আমেৰিকাই নাইজেৰিয়াৰ ইছলামিক ষ্টেট সন্ত্ৰাসবাদী সংগঠন তথা ISISৰ বিৰুদ্ধে মাৰাত্মক আক্ৰমণ চলায় । ট্ৰাম্পে কয়, যুদ্ধ বিভাগে অসংখ্য নিখুঁত আক্ৰমণ চলাইছিল, যিটো কেৱল আমেৰিকাইহে কৰিব পাৰে ।

উত্তৰ-পশ্চিম নাইজেৰিয়াত বৃহস্পতিবাৰে (স্থানীয় সময় অনুসৰি) আমেৰিকাই ইছলামিক ষ্টেট সন্ত্ৰাসবাদী সংগঠন তথা ISISৰ বিৰুদ্ধে মাৰাত্মক আক্ৰমণ চলায় । মাৰ্কিন ৰাষ্ট্ৰপতি ট্ৰাম্পে তেওঁৰ ছ’চিয়েল মিডিয়া “ট্ৰুথ ছ’চিয়েল” ৰ পোষ্টত কয় যে এই এয়াৰ ষ্ট্ৰাইকত খ্ৰীষ্টান লোকক হত্যা কৰাৰ অভিযোগত দায়ী উগ্ৰপন্থীক লক্ষ্য কৰি লোৱা হয় ।

ট্ৰাম্পে কয় যে মোৰ নিৰ্দেশত কমাণ্ডাৰ ইন চিফ হিচাপে আমেৰিকাই উত্তৰ-পশ্চিম নাইজেৰিয়াত আইছিছ সন্ত্ৰাসবাদী গোটৰ বিৰুদ্ধে এক শক্তিশালী আৰু মাৰাত্মক আক্ৰমণ চলাই, যিয়ে বহু বছৰ ধৰি মূলতঃ নিৰীহ খ্ৰীষ্টানসকলক নিৰ্মমভাৱে লক্ষ্য কৰি হত্যা কৰি আহিছে ।

সন্ত্ৰাসবাদীক সকীয়নি-

ট্ৰাম্পে কয়, “মই এই সন্ত্ৰাসবাদীসকলক পূৰ্বেই সকীয়াই দিছিলো যে যদি তেওঁলোকে খ্ৰীষ্টানসকলৰ হত্যাকাণ্ড বন্ধ নকৰে তেন্তে তেওঁলোকে ভয়ানক পৰিণতিৰ সন্মুখীন হ’ব আৰু আজি ৰাতিও সেয়াই হ’ল ।” ট্ৰাম্পে আৰু কয়, “যুদ্ধ বিভাগে অসংখ্য নিখুঁত আক্ৰমণ চলাইছিল, যিটো কেৱল আমেৰিকাইহে কৰিব পাৰে ।”

ইছলামিক সন্ত্ৰাসবাদৰ বিৰুদ্ধে হুংকাৰ-

ট্ৰাম্পে কয় যে, মোৰ নেতৃত্বত আমাৰ দেশে উগ্ৰ ইছলামিক সন্ত্ৰাসবাদক বিকশিত হ’বলৈ নিদিয়ে । ঈশ্বৰে আমাৰ সামৰিক বাহিনীক আশীৰ্বাদ কৰক আৰু সকলোকে খ্ৰীষ্টমাছৰ শুভেচ্ছা । হত্যা কৰা সন্ত্ৰাসবাদীকে ধৰি, যাৰ সংখ্যা খ্ৰীষ্টানসকলক হত্যা কৰি থাকিলে আৰু অধিক হ’ব ।

আমেৰিকাৰ ৰাষ্ট্ৰীয় সন্ত্ৰাসবাদ বিৰোধী কেন্দ্ৰৰ তথ্য অনুসৰি ২০১৫ চনত বকো হাৰামে আইছিছৰ প্ৰতি আনুগত্য প্ৰকাশ কৰাৰ পিছত আইছিছ-ৱেষ্ট আফ্ৰিকা (ISIS-WA) গঠন হৈছিল । আমেৰিকাৰ মতে এই শাখাই আঞ্চলিক সামৰিক ঘাটি আৰু অসামৰিক প্ৰতিৰক্ষা বাহিনীক আক্ৰমণ কৰে আৰু সঘনাই চৰকাৰী কৰ্মী, আন্তঃগাঁথনি আৰু খ্ৰীষ্টানসকলক আক্ৰমণ কৰে ।

ইয়াৰ পূৰ্বে ১৯ ডিচেম্বৰত (স্থানীয় সময় অনুসৰি) আমেৰিকা আৰু জৰ্ডানৰ সামৰিক বাহিনীয়ে ছিৰিয়াত ইছলামিক ষ্টেট সন্ত্ৰাসবাদী সংগঠনৰ বিৰুদ্ধে ব্যাপক বিমান আক্ৰমণ চলাই । এশৰো অধিক নিখুঁত নিৰ্দেশিত অস্ত্ৰ-শস্ত্ৰৰে ৭০টাতকৈও অধিক আইছিছৰ লক্ষ্যত আঘাত হানে ।

লগতে পঢ়ক : ‘ভাৰতৰ সৈতে সম্পৰ্ক বিঘ্নিত কৰাৰ প্ৰয়াস…’আমেৰিকাৰ প্ৰতিৰক্ষা মন্ত্ৰালয়ৰ প্ৰতিবেদনক তীব্ৰ সমালোচনা চীনৰ