰ (Ribbon bow) সৈতে সংলগ্ন কৰাৰ পৰম্পৰা আছে ।

পাঁচদিনীয়া বিদেশ ভ্ৰমণত প্ৰধানমন্ত্ৰী-

প্ৰধানমন্ত্ৰী মোদী বৰ্তমান ১৫ ৰ পৰা ২০ মে’লৈ আয়োজিত এক গুৰুত্বপূৰ্ণ পাঁচখন দেশৰ ভ্ৰমণসূচীত আছে । ইউ এ ই, নেদাৰলেণ্ড আৰু চুইডেন ভ্ৰমণ সমাপ্ত কৰি চতুৰ্থ পৰ্যায়ত তেওঁ নৰৱেৰ ৰাজধানী অছ’ল’ত উপস্থিত হৈছে । ইয়াৰ পূৰ্বে চুইডেন ভ্ৰমণকালতো প্ৰধানমন্ত্ৰী মোদীক দেশখনৰ সৰ্বোচ্চ সন্মান “ৰয়েল অৰ্ডাৰ অৱ পোলাৰ ষ্টাৰ কমাণ্ডাৰ গ্ৰেণ্ড ক্ৰছ” প্ৰদান কৰা হৈছিল, যিটো চুইডেন চৰকাৰে কোনো বিদেশী চৰকাৰৰ মুৰব্বীক প্ৰদান কৰা সৰ্বোচ্চ স্বীকৃতি ।

নৰৱে ভ্ৰমণৰ সময়ছোৱাত প্ৰধানমন্ত্ৰী মোদীয়ে তৃতীয় ‘ভাৰত-নৰ্ডিক সন্মিলন’ত অংশগ্ৰহণ কৰিব । নৰৱেৰ কাৰ্যসূচী অন্ত পৰাৰ পিছত, তেওঁ এই ভ্ৰমণসূচীৰ অন্তিম পৰ্যায়ত ইটালী অভিমুখে ৰাওনা হ’ব ।

লগতে পঢ়ক : ৪৩ বছৰৰ পাছত নৰৱেত ভাৰতৰ প্ৰধানমন্ত্ৰী; ওচলোত উষ্ম আদৰণি নৰেন্দ্ৰ মোদীক

যোৱা ৪৩ বছৰৰ ভিতৰত এয়া কোনো ভাৰতীয় প্ৰধানমন্ত্ৰীৰ প্ৰথম নৰৱে ভ্ৰমণ

দ্বিপাক্ষিক কূটনীতিৰ ক্ষেত্ৰত এক নতুন অধ্যায়ৰ সূচনা কৰি আৰু এক ঐতিহাসিক মাইলৰ খুটি স্থাপন কৰি ভাৰতৰ প্ৰধানমন্ত্ৰী নৰেন্দ্ৰ মোদী সোমবাৰে নৰৱেৰ ৰাজধানী ওচলোত উপস্থিত হয় । যোৱা ৪৩ বছৰৰ ভিতৰত এয়া কোনো ভাৰতীয় প্ৰধানমন্ত্ৰীৰ প্ৰথম নৰৱে ভ্ৰমণ । ছুইডেনৰ গুৰুত্বপূৰ্ণ কাৰ্যসূচী সমাপ্ত কৰি দুদিনীয়া চৰকাৰী ভ্ৰমণসূচীৰে ওচলোত উপস্থিত হোৱা প্ৰধানমন্ত্ৰী মোদীৰ এই ভ্ৰমণ হৈছে তেওঁৰ চলিত পাঁচখন দেশৰ আন্তঃৰাষ্ট্ৰীয় ভ্ৰমণৰ চতুৰ্থটো গুৰুত্বপূৰ্ণ পৰ্যায় । এই ভ্ৰমণৰ মূল লক্ষ্য হৈছে ভাৰত আৰু নৰৱেৰ মাজৰ কৌশলগত তথা অৰ্থনৈতিক সম্পৰ্কক এক নতুন মাত্ৰা প্ৰদান কৰা ।

ৰাণৱেত নৰৱেৰ প্ৰধানমন্ত্ৰীৰ অনন্য আদৰণি-

এই ভ্ৰমণৰ তাৎপৰ্য প্ৰতিপন্ন কৰি এক বিৰল কূটনৈতিক সৌজন্যতা প্ৰদৰ্শন কৰা দেখা গ’ল । নৰৱেৰ প্ৰধানমন্ত্ৰী জোনাছ গাহৰ ষ্টোৰে নিজেই বিমানবন্দৰৰ ৰাণৱেত উপস্থিত থাকি ভাৰতীয় প্ৰধানমন্ত্ৰী মোদীক উষ্ম আদৰণি জনায় । বিমানবন্দৰৰ উচ্চস্তৰীয় আদৰণি দলটোত ভাৰতলৈ নৰৱেৰ ৰাষ্ট্ৰযুদ্ধ মে-ইলিন ষ্টেনাৰ, নৰৱেলৈ ভাৰতৰ ৰাষ্ট্ৰদূত গ্ল’ৰিয়া গেংটেৰ লগতে দুয়ো দেশৰ কেইবাগৰাকীও উচ্চপদস্থ কূটনীতিবিদ উপস্থিত থাকে ।

