ছত্তীশগড়ৰ বিজাপুৰত নক্সালবাদী আক্ৰমণৰ ঘটনাত শোক প্ৰকাশ কৰিছে গৃহমন্ত্ৰী অমিত শ্বাহে । অমিত শ্বাহে ২০২৬ চনৰ মাৰ্চ মাহৰ ভিতৰত নক্সালক দেশৰ পৰা নিৰ্মূল কৰাৰ প্ৰতিজ্ঞা কৰি কয় যে জোৱানসকলৰ বলিদান অথলে নাযায় । শ্বাহে কয় যে আই ই ডি বিস্ফোৰণত ডি আৰ জি জোৱানৰ বলিদানৰ খবৰ পাই মই গভীৰ দুখ পাইছোঁ । বীৰ জোৱান সকলৰ পৰিয়াললৈ গভীৰ সমবেদনা জ্ঞাপন কৰিছো ।

শ্বাহে আৰু কয় যে এই দুখক শব্দৰে প্ৰকাশ কৰাটো অসম্ভৱ, কিন্তু মই আপোনালোকক আশ্বস্ত কৰিছো যে আমাৰ জোৱানসকলৰ ত্যাগ অথলে নাযায় । আমি ২০২৬ চনৰ মাৰ্চ মাহৰ ভিতৰত ভাৰতত নক্সালবাদৰ অন্ত পেলাম । উল্লেখ্য যে যোৱা দুবছৰত ৰাজ্যখনৰ নিৰাপত্তা বাহিনীক মাওবাদীয়ে কৰা এইটোৱেই আছিল আটাইতকৈ ডাঙৰ আক্ৰমণ আৰু ২০২৫ চনৰ প্ৰথমটো আক্ৰমণ ।

সোমবাৰে বিজাপুৰৰ কুট্ৰু পথত নক্সালবাদীয়ে নিৰাপত্তাৰক্ষীৰ বাহনত আই ই ডি বিস্ফোৰণ সংঘটিত কৰে । এই ঘটনাত এজন চালক আৰু ৮গৰাকী জোৱান শ্বহীদ হয় । লগতে আন কেইবাগৰাকী জোৱান আহত হোৱা বুলি জানিব পৰা গৈছে । বাহনখনত যাত্ৰা কৰা মুঠ জোৱানৰ সংখ্যাৰ তথ্য এতিয়াও পোৱা হোৱা নাই । জানিব পৰা মতে নক্সাল অভিযানৰ পৰা উভতি আহি আছিল নিৰাপত্তাৰক্ষীৰ দলটো । এই সময়ছোৱাতে কুট্ৰু পথত নক্সালবাদীয়ে তেওঁলোকক এম্বুছ কৰি আই ই ডি বিস্ফোৰণ সংঘটিত কৰে । চত্তিশগড়ত অবিৰত অভিযানৰ বাবে নক্সাল হতাশ হৈ পৰিছে যাৰ বাবে জোৱানক লক্ষ্য কৰি লৈছে ।

ছত্তীশগড়ৰ বিজাপুৰত নিৰাপত্তাৰক্ষীৰ বাহনত নক্সালবাদীৰ বৃহৎ আক্ৰমণ । সোমবাৰে নক্সালবাদীয়ে নিৰাপত্তাৰক্ষীৰ এখন বাহনক লক্ষ্য কৰি আই ই ডি বিস্ফোৰণ সংঘটিত কৰে । বাস্তাৰ ৰেঞ্জৰ আই জিয়ে এই খবৰ নিশ্চিত কৰিছে । প্ৰাথমিক তথ্য অনুসৰি এই আক্ৰমণত ৯ জন জোৱান শ্বহীদ হৈছে । আনহাতে আন কেইবাজনো জোৱান আহত হোৱা বুলি জানিব পৰা গৈছে ।

আই জি বাস্তাৰৰ তথ্য অনুসৰি বিজাপুৰত নক্সালবাদী আক্ৰমণত শ্বহীদ হৈছে দান্তেৱাড়া ডি আৰ জি (জিলা ৰিজাৰ্ভ গাৰ্ড)ৰ ৮ জন জোৱান । এই আক্ৰমণত বাহনখনৰ চালকজনো মৃত্যুমুখত পৰে । আটাইকেইজনেই দান্তেৱাড়া, নাৰায়ণপুৰ আৰু বিজাপুৰত যৌথ অভিযান চলাই উভতি আহিছিল ।

নক্সালৰ এ ডি জি বিবেকানন্দ সিনহাই জনোৱা মতে, নিশা প্ৰায় ২:১৫ বজাত নক্সালবাদীয়ে এই আক্ৰমণ সংঘটিত কৰে । বিজাপুৰৰ কুটুৰ পথত সংঘটিত হয় এই আই ই ডি বিস্ফোৰণ । নক্সালবাদীয়ে লক্ষ্য কৰি লোৱা এই বাহনখনত ৯ জনতকৈ অধিক জোৱানে যাত্ৰা কৰিছিল । এই আআক্ৰমণৰ লগে লগে নিৰাপত্তা বাহিনীয়েও প্ৰত্যুত্তৰ দিয়ে ।

এডিজি নক্সাল অপাৰেচন বিবেকানন্দ সিনহাই কয়, “এয়া নক্সালৰ কাপুৰুষালি । জোৱানসকলৰ এই ত্যাগ অথলে নাযায় । এই আক্ৰমণৰ উত্তৰ দিয়া হ’ব ।”

শোক প্ৰকাশ কৰিলে মুখ্যমন্ত্ৰীয়ে-

জাঞ্জগীৰ-বিজাপুৰ নক্সাল আক্ৰমণক লৈ শোক প্ৰকাশ কৰিছে ছত্তীশগড়ৰ মুখ্যমন্ত্ৰী বিষ্ণুদেৱ ছাইয়ে । তেওঁ কয় যে নক্সালবাদী বৃহৎ লোকচানৰ সন্মুখীন হৈছে আৰু ২০২৬ চনৰ ভিতৰত নক্সালবাদ সম্পূৰ্ণৰূপে নিৰ্মূল হ’ব ।

বিষ্ণুদেৱ ছাইয়ে কয়, “কেন্দ্ৰীয় গৃহমন্ত্ৰী অমিত শ্বাহৰ নেতৃত্বত নক্সালবাদৰ বিৰুদ্ধে অভিযান অব্যাহত আছে । জোৱানসকলে সতৰ্কতাৰে নক্সালবাদীক নিৰ্মূল কৰি আছে ।”