ছচিয়েল মিডিয়াত উছাহ প্ৰকাশ দুয়ো দেশৰ প্ৰতিনিধিৰ-

প্ৰধানমন্ত্ৰী মোদীৰ এই ভ্ৰমণক লৈ নৰৱে চৰকাৰ আৰু কূটনীতিবিদসকলৰ মাজত ব্যাপক উছাহ দেখিবলৈ পোৱা গৈছে । নৰৱেৰ প্ৰধানমন্ত্ৰী জোনাছ গাহৰ ষ্টোৰে ছচিয়েল মিডিয়া প্লেটফৰ্ম ‘X’ত লিখিছে :

“নৰৱেলৈ স্বাগতম, প্ৰধানমন্ত্ৰী মোদী । ই এক ঐতিহাসিক মুহূৰ্তক চিহ্নিত কৰিছে । মই আশাবাদী যে নৰৱে, নৰ্ডিক দেশসমূহ আৰু ভাৰতে বাণিজ্য, সেউজ পৰিৱৰ্তন আৰু আমাৰ উমৈহতীয়া গোলকীয় প্ৰত্যাহ্বানসমূহৰ মোকাবিলা কৰাত সহযোগিতা আৰু অধিক বৃদ্ধি কৰিব ।”

Welcome to Norway, Prime Minister @narendramodi 🇳🇴🇮🇳
It marks a historic moment: the first visit by India's Prime Minister in over 40 years.

I look forward to how Norway, the Nordics & India can strengthen cooperation on trade, green transition and our common global challenges. pic.twitter.com/yDF76OuzYP

— Jonas Gahr Støre (@jonasgahrstore) May 18, 2026

একেদৰে ভাৰতলৈ নৰৱেৰ ৰাষ্ট্ৰদূত মে-ইলিন ষ্টেনাৰেও এই ভ্ৰমণক এক গৌৰৱৰ মুহূৰ্ত বুলি অভিহিত কৰে । তেওঁ ‘X’ত উল্লেখ কৰে যে ৪৩ বছৰৰ পাছত ভাৰতৰ প্ৰধানমন্ত্ৰীৰ এই ভ্ৰমণে দুয়োখন দেশৰ সুদৃঢ় সম্পৰ্ক আৰু সহভাগী উচ্চাকাংক্ষাকে প্ৰতিফলিত কৰিছে ।

ব্যস্ততাপূৰ্ণ কাৰ্যসূচী আৰু মূল লক্ষ্য-

প্ৰধানমন্ত্ৰী মোদীৰ ওচলো ভ্ৰমণৰ সূচী অত্যন্ত ব্যস্ততাপূৰ্ণ । তেওঁ ওচলোত অনুষ্ঠিত হ’বলগীয়া ‘তৃতীয় ভাৰত-নৰ্ডিক সন্মিলন’ত অংশগ্ৰহণ কৰিব । ইয়াৰ উপৰিও তেওঁ নৰৱেৰ ৰজা হেৰাল্ড (পঞ্চম) আৰু ৰাণী চনজাক সাক্ষাৎ কৰিব ।

প্ৰধানমন্ত্ৰী মোদীয়ে নৰৱেৰ প্ৰধানমন্ত্ৰী ষ্টোৰৰ সৈতে এক দ্বিপাক্ষিক বৈঠকত মিলিত হ’ব আৰু দুয়োগৰাকী নেতাই যৌথভাৱে ‘ভাৰত-নৰৱে ব্যৱসায় আৰু গৱেষণা সন্মিলন’ক সম্বোধন কৰিব ।

বাণিজ্য আৰু বিনিয়োগত বিশেষ গুৰুত্ব-

ভাৰতৰ বৈদেশিক পৰিক্ৰমা মন্ত্ৰালয়ে প্ৰকাশ কৰা অনুসৰি, এই ভ্ৰমণে ভাৰত-নৰৱে সম্পৰ্কৰ প্ৰগতিৰ পৰ্যালোচনা কৰাৰ এক ডাঙৰ সুযোগ আনি দিব । বিশেষকৈ—

বাণিজ্য আৰু বিনিয়োগ : ভাৰত-EFTA বাণিজ্য আৰু অৰ্থনৈতিক অংশীদাৰিত্ব চুক্তিৰ আধাৰত বাণিজ্য সম্প্ৰসাৰণ ।

সেউজ প্ৰযুক্তি ও নীলা অৰ্থনীতি : সেউজ প্ৰযুক্তি (Green Tech) আৰু নীলা অৰ্থনীতিৰ (Blue Economy) ক্ষেত্ৰত সহযোগিতা বৃদ্ধি ।

বিত্তীয় গতিশীলতা : ২০২৪ চনৰ হিচাপত দুয়ো দেশৰ মাজত বৰ্তমান প্ৰায় ২.৭৩ বিলিয়ন মাৰ্কিন ডলাৰৰ দ্বিপাক্ষিক বাণিজ্য চলি আছে । লগতে ভাৰতীয় মূলধন বজাৰত নৰৱেৰ চৰকাৰী পেঞ্চন ফাণ্ডৰ প্ৰায় ২৮ বিলিয়ন মাৰ্কিন ডলাৰৰ বিনিয়োগ আছে । এই ভ্ৰমণে এই বিত্তীয় আৰু বাণিজ্যিক সম্পৰ্কক এক নতুন গতি প্ৰদান কৰিব বুলি বৈদেশিক মন্ত্ৰালয়ে আশা প্ৰকাশ কৰিছে ।

লগতে পঢ়ক : ‘ইৰাণৰ একোৱেই নাথাকিব…’;উচ্চ পৰ্যায়ৰ বৈঠকত ‘দ্বিতীয় বিশ্বযুদ্ধ’ৰ ইংগিত ট্ৰাম্পৰ